Judges

15 Bhiriọ ibhokhan Izrẹl da so tie iJehova nin ọle rẹkpa ele. Jehova da re E′hud nin ọmọn nọnsi Ge′ra nin obhi Ben′ja·min rẹ hinmhin ele. Obọ-agobọ ọle rẹ lu emhin. Akizẹbue ibhokhan Izrẹl da na obọ ọle je emhin ji Eg′lon nin ojie ọsi Mo′ab rẹ lu ẹsele nanlẹn. 16 Bhiriọ, E′hud da lu agbada nọn mhọn unun eva nọn tan sẹ icubit ọkpa nin egbe ọle. Ọle da gbanọ ọlẹn mun itagha bhi obera nọnsọle bhi otọ awegbe nin ọle mun yọ. 17 Ọle da mun ọne ẹsele nin Eg′lon nin ojie ọsi Mo′ab. Ọria nọn manman kpọnọ Eg′lon ha khin. 18 Ẹghe nin E′hud ki rẹ mun ọne ẹsele nanlẹn fo, ọle da yọle ghe nin ẹbho ne mun ọne ẹsele vae kpanọ. 19 Sokpan ẹghe nin ọle ki rẹ sẹbhi eji ene amanzẹ ye bhi Gil′gal, ọle da fikie yẹ taman ọlẹn yọle: “Eo ọnojie, mẹn mhọn uhọnmhunje nin mẹn guanọ nin mẹn taman uwẹ bhi ẹkhokho.” Bhiriọ ọne ojie da yọle: “Bha nyangbe!” Bhiriọ, eguọmhandia nesọle rebhe da kpanọ zẹ ọle obọ. 20 E′hud da bu ọle re bhi eji ọle ọkpa da dotua bhi eje fure bhi okhun uwa nọnsọle. E′hud da ki taman ọlẹn yọle: “Osẹnobulua je imẹn uhọnmhọn ji uwẹ.” Ọle da mundia kpanọ bhi ojukhuo nọnsọle. 21 Bhiriọ, E′hud da re obọ-agobọ nọnsọle rẹ si ọne agbada nọn ribhi itagha bhi obera nọnsọle yẹ ji ọle ọbhi ẹkẹ nọnsọle. 22 Obọ ọsi ọne agbada da nabhọ rẹkhan ọlẹn. Ọne agbada da khuelo bhi ẹkẹ nọnsọle, ọle bha si ọne agbada sibhọre, bhiriọ, isọn da dagbare bhi ẹkẹ nọnsọle. 23 E′hud da khue ene odẹ ne ribhi ọne okhun uwa yẹ fi isanhan ọbhọ. Ọle da na uhio nin ahoho da nabhi ọne uwa dagbare. 30 Izrẹl da khọn iMo′ab miotọ bhi ọne ukpẹdẹ nin; bhiriọ, egbe da fu ọne otọ re rẹ nabhi ẹkẹ ikpe 80.