Joshua
9 Ọnin ki gbera, ene ribhi ulin uwa ọsi Reuben, Gad, bi eso bhi ulin uwa ọsi Manasseh da sibhi ẹwẹ ibhokhan Izrẹl nekẹle re, ẹghe nin ele rẹ sẹbhi Shiloh bhi otọ ọsi Canaan. Ele da fikie ha khian otọ iGilead, otọ nọnsi ele, nin Jehova na bhi obọ iMoses mun nin ele, nin ele ha dia. 10 Ele ki sẹbhi egbegbe iJordan bhi otọ iCanaan, ene ribhi ulin-uwa ọsi Reuben, ulin-uwa ọsi Gad, bi obọ ọkpa bhi ulin-uwa ọsi Manasseh da bọn ukhuo-izọese bhi egbegbe ọne iJordan. Ọne ukhuo-izọese wo manman hu. 11 Akizẹbue, ibhokhan Izrẹl nekẹle da họn ẹmhọn ọne ojukhuo. Ele da yọle: “Ghe! ene ribhi ulin uwa ọsi Reuben, Gad, bi eso bhi ulin uwa ọsi Manasseh dọ bọn ojukhuo bhi ughu-otọ ọsi Canaan bhi egbegbe iJordan bhi obọ ọsi ibhokhan Izrẹl bhi ọne ughu-otọ.” 12 Ẹghe nin ibhokhan Izrẹl rẹ họn ọnan, ele da sikoko bhi Shiloh nin ele mun okhọn bu ele. 15 Ẹghe nin ele ki rẹ sẹbhi eji ulin-uwa ọsi Reuben, ulin-uwa ọsi Gad, bi obọ ọkpa bhi ulin-uwa ọsi Manasseh ye bhi otọ iGil′e·ad, ele da taman ele yọle: 16 “Ọnan hi ebi usun ẹbho rebhe nọnsi Jehova tale: ‘Ọne emhin ebe nan nin bha lu rẹ rahiẹ Osẹnobulua ọsi Izrẹl, be ibha re ọle ta? Bha zobọ bhọ rẹ ha rẹkhan iJehova ẹlẹnan ranmhude ukhuo-izọese nin bha bọn nin egbe bha bi ranmhude bha sọtẹ iJehova. 21 Bhiriọ ulin-uwa ọsi Reuben, ulin-uwa ọsi Gad, bi obọ ọkpa bhi ulin-uwa ọsi Manasseh da wanniẹn ene ediọn bhi egbe itue uli bhi Izrẹl yọle: 22 “Jehova nin Osẹnobulua nọn nẹ osẹ rebhe! Jehova nin Osẹnobulua nọn nẹ osẹ rebhe! Ọle lẹnmhin, Izrẹl dẹ yẹ lẹn. Ahamiẹn mhan sọtẹ yẹ mhọn akan-ehọ da iJehova, bha hẹi ji a miẹn ghe ibha bha re oya nin mhan ẹlẹnan. 23 Ahamiẹn ghe mhan zobọ bhọ rẹ ha rẹkhan iJehova yẹ bọn ukhuo-izọese nin egbe mhan, beji a ha da miẹn ghe mhan ki ha re ọle lu izọese nan tuẹ a, izọese ọsi ebale, bi izọese ọsi ọfure, Jehova dẹ bhu ọne ohiẹn. 24 Eye, emhin ọbhebhe zẹle nin mhan da lu ọnan, ranmhude, mhan da yọle, ‘Bhi ẹghe odalo, imọn nesẹbha ki taman imọn nesẹmhan yọle: “Be rẹtẹ ibha bhi egbe iJehova nin Osẹnobulua ọsi ibhokhan Izrẹl? 25 Jehova re iJordan rẹ hian ughu nin mhan bi ibha nin ulin-uwa ọsi Reuben bi ulin-uwa ọsi Gad. Bha imhọn uku bhi obọ iJehova.” Bhiriọ, imọn nesẹbha ki lu ọle nin imọn nesẹmhan zobọ bhọ rẹ ha ga iJehova.’ 26 “Ọnan zẹle nin mhan da yọle, ‘Bha ji mhan lu ebi mhan ha sabọ lu nian rẹ bọn ukhuo-izọese, ọ iyi nan rẹ ha lu izọese nan tuẹ a la izọese nekẹle, 27 sokpan nọn ha yi ọsali rẹji mhan bi ibha bi imọn nesẹmhan nin mhan ha biẹ, ghe, mhan dẹ ha re izọese nan tuẹ a, izọese ọsi ọfure, bi izọese nekẹle nesẹmhan bhi odalo iJehova rẹ re oga ji ọle, beji a ha da miẹn ghe, imọn nesẹbha ida taman imọn nesẹmhan bhi ẹghe odalo yọle: “Bha imhọn uku bhi obọ iJehova.”’ 28 Bhiriọ mhan da yọle, ‘Ahamiẹn ele ta iriọ man mhan bi imọn nesẹmhan bhi ẹghe odalo, mhan ki taman ele yọle: “Ghe arẹkhọkhọ ọsi ukhuo-izọese nọnsi Jehova nin aba mhan odede manlẹn, ọ iyi nan rẹ ha lu izọese nan tuẹ a la izọese nekẹle, sokpan nọn ha yi ọsali rẹji mhan bi ibha.”’ 29 Emhin nọn ida sabọ sunu nọn nin mhan rẹ sọtẹ da iJehova yẹ zobọ bhọ rẹ ha rẹkhan iJehova ẹlẹnan, rẹ sẹbhọ ghe mhan ki bọn ukhuo-izọese ọbhebhe rẹ ha lu izọese nan tuẹ a, izọese ọsi ebale, bi izọese ọsi ọfure, rẹ gbera ukhuo-izọese ọsi Jehova nin Osẹnobulua nọnsẹmhan nọn ribhi ibọkpọ ọsi oga nọnsọle!” 30 Ẹghe nin Phin′e·has nin ohẹn, ene ekhaẹmhọn ọsi ibhokhan Izrẹl, bi ediọn bhi egbe itue uli ọsi ibhokhan Izrẹl ki rẹ họn ene ọta nin imọn nesi Reu′ben, Gad, bi Ma·nas′seh tale, ọ da wo yẹẹ ele.