Malachi

3 “Ghe ọle! Mhẹn dẹ je ukọ nọnsẹmhẹn, ọle dẹ hẹnhẹn uwedẹ khẹ mhẹn. Ebeanlẹn ọsi ẹmhọanta nin uwẹ guanọ ki re ọsi iguaguako vae bhi uwa oga nọnsọle; ọne ukọ ọsi akovẹn ki vae, ọne ukọ nin bha hoẹmhọn ọlẹn. Ghe ọle! Ọle dẹ gene vae,” iriọ iJehova nọn nyan eyokulo tale. 6 “Imẹn hi Jehova; Imẹn ifidenọ. Ibha hi imọn nesi Jacob; ibha bha sẹ fuẹn an fo. 7 Rẹ nanbhi ẹghe osi aba bha odede ha vade, ibha da fikeke gbe adia neṣemhẹn, ibha bha yẹ ha rẹkhan ele. Fikie bu mẹn re, imẹn ki yẹ fikie bu bha re,” iriọ iJehova nọn nyan eyokhọnlẹn ta. Ọkpakinọn, ibha da yọle: “Be bhọ mhan ha rẹ fikie bu uwẹ re yẹ?” 10 Bha ne ene obọ-ọkpa-bhi-igbe rebhe na bhi uwa nan da ne emhin ya, nin ebale ha ribhi uwa nọnsẹmhẹn; Huẹan, bha dọnmhẹn imẹn fẹghe bhi ọne ẹmhọn nan, si imẹn ida tuje okhun an biri erọnmhọn nyan bha rẹ sẹbhọ ghe, bha ida yẹ ha guanọ emhin soso.” Iriọ Jehova nọn nyan ene eyokulo tale. 16 Ẹghenin, ene mun ofẹn iJehova da ha nin ọdeọde bhi ẹwẹ ibo ele talọ, Jehova da gbehọkotọ ha ka ele ehọ. Bhi alo Ọle, a da ha gbẹn ebe ayere nin ẹbho ne mun ofẹn iJehova bi ene ria eria nyan elin nọnsọle. 17 Jehova nọn nyan eyokhọnlẹn yọle: “Ele ki ha yi ọsẹmhẹn, bhi ọne ukpẹdẹ nin, nin mẹn ha rẹ man emhin kpataki nọnsẹmhen. Mhẹn ki mhọn itohan da ele, beji okpea rẹ mhọn itohan da ọmọn okpea nọnsọle nọn wo ha ga ọle. 18 Bha ki sẹyẹ dọ daghe ikẹkẹ nọn ribhi ẹwẹ ọria nọn khiale bi ọria nọn imhẹn, ọria nọn wo ha ga Osẹnobulua bi ọria nọn iga ọle.”