Zechariah

4 Ọne ẹhi nọn ha ne imẹn talọ da kie vae, yẹ dọ riọ mẹn bhi owe beji a rẹ riọ ọria nọn wẹ bhi owe. 2 Bhiriọ, ọle da taman mẹn yọle: “Be uwẹ daghe?” Mẹn da taman ọlẹn yọle: “Mẹn daghe emhin nan mun orukpa nyan nan re igolu rẹ lu, nin ukpamanku ribhi okhun ọlẹn. Orukpa ihinlọn da ha ribhi ọne emhin nan mun orukpa nyan, ehe, ihinlọn. Sẹyẹ, ene orukpa ne ribhi okhun ọlẹn da ha mhọn uhio ihinlọn. 3 Sẹyẹ, eran olivi eva da sikẹ ọle. Ọkpa da ha ribhi obera ọsi ọne ukpamanku, ọnọnkẹle da ha ribhi obọ agobọ.” 4 Bhiriọ, mẹn da nọọn ọne ẹhi nọn ne imẹn ha talọ yọle: “Be a re ene emhin nan ta, ebeanlẹn mẹn?” 6 Ọle ki da taman mẹn yọle: “Ọnan hi ebi Jehova taman iZerubbabel: ‘“Ọ iyi ahu da lu ọle, la ene eyokulo, sokpan, ẹlinmhin nọnsẹmhẹn da lu ọle.” Iriọ Jehova nọn nyan ene eyokulo tale. 7 Họla uwẹ khin, Eo oke nọn khua? Bhi obọ iZerubbabel uwe dẹ kiẹn otọ khọnkhan. Ọle dẹ re udo nọn ke okhun nẹ dagbare, a ki so nanlẹn yọle: “Emhin ọhan-ilo! Emhin ọhan-ilo!”” 8 Mẹn da kie họn ọta nọnsi Jehova nọn yọle: 9 “Ze·rubʹba·bel lu ayotọ ọsi ọne uwa nan, sẹyẹ, ọle hi ọnọn da bọn ọne uwa fo. Uwẹ ki yẹ dọ lẹn ghe Jehova nọn nyan ene eyokulo je mẹn bu bha. 10 Họla sẹ re ẹlo gbe ẹghe nin emhin rẹ fẹkẹ munhẹn an? Ele dẹ ha ghọnghọn ẹghe nin ele ha rẹ daghe ukpiri nan rẹ maan emhin bhi obọ ọsi Ze·rubʹba·bel. Ene ihinlọn nan hi ẹlo nesi Jehova, ne nẹga ọne otọ nan rebhe. 12 Mẹn da nọọn ọlẹn ọsi ugba-ọzeva yọle: “Be bhọ ene ikpabọ ọsi ene eran olivi veva mundia nan, nin abhili nọn mhọn alo ọsi igolu da ha dagbare rẹ na emhin eva nan re igolu rẹ lu?” 14 Ọle da yọle: “Enan hi enanzẹle eva ne mundia sikẹ Ebeanlẹn ọsi ọne otọ nan rebhe.”