Leviticus

10 Akizẹbue, Naʹdab bi A·biʹhu nin imọn-ikpea nesi Aaron da mun ebi a rẹ gua eranlẹn nọnsele yẹ fie eranlẹn ọbhọ. Ele da yẹ ne incense ọbhọ. Bhiriọ, ele da munhẹn ha fie eranlẹn nan bha je ele ji Jehova, emhin nin ọle bha je ele nin ele lu. 2 Bhiriọ, eranlẹn da na obọ iJehova vae yẹ fuẹn ele a, ele da yu bhi odalo iJehova. 4 Bhiriọ Moses da tie iMishʹa·el bi El·zaʹphan, nin imọn-ikpea nesi Uzʹzi·el nin obhio aba Aaron. Ọle da taman ele yọle: “Bha vae, bha dọ mun ibhio bha sibhi odalo eje khiale re, yẹ mun ele sibhi ọne agọ nan re.” 5 Bhiriọ, ele da vae yẹ mun ene ikpea bi ukpọn nin ele mun yọ sibhi ọne agọ re, beji Moses taman ele. 6 Bhiriọ Moses da taman Aaron bi imọn-ikpea nesọle nekẹle nin El·e·aʹzar bi Ithʹa·mar yọle: “Bha hẹi ji eto nọnsẹbha zagha a bhi uhọnmhọn la vinọn ukpọn nọnsẹbha a, nin bha hẹi yu, bi nin Osẹnobulua hẹi dọ ha khọẹkẹ ọne agbaẹbho rebhe. Ibhio bha nin ibhokhan Izrẹl dẹ ha viẹ ranmhude ẹbho nin Jehova re eranlẹn fuẹn an. 7 Bha hẹi dagbare gbera odẹ nan na nabhi ọne ibọkpọ ọsi oga. Bha ha dagbare, bha ki yu, ranmhude abhii nin Jehova rẹ zẹ ibha re ibha bhi uhọnmhọn.” Bhiriọ ele da lu beji Moses taman ele. 8 Bhiriọ Jehova da taman Aaron yọle: 9 “Hẹi da anyọn la anyọn nekẹle ne mun ọria, uwẹ bi imọn-ikpea nesẹ, sade bha vae bhi ibọkpọ ọsi oga, nin bha hẹi yu. Ore nọnsẹbha rebhe dẹ ha re obọ rẹkhan ọne uhi nan. 10 Ọnan dẹ rẹ ibha lẹn ikikẹ bhi ẹwẹ emhin nọn khiale bi emhin nọn bha khia, bi bhi ẹwẹ emhin nọn gbitọn an bi emhin nọn bha gbitọn. 11 A dẹ yẹ re ọle man ibhokhan Izrẹl ene uhi rebhe nin Jehova nabhi obọ iMoses gbe nin ele.”