Exodus

8 Jehova da ki taman iMoses yọle: “Bu iPharʹaoh, uwẹ ha taman ọlẹn yọle, ‘Ọnan hi ebi Jehova tale: “Ji ẹbho nesẹmhẹn da kpanọ, nin ele dọ ga mẹn. 2 Ahamiẹn uwẹ bha ji ele da kpanọ, mẹn ki re akilẹ gba ọne otọ nọnsẹ nan rebhe. 3 Ene akilẹ dẹ ha vẹ bhi ẹkẹ ẹdẹ iNile. Ele dẹ dagbare yẹ nabhi uwa nọnsẹ, ugha nin uwẹ da wẹ, uke ibẹdi nọnsẹ, bi uwa ọsi eguọmhandia nesẹ bi ẹbho nesẹ. Ele ki na bhi eji bha da nyẹn ebale, bi uro nin bha rẹ fuẹn ebi a rẹ lu brẹdi. 4 Ene akilẹ dẹ vẹ nyan uwẹ, ẹbho nesẹ, bi eguọmhandia nesẹ rebhe.”’” 5 Jehova da ki taman iMoses: “Taman Aaron yọle, ‘Niẹn ukpokpo nọn ri uwẹ bhi obọ da ene ẹdẹ, eje kẹkẹ nin amẹn nọn ribhi Ẹdẹ iNile nẹ diọ, bi ene ọghọdọ, nin akilẹ vẹ dagbare dọ gba otọ Egypt.’” 6 Bhiriọ, Aaron da niẹn obọ a da amẹn ne ribhi otọ Egypt, ene akilẹ da vẹ dagbare yẹ vuọn otọ Egypt. 7 Ọkpakinọn, ene ohẹn ne lu emhin idunan da re ilọnmhọn ikpẹbo nọnsele rẹ lu ọle. Ele da yẹ lu ọle nin ene akilẹ vẹ dagbare yẹ vuọn otọ Egypt. 8 Pharʹaoh da ki tie iMoses bi Aaron yẹ taman ele yọle: “Bha bhii Jehova nin ọle ne ene akilẹ nan sibhi eji mẹn bi ẹbho nesẹmhẹn ye re, ranmhude, mẹn muegbe nin mẹn rẹ ji ene ẹbho kpanọ, nin ele dọ zọese ji Jehova.” 9 Moses da ki taman iPharʹaoh yọle: “Mẹn mun ọne ekpẹn nin uwẹ, nin uwẹ rẹ taman mẹn ukpẹdẹ nin mẹn ha bhii, nin ene akile sibhi eji uwẹ, eguọmhandia nesẹ, bi ẹbho nesẹ ye re, yẹ sibhi uwa nesẹbha re. Ẹdẹ iNile ọkpa ene akile ha da kẹre.” 10 Pharʹaoh da ki wanniẹn ọlẹn yọle: “Akhọ.” Ọle da ki taman ọlẹn yọle: “Ọ dẹ sunu beji uwẹ rẹ tale, nin uwẹ da lẹn ghe ọria ọbhebhe iribhọ nọn diabe iJehova nin Osẹnobulua nọnsẹmhan. 11 Ene akilẹ dẹ sibhi eji uwe, eguọmhandia nesẹ, bi ẹbho nesẹ ye re, yẹ sibhi uwa nesẹbha re. Ẹdẹ iNile ọkpa ele ha da kẹre.” 12 Moses bi Aaron da ki sibhi eji Pharʹaoh ye re. Moses da bhii Jehova ranmhude ene akilẹ nin Ọle rẹ re oya nin Pharʹaoh. 13 Jehova da họn ubhimhin nọnsi Moses, ene akilẹ ne ribhi uwa, ẹgodo, bi ẹwẹ da munhẹn ha yuno. 14 Ele da ha sino ene akilẹ koko. Eje rebhe bhi ọne otọ da ha ya. 15 Ẹghe nin Pharʹaoh ki rẹ kere ghe egbe fu ọle re, ọle da ji udu nọnsọle re zeze a, ọle bha yẹ ka ele ehọ, beji Jehova ka ta. 16 Jehova da ki taman iMoses: “Taman Aaron yọle, ‘Niẹn ukpokpo nọnsẹ a, uwẹ ha re ọle gbe ẹbubu nọn ribhi otọ. Ọne ẹbubu dẹ kiẹn ituntun bhi otọ Egypt rebhe.’” 17 Ele da lu iriọ. Aaron da niẹn ukpokpo nọnsọle a rẹ gbe ẹbubu nọn ribhi otọ, ene ituntun da vẹ nyan elanmhẹn bi eria. Ẹbubu rebhe nọn ribhi otọ da kiẹn ituntun bhi otọ Egypt rebhe. 18 Ene ohẹn ne lu emhin idunan da rẹ ha dọnmhegbe nin ele rẹ re ilọnmhọn ikpẹbo nọnsele rẹ lu ọle nin ituntun yẹ zegbere. Ọkpakinọn, ọ bha fo ele. Ene ituntun da vẹ nyan eria bi elanmhẹn. 19 Ene ohẹn ne lu emhin idunan da ki taman iPharʹaoh yọle: “Ukpobọ nọnsi Osẹnobulua khọnan!” Sokpan, ọkhọle nọnsi Pharʹaoh da sẹyẹ re zeze a, ọle bha ka ele ehọ, beji Jehova ka ta. 21 Sokpan, ahamiẹn uwẹ bha ji ẹbho nesẹmhẹn da kpanọ, mẹn dẹ je ikhiẹn ne le ọria, nin ele vẹ ru uwẹ, eguọmhandia nesẹ, ẹbho nesẹ bi uwa nesẹbha. Ene ikhiẹn dẹ vuọn uwa ọsi ibhokhan Egypt rebhe. Ene ikhiẹn bhọ dẹ gba otọ rebhe nin bha zẹ oẹ nyan. 25 Pharʹaoh da ki tie iMoses bi Aaron yẹ taman ele yọle: “Bha ha khian, bha dọ zọese ji Osẹnobulua nọnsẹbha bhi ọne otọ nan.” 26 Sokpan, Moses da yọle: “Ọ iyi emhin nọn gba nin mhan rẹ lu iriọ, ranmhude emhin nin mhan ha rẹ zọese ji Jehova nin Osẹnobulua nọnsẹmhan dẹ ha yi emhin nọn sọnọn ibhokhan Egypt. Ahamiẹn mhan re emhin nọn sọnọn ibhokhan Egypt rẹ zọese bhi isira ele, ele ida be ha fino udo gbe mhan? 27 Mhan dẹ khian okhian ọsi ikpẹdẹ ea diọ bhi ẹkẹ ẹgbo, enin mhan ha da zọese ji Jehova nin Osẹnobulua mhan, beji ọle taman mhan.”