Exodus
11 Jehova da ki taman iMoses yọle: 12 “Ẹghe nọn irẹ khin nin uwẹ ha rẹ ka imọn ikpea ọsi ibhokhan Izrẹl, ọdeọde bhi ẹwẹ ele ki zẹ emhin ji Jehova nin ele rẹ dẹ iẹnlẹn nọnsele kiere. Ele dẹ lu ọnan nan hẹi mun ọkakale gbe ele ẹghe nan ha rẹ ka ele. 13 Ọnan hi eka igho nin ẹbho nan kale ha zẹ: ukhiọnmhẹn ishekel nan noo bhi uwa oga. Geʹrah uje, ọle ribhi ishekel ọkpa. Ukhiọnmhẹn ishekel bha ha zẹ ji Jehova. 14 Ọrebhe ne ribhi ikpe 20 rẹ ha khian okhun bhi ẹwẹ ẹbho nan kale, ele ha zẹ igho ji Jehova. 15 Ọria nọn fele ida zẹ gbera ukhiọnmhẹn ishekel, obhioguele ida yẹ zẹ eka nọn bha sẹbhi ukhiọnmhẹn ishekel ji Jehova, nin ele rẹ zọese rẹ dẹ iẹnlẹn nọnsele kiere. 16 Uwẹ ki miẹn ibhokhan Izrẹl ọne igho isiliva nin ele rẹ dẹ iẹnlẹn nọnsele kiere, yẹ re ọne igho re nan rẹ ha lu ilọnmhọn oga bhi ibọkpọ ọsi oga. Ọnan ki ha yi ayere bhi odalo iJehova rẹji ibhokhan Izrẹl, nin bha rẹ dẹ iẹnlẹn nọnsẹbha kiere.” 17 Jehova da yẹ taman Moses, yọle: 18 “Re oze rẹ lu etasa bi ebi a ha mun ọlẹn nyan; uwẹ ha sa amẹn ọbhọ yẹ mun ọlẹn ọbhi adesẹ ibọkpọ ọsi oga bi ukhuo izọẹse. 19 Aaron bi imọn nesọle dẹ ha kpe obọ bi oẹ bhi enin. 31 “Uwẹ ki taman ibhokhan Izrẹl yọle: Ọne abhii nan dẹ ha yi abhii nọn khiale rẹji mẹn bhi ore nọnsẹbha rebhe. 32 Ọ iyi abhii nin ọria ha rẹ ha gbo egbe. Sẹyẹ, ọria soso hẹi re emhin nan rẹ lu ọne abhii nan rẹ lu abhii nọn diabe ọle. Emhin nọn khiale ọne abhii khin. Emhin nọn khiale ọ da ha khin rẹji bha. 33 Ọria nọn ki rẹ khin nọn lu abhii nọn diabe ọle, yẹ biri ọle ọbhi uhọnmhọn ọsi ọria nan bha zẹ, a dẹ hian ọne ọria fia bhi ẹwẹ ẹbho nesọle.’” 34 Jehova da ki taman iMoses yọle: Ne abọkpa ọsi ene emhin nan ne vin-ohin: stacte, onycha, galbanum nọn vin-ohin, bi frankincense nan bha re emhin soso gua. 35 Re ọle lu emhin nọn vin-ohin. Nọ ene emhin rebhe kugbe nọnsẹn, yẹ re umhẹn ọbhọ. A ida re emhin soso gua ọle. Ọ ki ha yi emhin nọn khiale. 36 Uwẹ ki lunmhun eso bhọ, nọn manman sun, yẹ ne bhọ fiọbhi odalo Ẹkpẹti Akovẹn bhi ibọkpọ ọsi oga, bhi eji mẹn ha da re egbe man uwẹ. Ọ dẹ ha yi emhin nọn khiale rẹji bha. 38 Ọria nọn ki rẹ khin nọn lu emhin nọn vin-ohin nọn diabe ọle, nin ọle rẹ ha sọnyẹnmhẹn, a dẹ hian ọne ọria fia bhi ẹwẹ ẹbho nesọle.”