Genesis

32 Jacob da ha khian okhian nọnsọle. Ẹhi nesi Osẹnobulua da ka ọle re bhi uwedẹ. 2 Ẹghe nin Jacob wo rẹ daghe ele, ọle da yọle: “Agọ nọnsi Osẹnobulua khọnan!” Bhiriọ, ọle da tie enin Ma·ha·naʹim. 3 Jacob da ki je ukọ bu Eʹsau nin obhio ọle bhi agbaẹbho ọsi Seʹir, bhi otọ Eʹdom, 4 yẹ taman ele yọle: “Ghe ebi bha ha taman Eʹsau nin ebeanlẹn mẹn, ‘Ọnan hi ebi Jacob nin ọguọmhandia nọnsẹ tale: “Laʹban mẹn deba ha nyẹnlẹn rẹ sẹbhi ọne ẹghe nan. 5 Mẹn ki mhọn ẹmena, ekẹtẹkẹtẹ, ihuan, eguọmhandia nin ikhuo bi eguọmhandia nin ikpea. Mẹn da je uhọnmhọn ji uwẹ nin ebeanlẹn mẹn nin mẹn rẹ taman uwẹ, beji uwẹ ha da sabọ re ẹlo esili ghe mẹn.”’” 6 Ẹghe eso ki gbera, ene ukọ da fikie bu Jacob. Ele da taman ọlẹn yọle: “Imhan miẹn Eʹsau nin obhio ẹ. Ejayenan nian, ọle bu uwẹ vade, sẹyẹ, ikpea 400 rẹkhan ọlẹn vade.” 7 Ofẹn da wo ha mun iJacob. Ọle da yẹ ha kpokpo egbe. Bhiriọ, ọle da waa ẹbho ne rẹkhan ọlẹn, emhin-uri nesọle, ene ẹmena bi ene icamel ọbhi usun eva. 8 Ọle da yọle: “Ahamiẹn Eʹsau fuẹn usun ọkpa a, ene ribhi usun nọnkẹle ki sabọ nẹgbe.” 9 Jacob ki lu ọnan fo, ọle da yọle: “Ọsẹnobulua ọsi Abraham nin aba mẹn, Osẹnobulua ọsi Isaac nin aba mẹn, Eo Jehova, uwẹ hi ọnọn taman mẹn yọle, ‘Fikie diọ bhi agbaẹbho nọnsẹ, yẹ fikie bu ibhio uwẹ. Mẹn dẹ lu uwẹ nọnsẹn.’ 10 Họla mẹn khin nin uwẹ da mhọn ahoẹmhọn-egbe nọn ibeghe bi asun-rẹkhan nọn sẹnian da oguọmhandia nọnsẹ? Ukpokpo nọnsẹmhẹn ọkpa mẹn re mhọn rẹ fan ọne ẹdẹ iJordan nan ra. Ejayenan nian, mẹn kiẹn usun eva. 11 Huean, hinmhin mẹn bhi obọ iEsau nin obhio mẹn. Ofẹn mun mẹn ghe ọle dẹ mun okhọn bu mẹn, ikhuo mẹn bi imọn ne sẹle. 12 Uwẹ yọle ghe: ‘Mẹn dẹ lu uwẹ nọnsẹn, mẹn dẹ lu ọle nin imọn nesẹ bun sẹ bii ekẹn nan isabọ ka ne ribhi okpẹdẹ.’” 13 Ọle da gbe ẹdẹwe bhi enin. Ọle da ne eso bhi emhin nesọle nin ọle rẹ lu ẹsele nin Isọ nin obhio ọle: 14 Ẹbhe amhẹn 200, obhukhọ 20, oghogho 200, oghohuan 20, 15 camel 30 ne la biẹ, ẹmena amhẹn 40, ogho-ẹmena 10, ekẹtẹkẹtẹ amhẹn 20 bi ogho-ekẹtẹkẹtẹ 10 ne wanre fo. 16 Ọle da ne nin eguọmhandia nesọle. Ọle da mhanmhan ele ọbhi usun, nin usun ọkpa rẹkhan ọnọnkẹle. Ọle da yẹ taman ene eguọmhandia yọle: “Bha fan ra, bha ha kalo nin mẹn, bha ha yẹ ji ẹho ha ribhi adesẹ usun ọkpa bi ọnọn rẹkhan ọlẹn.” 17 Ọle da yẹ taman ọguọmhandia nin ọhẹnhẹn yọle: “Ahamiẹn Isọ nin obhio mẹn bu uwẹ re nọn da nọọn uwẹ yọle, ‘Họla nyan uwẹ, ejela uwẹ khian, họla nyan emhin-uri ne ribhi ọdalo uwẹ?’ 18 uwẹ ki taman ọlẹn yọle, ‘Jekọp nin ọguọmhandia nọnsẹ nyan ele. Ẹsele nin ọle yọle nan mun nin Isọ nin ebeanlẹn ọlẹn nọn. Ọle tobọle bhọ vade bhi ikeke mhan.’” 19 Ọle da yẹ taman ọne ọzeva, ọne ọzea, bi ene eguọmhandia rebhe ne ha re ene usun kẹkẹ khian yọle: “Ọnan hi emhin nin bha ha taman Isọ sade ibha miẹn ọlẹn. 20 Bha ki yẹ taman ọlẹn yọle, ‘Jekọp nin ọguọmhandia nọnsẹ vade bhi ikeke mhan’” Ọle da yẹ taman ọguọmhandia nọn hẹnhẹn yọle: ‘Mẹn ha ka mun ọne ẹsele nan ji ọle, nin ẹkẹ fu ọle re, asabọmiẹn ọle dẹ miẹn mẹn ọbhi egbe nọnsẹn sade mẹn ki miẹn ọlẹn.’ 21 Bhiriọ, ọle da je ọne ẹsele kalo, ọkpakinọn, ọle tobọle da gbe ẹdẹwe bhi ọne agọ. 24 Ọkike ọle, ọ da kẹ iJacob ọkpa. Ẹghenin, okpea ọkpa da vae dọ ha ne ọlẹn dan rẹ sẹbhi ẹghe nin ẹdẹ rẹ we. 25 Ẹghe nin ọne okpea ki rẹ kere ghe obọ nọnsọle bha ke okhun nẹ, ọle da re obọ so ako-uguẹ nọn ri Jacob bhi akun; uguẹ nọn ri ọle bhi akun da sibhi ako re ẹghe nin ele rẹ ha dan. 26 Ọle ki lu ọnan fo, ọle da yọle: “Ji mẹn da ha khian, ranmhude ẹdẹ khian we.” Ọle da ki wanniẹn ọlẹn yọle: “Mẹn ida zẹ uwẹ obọ sade uwẹ bha nan erọnmhọn nin mẹn.” 27 Bhiriọ, ọle da nọọn ọlẹn yọle: “Be a tie uwẹ?” Ọle da wanniẹn ọlẹn yọle: “Jacob.” 28 Ọle da ki taman ọlẹn yọle: “A ida yẹ ha tie uwẹ Jacob. Izrẹl ki da ha yi elin ẹn, ranmhude uwẹ ne Osẹnobulua bi eria dan sẹyẹ khọn miotọ.”