Genesis

27 Beji ene imọn ki ha wanre, Eʹsau da kiẹn ohuẹ, nọn gbe elanmhẹn khian bhi ẹwẹ. Sokpan, Jacob da ha yi okpea nọn bha lẹn-ọkpa-lẹn-eva, nọn fẹkẹ nyẹnlẹn bhi ibọkpọ. 28 Isaac da wo hoẹmhọn Eʹsau, ranmhude elanmhẹn nin ọle gbe nanlẹn le. Ọkpakinọn, Re·bekʹah da wo hoẹmhọn iJacob. 29 Ẹdẹ ọkpa nin Jacob ha nyẹn owo, Eʹsau da na bhi ẹwẹ vae. Ohanmhẹn da manman ha gbe ọle. 30 Bhiriọ, Eʹsau da taman iJacob yọle: “Huẹan, jẹje sa bhi ọne owo nọn gian nin uwẹ nyẹn nin mẹn, ranmhude ohanmhẹn gbe imẹn!” Ọnan zẹle nin elin ọlẹn da ha yi Eʹdom. 31 Jacob da taman ọlẹn yọle: “Sẹ ka khiẹn ihe nin uwẹ ye bọsi ọmọn ọdiọn nin mẹn!” 32 Eʹsau da yọle: “Mẹn bhọ khian yu! Be bhọ mẹn da re ihe ọsi ọmọn ọdiọn lu?” 33 Jacob da taman ọlen yọle: “Ve ihẹn ọbhọ!” Bhiriọ, ọle da ve ihẹn ọbhọ yẹ khiẹn ihe nin ọle ye bọsi ọmọn ọdiọn nin Jacob. 34 Jacob da sa owo nin Eʹsau yẹ re ibrẹdi nanlẹn. Ọle da le ọle yẹ wọn amẹn ọbhọ. Olẹ da kpanọ ha khian. Eʹsau bha ghe ihe nin ọle ye bọsi ọmọn ọdiọn sẹ emhin soso.