Genesis

24 Abraham ki wo dọmanlẹn, ọle ki wo manman wanre. Jehova wo nan erọnmhọn nin Abraham bhi emhin rebhe. 2 Abraham da taman ọguọmhandia nọnsọle, nọn wanre nẹ bhi ẹwẹ eguọmhandia nesọle, nọn yẹ gbẹloghe emhin rebhe nin ọle mhọnlẹn yọle: “Huẹan, re obọ nọnsẹ ọbhi odotọ etagha nọnsẹmhẹn. 3 Mẹn guanọ nin uwẹ re iJehova ve ihẹn, Osẹnobulua nọn man otọ bi okhun, ghe uwẹ ida re okhuo nin ọmọn nọnsẹmhẹn bhi agbaẹbho nọnsi Caʹnaan, ọne agbaẹbho nan nin mẹn da nyẹnlẹn. 4 Sokpan, uwẹ dẹ kpanọ ha khian agbaẹbho nọnsẹmhẹn yẹ bu ẹgbẹ-uwa nọnsẹmhẹn dọ re okhuo nin Isaac nin ọmọn nọnsẹmhẹn.” 5 Ọkpakinọn, ọne ọguọmhandia da nọọn ọlẹn yọle: “Ahamiẹn ghe ọne okhuo bha muegbe nin ọle rẹ rẹkhan mẹn vae bhi ọne agbaẹbho nan kii? Nin mẹn be re ọmọn nọnsi uwẹ fikie diọ bhi ọne agbaẹbho nin uwẹ na vae?” 6 Abraham da wanniẹn ọlẹn yọle: “Hẹi dọnmhẹn ọlẹn nin uwẹ rẹ re ọmọn nọnsẹmhẹn ha khian enin. 7 Jehova nin Osẹnobulua nọn man okhun, nọn re imẹn sibhi uwa nọnsi aba mẹn bi otọ ọsi ibhio mẹn re, nọn yẹ ne mẹn talọ yẹ ve nin mẹn yọle: ‘Mẹn dẹ re ọne otọ nan nin ọmọn nọnsẹ,’ dẹ je ẹhi nọnsọle kalo nin uwẹ. Uwẹ dẹ gene na bhi enin re okhuo ji ọmọn nọnsẹmhen. 8 Sokpan, ahamiẹn ghe ọne okhuo bha ka rẹkhan uwẹ, uwẹ ki miẹn uhọnmhọn bhi ọne ihẹn nan. Ọkpakinọn, hẹi re ọmọn nọnsẹmhẹn ha khian enin.” 9 Ọne ọguọmhandia da re obọ nọnsọle ọbhi odotọ etagha ọsi Abraham nin ebeanlẹn ọlẹn. Ọle da yẹ ve ihẹn ọbhi ọne ẹmhọn nan. 10 Bhiriọ, ọne ọguọmhandia da ne camel igbe ọsi ebeanlẹn ọlẹn. Ọle da kpanọ ha khian. Ọle da yẹ ne emhin kẹkẹ ne mhẹn bhi obọ ebeanlẹn ọlẹn rẹkhan egbe. Ọle da ha khian agbaẹbho ọsi Naʹhor, bhi otọ iMes·o·po·taʹmi·a. 11 Ọle ki sẹbhi isi omin nọn ribhi egbegbe ọne agbaẹbho, ọle da mundia nin ene icamel koahua. 12 Ọle da yọle: “Jehova, Osẹnobulua ọsi ebeanlẹn mẹn nin Abraham, wowo, ji ọne okhian nan de odẹ re nin mẹn bhi ọne ukpẹdẹ nan, uwẹ ha yẹ re ahoẹmhọn-egbe nọn ibeghe man ebeanlẹn mẹn nin Abraham. 13 Ejayenan, mẹn mundia bhi egbe omin, sẹyẹ, imanmhẹn ne ribhi ọne agbaẹbho nan dagbare dọ ha sa amen. 14 Ji a miẹn ghe ọne ọmanmhẹn nin mẹn ha taman yọle, ‘Huẹan, mun akhe nọnsẹ sotọ uwẹ ha sa amẹn nin mẹn wọn,’ nọn da wanniẹn mẹn yọle, ‘Miẹn amẹn nin uwẹ wọn, mẹn dẹ yẹ sa amẹn nin camel nesẹ wọn,’ ha yi okhuo nin uwẹ zẹ nin Isaac nin ọguọmhandia nọnsẹ. Ji mẹn re ọnan lẹn ghe uwẹ re ahoẹmhọn-egbe nọn ibeghe man ebeanlẹn mẹn.” 15 Ọle kuẹ talọ fo, Re·bekʹah, nin ọmọn okhuo nọnsi Be·thuʹel nin ọmọn okpea nonsi Milʹcah nin okhuo iNaʹhor, nin obhio Abraham, da mun akhe ọbhi ijianbọ dagbare. 16 Ọne ọmanmhẹn wo manman ha mhọn-ose, ọle bha sẹ hẹgẹn; okpea soso bha sẹ nanlẹn nowẹ. Ọle da khian diọ bhi isi ọne omin dọ sa amẹn vuọn akhe nọnsọle, yẹ fikie vae. 17 Ọne ọguọmhandia da jẹje runẹ bu ọle yẹ taman ọlẹn yọle: “Wowo, sa obhi amẹn khere nin mẹn wọn bhi akhe nọnsẹ” 18 Ọle da yọle: “Ebeanlẹn mẹn, miẹn amẹn nin uwẹ wọn.” Ọle da jẹje mun ọne akhe sotọ yẹ sa amẹn nanlẹn wọn. 19 Ẹghe nin ọle ki rẹ sa amẹn nanlẹn wọn fo, ọle da taman ọlẹn yọle: “Mẹn dẹ yẹ sa amẹn nin camel nesẹ wọn sẹbhi ọkhọnlẹn.” 20 Bhiriọ, ọle da jẹje biri amẹn nọn ribhi akhe nọnsọle ọbhi eji elanmhẹn da wọn amẹn. Ọle da jẹje ha runẹ yo isi ọne omin yẹ dọ ha sa amẹn re. Ọle da ha sa amẹn re nin ene icamel rebhe ha wọn. 21 Ẹghe nin ene emhin nan rebhe rẹ ha sunu, ọne okpea da nyan unun an ha ghe ọne ọmanmhẹn, ọle da ha riale si Jehova re okhian nọnsọle de odẹ re. 39 Sokpan, mẹn da nọọn ebeanlẹn mẹn yọle: ‘Ahamiẹn ghe ọne okhuo bha muegbe nin ọle rẹ rẹkhan mẹn kii?’ 57 Bhiriọ, ele da yọle: “Bha ji mhan tie ọne ọmanmhẹn nin mhan nọọn ọlẹn.” 58 Ele da tatie iRe·bekʹah yẹ nọọn ọlẹn yọle: “Uwẹ dẹ rẹkhan ọne okpea nan ha khian?” Ọle da wanniẹn ele yọle: “Mẹn muegbe nin mẹn rẹ ha khian.” 60 Ele da nan erọnmhọn nin Rebeka yẹ taman ọlẹn yọle: “Obhio mhan, imọn nesẹ dẹ manman bunbun, sẹyẹ imọn nesẹ dẹ miẹn ighian ele agbaẹbho nọnsọle.” 65 Ọle da nọọn ọne ọguọmhandia yọle: “Họla hi ọne okpea nin nọn khian bu mhan vade?” Ọne ọguọmhandia da wanniẹn ọlẹn yọle: “Ebeanlẹn mẹn nọn.” Bhiriọ, ọle da re ugbanetọ rẹ gue uhọnmhọn nọnsọle. 67 Ọnan ki gbera, Aizik da re ọle nabhi ẹkẹ ibọkpọ nọnsi inẹn ọlẹn nin Sera. Ọle da re Rebeka kiẹn okhuo ọle. Ọle da wo dọ hoẹmhọn ọlẹn. Aizik da miẹn ikoudure bhi akhiẹ nin ọle ha ye ranmhude inẹn ọlẹn nọn yu.