Genesis

7 Akizẹbue, ẹhi nọnsi Jehova da miẹn ọlẹn bhi egbe ẹdẹ bhi ẹkẹ ẹgbo. Uwedẹ nan rẹkhan diọ bhi Shur, ọle ọne ẹdẹ ye. 8 Ọle da yọle: “Hagar nin ọguọmhandia nọnsi Sarai, ijela uwẹ na vade, ejela uwẹ khian?” Hagar da taman ọlẹn yọle: “Ebeanlẹn mẹn nin Sar′ai, ọle mẹn nẹ nan.” 9 Ẹhi nọnsi Jehova da taman ọlẹn yọle: “Fikie bu ebeanlẹn ẹn, uwẹ ha degbere nanlẹn.” 10 Ọne ẹhi da sẹyẹ yọle: “Mẹn dẹ re imọn nesẹ bun rẹ sẹbhọ ghe, a ida sabọ ha ka ele.” 11 Ẹhi nọnsi Jehova da yẹ taman ọlẹn yọle: “Uwẹ hanmhan. Ọmọn okpea, ọle uwẹ ha biẹ. Ishma·el, ọle hi elin nin uwẹ ha hẹ ọle le. Bhi ọsi ẹmhọanta, Jehova daghe ọbalọ nin uwẹ ye. 12 Ọle dẹ ha yi okpea ikẹtẹkẹtẹ ọsi ẹwẹ. Ọle dẹ ha yi oghian ọrebhe, sẹyẹ, ọrebhe ki he ọle. Ọle dẹ wo ha ne ibhio ọle rebhe suan. 13 Bhiriọ, ọle da tie elin nọnsi Jehova nọn ha nanlẹn talo. Ọle da yọle: “Osẹnobulua nọn sabọ daghe uwẹ khin. Ọnọn sabọ daghe mẹn, ọle imẹn be wo daghe bhi enan nian?”