Genesis
12 Jehova da taman Aʹbram yọle: “Kpanọ sibhi agbaẹbho nọnsẹ re, sibhi eji ibhio uwẹ ye re, uwẹ ha yẹ sibhi uwa nọnsi Aba ẹ re. Ha khian agbaẹbho nin mẹn ha rẹman uwẹ. 2 Imẹn dẹ re uwẹ kiẹn agbaẹbho nọn khua, mẹn ki nan erọnmhọn nin uwẹ, yẹ re elin nọnsẹ kiẹn okpelin. Uwẹ ki kiẹn erọnmhọn rẹji ẹbho ne bunbun. 3 Mẹn dẹ nan erọnmhọn nin ẹbho ne nan erọnmhọn nin uwẹ, yẹ ghunmhun ẹbho ne ghunmhun uwẹ. Sẹyẹ, rẹ na bhi obọ nọnsẹ, ọle azagba-uwa rebhe bhi ọne otọ ha da miẹn erọnmhọn.” 4 Bhiriọ, Aʹbram da gene kpanọ beji Jehova taman ọlẹn. Lot da yẹ rẹkhan ọlẹn. Ikpe 75 Aʹbram ha khin beji ọle sibhi Haʹran re. 5 Aʹbram da re Sarʹai nin okhuo ọle, bi Lot nin ọmọn nọnsi obhio ọle rẹkhan egbe. Ọle da yẹ ne emhin rebhe bi eguọmhandia rebhe nin ele ki dọ ha mhọn bhi Haran rẹkhan egbe. Ele da kpanọ ha khian otọ iCaʹnaan. Ẹghe nin ele ki rẹ sẹbhi otọ iCaʹnaan, 6 Aʹbram da khian nẹga ọne otọ rẹ dọ sẹbhi Sheʹchem, bhi egbegbe eran ne khua ọsi Moʹreh. Bhi ọne ẹghe nin, ibhokhan iCaʹnaan ribhi ọne otọ. 7 Jehova da re egbe man Aʹbram yẹ taman ọlẹn yọle: “Ọmọn nọnsẹ imẹn da re ọne oto nan nan.” Bhiriọ, ọle da bọn ukhuo-izọese bhi enin ji Jehova nọn re egbe man ọlẹn. 8 Akizẹbue, ọle da sibhi enin re ha khian otọ oke nọn ribhi obọ ọsi east ọsi Bethʹel yẹ mun agọ bhi enin. Bethʹel da ha ri ọle bhi obọ ọsi west, Aʹi da ha ri ọle bhi obọ oṣi east. Bhi enin, ọle da bọn ukhuo-izọese ji Jehova yẹ munhẹn ha tie elin nọnsi Jehova. 9 Akizẹbue, Aʹbram da sibhi enin re ha khian obọ ọsi Negʹeb, ọle da ha mun agọ khian bhi eje kẹkẹ. 10 Ejayenan, ukhunmhun da munhẹn ha fi bhi ọne agbaẹbho. Bhiriọ, Aʹbram da kpanọ ha khian otọ Egypt nin ọle dọ nyẹnlẹn bhi enin bhi ẹghe eso, ranmhude, ọne ukhunmhun nọn ha fi bhi ọne otọ kaka gbe. 11 Beji ọle ho nin ọle na bhi otọ Egypt, ọle da taman iSarʹai nin okhuo ọle yọle: “Huẹan, ka mẹn ehọ! Imẹn lẹn ghe okhuo nọn manman mhọn-ose uwẹ khin. 12 Bhiriọ, ibhokhan Egypt ha wo daghe uwẹ nian, ele ki wo yọle, ‘Okhuo ọle khọnan.’ Ele ki gbe mẹn an, sokpan, ele ki ji uwẹ da ha ribhọ. 13 Huẹan, yọle ghe obhio mẹn uwẹ khin, beji ọ ha da ha mhẹn nin mẹn ranmhude uwẹ, nin ele hẹi gbe mẹn an.” 14 Beji Aʹbram wo na bhi otọ Egypt, ibhokhan Egypt da daghe ọle ghe ọne okhuo manman mhọn-ose. 15 Ekhaẹmhọn nesi Pharʹaoh da yẹ daghe ọne okhuo, ele da wo dọ ha gẹn ọlẹn man iPharʹaoh. Bhiriọ, a da re ọne okhuo diọ bhi uwa nọnsi Pharʹaoh. 16 Pharʹaoh da wo ha lu Aʹbram nọnsẹn ranmhude ọne okhuo, bhiriọ, ọle da dọ ha mhọn ohuan, ẹmena, ekẹtẹkẹtẹ, eguọmhandia nin ikpea bi eguọmhandia nin ikhuo, bi camel. 17 Ẹghenin, Jehova da mun ọkakale nọn khua gbe iPharʹaoh bi azagba-uwa nọnsọle ranmhude Sarʹai nin okhuo Aʹbram. 18 Bhiriọ, Pharʹaoh da tie Aʹbram yẹ taman ọlẹn yọle: “Be ọnan khin nin uwẹ lu mẹn le? Bezẹle nin uwẹ bha da taman mẹn ghe okhuo uwẹ ọne okhuo khin? 19 Bezẹle nin uwẹ da yọle, ‘Obhio mẹn nọn,’ nin mẹn da rẹ ha guanọ nin mẹn re ọle kiẹn okhuo mẹn? Ghe okhuo ẹ. Re ọle, uwẹ ha kpanọ!” 20 Bhiriọ, Pharʹaoh da gbuhi nin ikpea nesọle rẹji Aʹbram. Ele da je ọle bi okhuo ọle bi emhin rebhe nin ọle mhọn kpanọ.