Kọrint Nin Ọhẹnhẹn

3 Ibhio, mẹn ida sabọ ne bha talọ bọsi eria nin ẹlinmhin nọnsi Osẹnobulua dia. Mẹn dẹ ne bha talọ bọsi eria ne ria eria bhi uwedẹ nin ọne agbọn nan rẹ ria eria, bọsi ọmobọ nọn bha lẹn eji a ye bhi oga. 2 Miliki mẹn rẹ nin bha wọn, ọ iyi ebale nọn zeze, ranmhude, ibha bha sẹ wanre sẹ. Ọ iyi ọsi ghe bha sẹyẹ wanre sẹ nian, 3 ranmhude bha sẹ yẹ ria eria bhi uwedẹ nin ọne agbọn nan rẹ ria eria. Beji a miẹn ghe, bha mhọn ikhu da egbe, sẹyẹ, ovan-ovan bha van, ọ ibe yi uwedẹ nin ọne agbọn nan rẹ lu emhin bha be rẹ ha lu emhin riọ? 4 Ahamiẹn eso yọle: “Ibo nọnsi Pọl mhan ye,” sẹyẹ, enekẹle yọle: “Ibọ nọnsi Apọlọs mhan ye,” ọ ibe yi uwedẹ nin ọne agbọn nan rẹ lu emhin bha yẹ rẹ ha lu emhin riọ?

5 Họla Apọlọs khin? Sẹyẹ, họla Pọl khin? Eguọmhandia mhan gheghe khin ne rẹkpa bha dọ lẹn Osẹnobulua, ẹsọn nin Ebeanlẹn mhan gha nin mhan, ọle mhan miẹn. 6 Imẹn hi ọnọn kọ ọne ikpẹ, Apọlọs hi ọnọn sa amẹn bhọ, ọkpakinọn, Osẹnobulua hi ọnọn wo re ọle ha wanre. 7 Ọ iyi ọria nọn kọ ikpẹ la ọnọn sa amẹn ọbhọ hi ọnọn lu uhọnmhọn emhin, Osẹnobulua nọn re ọle wanre, ọle hi ọnọn lu okpemhin. 8 Ọnọn kọ emhin bi ọnọn sa amẹn ọbhọ, ọkpa ele khin, a dẹ re ihaosa nin ọdeọde bhi ẹsọn nin ele miẹn. 9 Ene deba Osẹnobulua wẹnna mhan khin, inian bha diabe ugbo nin Osẹnobulua mun, bi uwa nin ọle fẹkẹ ha bọn.

10 Ranmhude ifuẹkẹ nọn khua nin Osẹnobulua mhọn da mẹn, mẹn da gbe ayotọ bọsi ọria nọn sabọ bọn uwa nọnsẹn. Ọkpakinọn ọria ebhebhe dọ ha bọn uwa bhi ọne ayotọ. Sokpan, ọkhẹke nin ọdeọde gbẹlokotọ bhi ebi ọle rẹ ha bọn uwa bhi ọne ayotọ yẹ. 11 Jesu, ọle hi ayotọ nin Osẹnobulua mun gbọ, bhiriọ, ọria ida sabọ dọ ha gbe ayotọ ọbhebhe. 12 Ọria sabọ rẹ noo igolu, isiliva, udo ne ghanlẹn, eran, ilunmhun, bi ikpilanmhẹn rẹ bọn uwa bhi uke ọne ayotọ, 13 ọkpakinọn, bhi ọkike ọle, a dẹ lẹn ebi ọdeọde rẹ bọn ọsọle yẹ. Ọne ukpẹdẹ nin dẹ re ọle man, eranlẹn dẹ re ọle man, eranlẹn ki rẹman ebi iwẹnna nin ọdeọde lu mhẹn sẹ yẹ. 14 Ahamiẹn uwa nin ọria bọn bhi uke ọne ayotọ yẹ mundia, a ki re ihaosa nanlẹn. 15 Ahamiẹn eranlẹn tuẹ iwẹnna nin ọria lu a, ọle ki re ẹlo miẹn emhin rebhe a. Ọle tobọle ha rẹ miuhọnmhọn, ọ ki diabe ọria nan hinmhin re sibhi eranlẹn re.

16 Ibha bha be lẹn ghe, uwa oga nọnsi Osẹnobulua bha khin, ghe, ẹlinmhin nọnsi Osẹnobulua ribhi egbe nọnsẹbha? 17 Ọria nọn hi ki rẹ khin nọn riia uwa oga nọnsi Osẹnobulua a, Osẹnobulua ki gbe ọle khuelo. Eje khiale uwa oga nọnsi Osẹnobulua khin, ibha hi ọne uwa oga.

18 Hẹi hiẹ egbe uwẹ: Ọria nọn hi ki rẹ khin nọn riale ghe ọle mhọn ẹwanlẹn bhi ọne agbọn nan, ji ọle kiẹn uhuki. Bhiriọ, ọle ki sabọ ha wanlan. 19 Emhin uhuki ẹwanlẹn ọsi ọne agbọn* nan khin rẹji Osẹnobulua. Beji Ebenọnkhiale tale, “Osẹnobulua ji ene wanlan da tobele hiẹ egbe ele.” 20 Ije ebhebhe bhi Ebenọnkhiale da yẹ yọle: “Jehova* lẹnmhin ghe, ihoho iria eria ọsi eria ne wanlan khin.” 21 Bhiriọ, ọria soso bhi ẹwẹ bha hẹi ha dẹgbọ ranmhude ebi eria sabọ lu. Ibha hi ene nyan emhin rebhe. 22 Ọ ha rẹ ha yi Pọl, Apọlọs, Sifas,* ọne agbọn nan, iẹnlẹn, uu, emhin ne ribhọ nian, la emhin ne ha vae bhi ẹghe odalo, ibha nyan ele rebhe, 23 Kristi da nyan bha, sẹyẹ, Osẹnobulua da nyan Kristi.