Ẹzaya
8 Jehova da taman imẹn yọle: “Re sleti* nọn kpọnọ, uwẹ ha yẹ re ukeke khọnkhan rẹ gbẹn ‘Maha-shala-hash-baz’* fiọbhọ. 2 Mẹn guanọ nin esali ọsaje re obọ ọbhọ ghe, ẹmhọanta ene ọta nin uwẹ gbẹn gene khin. Ene esali hi Uraya nin ohẹn bi Zẹkaraya nin ọmọn nọnsi Jebẹrakaya.”
3 Mẹn da ne okhuo mẹn nin akhasẹ nowẹ, bhiriọ, ọle da ha hanmhan. Akizẹbue, ọle da biẹ ọmokpia. Jehova da ki taman mẹn yọle: “Hẹ ọle Maha-shala-hash-baz. 4 Ọkuẹsẹ ọne ọmọn wanre sẹ ọnọn ha sabọ ha tie, ‘Baba!’ bi ‘Mama!’ ojie ọsi Asiria ki muno emhin ne ghanlẹn ọsi Damaskọs, bi afe ọsi Sameria kpanọ.”
5 Jehova da gbo kie taman mẹn yọle:
6 “Ranmhude ene ẹbho he amẹn ọsi Shailoa nọn fẹkẹ na,
Sẹyẹ, ele ghọnghọn ranmhude Rizin bi ọmọn nọnsi Rẹmalaya,
7 Ghọle! Jehova dẹ je ojie ọsi Asiria
Bi eyokhọnlẹn nesọle rebhe nin ele dọ khọn ele,
Ọle dẹ vae bọsi Ẹdẹ Yufretis nọn manman dinmhin, nọn yẹ manman nẹ,
Nọn nẹ gbera ughu nọnsọle,
Yẹ nẹ nabhi otọ khọnkhan.
8 Ọle dẹ nẹ diọbhi otọ ọsi Juda.
Ọle dẹ diabe ologho nọn khua nọn ha nẹ vuọn ọne agbaẹbho yẹ lọ ẹbho sẹbhi uru;
Bọsi afianmhẹn nọn tan igẹn an, ọle dẹ tan igẹn nọnsọle a sẹbhi ijerebhe bhi otọ nọnsẹ,
Eo Imanuẹ!”*
9 Bha dọ kuan ele, sokpan, a dẹ fuẹn bha a sẹsẹsẹ.
Bha kaehọ, ibha rebhe ne ribhi eje manman ree bhi otọ!
Bha muegbe okhọn, sokpan, a dẹ fuẹn bha a sẹsẹsẹ!
Bha muegbe okhọn, sokpan, a dẹ fuẹn bha a sẹsẹsẹ!
10 Bha mhanmhan ebi bha ha lu, sokpan, ọ i da kiọnlẹn!
Ibha ta ebe ghọn bha, sokpan, ọ i da munsẹ,
Ranmhude Osẹnobulua ne mhan dia!*
11 Ẹghe nin Jehova rẹ ne mẹn talọ, ọle da re ahu nọn khua nọnsọle nin mẹn. Ọle da taman mẹn ghe, nin mẹn hẹi lu rẹkhan uwedẹ ọsi ene ẹbho nan. Ọle da yọle:
12 “Ebi ene ẹbho nan tiọle olo, hẹi tiọle olo!
Ebi ele mun ofẹn ọlẹn, hẹi mun ofẹn ọlẹn;
Hẹi ji ọle ha re udu nọnsẹ lueghe.
13 Jehova nọn nyan ene eyokulo—ọle uwẹ ha tiọle Ọnọn khiale,
Ọle hi Ọne uwẹ ha mun ofẹn ọlẹn,
Sẹyẹ, ọle hi Ọnọn ha re udu nọnsẹ ha guọ.”
14 Ọle dẹ diabe uwa oga,
Sokpan, rẹji uwa ọsi Izrẹl veva,
Ọle ki diabe udo nọn dua ọria oẹ
Yẹ diabe udo nọn mun ọria gbe a.
Rẹji ene nyẹnlẹn bhi Jerusalẹm,
Ọle ki kiẹn ifi bi akube.
15 Ene bunbun bhi ẹwẹ ele dẹ dua oẹ, yẹ de dunmhun an;
A dẹ ke ifi khẹ ele rẹ mun ele.
16 Khi ọne ebe nin uwẹ gbẹn ọne uhọnmhunje ọi;
Uwẹ ha re emhin gbanọ ọne ebe nin ọne uhi ye, yẹ re nin edibo nesẹmhẹn!
17 Mẹn dẹ ha khẹ* Jehova nọn re ẹlo nọnsọle he nin uwa ọsi Jekọp. Sẹyẹ, mẹn dẹ ha khuaẹloghe ọle.
18 Ghọle! Bhi otọ Izrẹl, inian mẹn bi imọn nin Jehova ne nin mẹn diabe iyaman bi emhin ọhan-ilo nọn na obọ Jehova nọn nyan ene eyokulo vae, nọn nyẹnlẹn bhi Oke Ọsi Zaiyọn.
19 Ele ha taman bha yọle: “Bha bu ọbo la ene tare ebi odalo ha diayẹ, ne talọ fiẹnfiẹn bii afianmhẹn, ne yẹ ta emhin nan bha lẹn otọle, nin ele bọ nin bha,” bha dẹ be lu iriọ? Ọ i be yi obọ Osẹnobulua nọnsele ẹbho da guanọ urẹkpa? Obọ ọsi ene yu ọ da be khẹke nin ẹbho dọ ha guanọ urẹkpa nin ene nyẹnlẹn? 20 Ọ ha rẹ khẹke nin ele dọ gua otọ ọne uhi bi ọne uhọnmhunje nan gbẹn ọbhi ebe!
Ahamiẹn ebi ele ta bha diẹn mun ọta nọnsi Osẹnobulua, ẹfua i ri ele bhọ. 21 Ẹkẹ ohanmhẹn bi ọbalọ ọdeọde bhi ẹwẹ ele ha rẹ na ọne otọ gbera; rẹ deba ọnin, ranmhude ohanmhẹn nọn gbe ele, bi ohu nọn re ele, ele ki tuẹn ẹlo okhun ha ghunmhun ojie nọnsele bi Osẹnobulua nọnsele. 22 Ele ha ki ghe otọ, ebi ele ha daghe hi, ọbalọ, ebiuki, okakale, ojobi, ele i da yẹ ha daghe ẹfua; egbe iẹnlẹn ki lọ ele.