Ẹzaya
48 Eo uwa ọsi Jekop, bha re ehọ ọbhi ọnan,
Ibha ne tie egbe ibha mun elin ọsi Izrẹl,
Ibha ne na bhi ulin-uwa ọsi Juda* vae,
Ibha ne re elin nọnsi Jehova rẹ ve ihẹn,
Ne yẹ sotie Osẹnobulua ọsi Izrẹl,
Arẹmiẹn ọ i yi ẹkẹata bi ikhiakhiale bha rẹ tie ọle.
2 Ibha tie egbe bha ẹbho ne nyẹnlẹn bhi agbaẹbho nọn khiale,
Yẹ guanọ urẹkpa bhi obọ Osẹnobulua Ọsi Izrẹl,
Nin elin ọlẹn yi Jehova nọn nyan ene eyokulo.
3 “Bhi ẹghe nọn gbera, mẹn da taman bha emhin ne ha sunu.
Unun nọnsẹmhẹn mẹn rẹ ta ele,
Yẹ ji ẹbho lẹn.
Mẹn da wo re ẹjẹje lu emhin nin mẹn tale, ele da gene munsẹ.
4 Ranmhude mẹn lẹnmhin ghe, ibha manman wo bhi uhọnmhọn,
Ghe, akhọle nọnsẹbha diabe ẹlọnmhọn, sẹyẹ, ukẹhale nọnsẹbha diabe oze,
5 Ọle zẹle nin mẹn da taman ibha bhi ẹghe nọn reele nọn gbera.
Ọkuẹsẹ ọ sunu, mẹn da ka ji bha lẹn,
Beji a ha da miẹn ghe, ibha bha dọ ha yọle, ‘Ẹbọ nọnsẹmhan lu ọle;
Amanzẹ nọnsẹmhan nin mhan kanọ bi amanzẹ nin mhan re emantọn lu, ele tale.’
6 Bha họn ene emhin nan rebhe yẹ daghe ele.
Ibha i da be wewe ọle?
Rẹ na bhi ejayenan rẹ ha khian, emhin ọgbọn mẹn ki wewe man bha,
Ọta ẹkhokho nan rẹ he, nin ibha bha lẹn.
7 Ọne ẹghe nan nian mẹn rẹ ha lu ọle, ọ i yi ẹghe nọn gbera.
Ọkuẹsẹ ẹlẹnan, ibha bha sẹ ka họn ọne ẹmhọn nan khẹ,
Bhiriọ, bha i da sabọ yọle, ‘Ghọle! Mhan ka lẹn ele khẹ.’
8 Eye, ibha bha sẹ ka họn khẹ, ibha bha sẹ ka lẹn ọnan khẹ,
Ranmhude, bhi ẹghe nọn gbera, ibha wo yehọ.
Mẹn lẹnmhin ghe, ibha wo manman guẹ ebi a rẹ lu emhin ọbe yẹ,
Sẹyẹ, emhin ebe a wo lẹn bha ọi rẹ na ẹghe nan rẹ biẹ ibha ha vade.
9 Ọkpakinọn, ranmhude elin nọnsẹmhẹn, mẹn i da re ohu nọnsẹmhẹn man;
Ranmhude mẹn ho nin men re ogẹn ji egbe mẹn, mẹn i da re ohu ne bha lu emhin,
Sẹyẹ, mẹn i da fuẹn bha a.
10 Ghọle, mẹn kpe ibha khia, ọkpakinọn, ọ i yi beji a rẹ kpe isiliva khia.
Mẹn re otọ nin ibha rẹ loya, nin mẹn rẹ kpe bha khia, beji a rẹ re eranlẹn rẹ nianian itọn sibhi emantọn re.
11 Gene-gene, mẹn dẹ lu emhin ranmhude elin nọnsẹmhẹn.
Be imẹn ha ki rẹ re otọ nin ẹbho yẹ rẹ ha faa elin nọnsẹmhẹn an?
Mẹn i re uyi nọnsẹmhẹn nin ọria ọbhebhe.*
12 Ka mẹn ehọ, Eo Jekọp bi Izrẹl nin mẹn tiele,
Imẹn i fidenọ. Imẹn hi ọnọn ọhẹnhẹn; sẹyẹ, imẹn hi ọnọn kike.
13 Obọ nọnsẹmhẹn imẹn rẹ gbe ayotọ ọsi otọ,
Sẹyẹ, obera nọnsẹmhẹn mẹn rẹ tan ene okhun an.
Mẹn ha tie ele, ele ki ko kpanọ mundia.
14 Bha rebhe siegbe koko, ibha ha yẹ kaehọ.
Họla bhi ẹwẹ ele* sẹ ka ta ene emhin nan khẹ?
Ọne ọria* nin mẹn nin Jehova hoẹmhọnlẹn
Dẹ mun iho nọnsẹmhẹn sẹ rẹji Babilọn.
Ọle dẹ re obọ nọnsọle mun ibhokhan Kadia.
15 Imẹn tobọmẹn tale, sẹyẹ, imẹn zẹ ọle.
Imẹn re ọle mundia; emhin nin ọle lu dẹ kiọnlẹn.
16 Bha sire, beji ibha ha da họn ọnan.
Rẹ na bhi ẹghe umunhẹn, ẹghe i ribhọ nin mẹn rẹ ha talọ bhi ẹkhokho.
Mẹn wo ha ribhi enin bhi ẹghe nọn rẹ sunu.”
Bhi ejayenan nian, Jehova Nin Ebeanlẹn Nọn Ke Okhun Nẹ re ẹlinmhin nọnsọle nin mẹn, yẹ je mẹn bu bha re.
17 Ọnan hi ebi Jehova nin Osẹ nọn dẹ uwẹ kiere, nin Ọnọn Khiale ọsi Izrẹl tale:
“Imẹn nin Jehova, imẹn hi Osẹnobulua nọnsẹ,
Ọnọn man uwẹ emhin beji emhin ha da mhẹn nin uwẹ,
Ọnọn dia uwẹ diọbhi uwedẹ nọn khẹke nin uwẹ rẹkhan.
18 Ahamiẹn uwẹ gene re obọ rẹkhan uhi nesẹmhẹn,
Ọfure nọnsẹ ki diabe ẹdẹ,
Sẹyẹ, ikhiale nọnsẹ ki diabe okpẹdẹ nọn fi-yo-fi-re.
19 Imọn nesẹ ki bunbun bọsi ekẹn,
Ele ki bunbun bọsi ekẹn ne ribhi otọ.
Ẹghe i ribhọ nan ha rẹ gbo elin nọnsele a, la ne elin nọnsele kie bhi isira mẹn.”
20 Sibhi Babilọn re!
Bha nẹ nin ibhokhan Kadia!
Re usomhin eghọnghọn rẹ tale dagbare! Wewe ọle!
Tale na bhi otọ rebhe yọle:
“Jehova dẹ Jekọp nin ọguọmhandia nọnsọle fikiere.
21 Ohanmhẹn-amẹn bha gbe ele bhi ẹghe nin ọle rẹ sun ele na ene otọ nan mun fia.
Ọle da lu ọle nin amẹn na bhi ẹkẹ udo dagbare nin ele;
Ọle da va udo a, nin amẹn na bhi ẹkẹ ọle ha vẹ kua.”
22 “Egbe i da fu ọria ọbe re,” iriọ Jehova tale.