Ẹzaya
45 Ọnan hi ebi mẹn nin Jehova taman Sairọs nin mẹn zẹle,
Nin mẹn mun obera nọnsọle mhọnlẹn,
Beji ọle ha da khọn ene agbaẹbho miotọ,
Yẹ re ijie obọ sotọ.
Mẹn dẹ tuje ene odẹ a nanlẹn, ne mhọn obọ eva,
Beji a ha da miẹn ghe, a bha khue ene igeti:
2 “Mẹn dẹ kalo nin uwẹ,
Sẹyẹ mẹn dẹ duẹduẹ ene oke sotọ,
Mẹn dẹ guọghọ ene odẹ nan re oze lu a,
Yẹ giagia ene emantọn nan rẹ mun ele mhọn an.
3 Mẹn dẹ ne ene emhin ne ghanlẹn ne ribhi eje so ebiuki a nin uwẹ,
Bi ene emhin ne ghanlẹn nan ne nẹhe bhi ẹkhokho,
Beji uwẹ ha da lẹn ghe, imẹn hi Jehova
Nin Osẹnobulua ọsi Izrẹl, nọn tie uwẹ elin nọnsi uwẹ.
4 Ranmhude Jekọp nin ọguọmhandia nọnsẹmhẹn bi Izrẹl nin mẹn zẹle,
Mẹn tie ẹ elin nọnsẹ.
Mẹn dẹ lu ọle nan ha re uyi nin elin nọnsẹ, arẹmiẹn uwẹ bha lẹn mẹn.
5 Imẹn hi Jehova, Osẹ ọbhebhe i ribhọ.
Osẹnobulua ọbhebhe i ribhọ gbera mẹn.
Mẹn dẹ re ahu nin uwẹ arẹmiẹn uwẹ bha lẹn mẹn.
6 Beji ẹbho ha da lẹn ghe,
Rẹ na bhi obọ nin oẹnlẹn da hẹnre rẹ sẹbhi obọ nin oẹnlẹn da defia,*
Osẹ ọbhebhe i ribhọ gbera mẹn.
Imẹn hi Jehova, Osẹ ọbhebhe i ribhọ.
7 Imẹn man ẹfua bi ebiuki,
Imẹn hi ọnọn re ọfure bi ọkakale re,
Imẹn nin Jehova, imẹn hi ọnọn lu ene emhin nan rebhe.
8 Ene okhun, bha ji amẹn nabhi okhun rọ kua ọbhi otọ,
Ji ikhiale ha na bhi ene adudu amẹn biri kua.
Ji otọ tuje unun an, nin ikpẹ ọsi umiẹnfan
Bi ikpẹ ọsi ikhiale da jẹ dagbare, ji ele veva da ha vẹ.
Imẹn nin Jehova lu ọle.”
9 Ọkhọbhegbe hi ọsi ọria nọn ne Ọnọn man ọlẹn ha gbe egbe,*
Ranmhude, osọmhẹn-akhe nan re ẹkẹn man ọle khin,
Bhi ẹwẹ osọmhẹn-akhe nekẹle ne ribhi otọ!
Ekẹn dẹ be sabọ taman ọnọn re ọle man emhin* yọle: “Be uwẹ man?”
La ebi uwẹ man dẹ be sabọ taman uwẹ yọle: “Uwẹ i mhọn obọ”?*
10 Ọkhọbhegbe hi ọsi ọmọn nọn taman aba ọle yọle: “Be a kuẹ tie ọnan bhi ọmọn nin uwẹ biẹle?”
Bi ọnọn taman inẹn ọlẹn yọle: “Be uwẹ kuẹ hanmhan?”*
11 Ọnan hi ebi Jehova nin Ọnọn Khiale Ọsi Izrẹl bi Ọnọn man ọlẹn tale:
“Uwẹ dẹ be gbudu ha nọọn mẹn ẹmhọn emhin ne vade,
Yẹ ha taman mẹn ebi mẹn ha lu da imọn nesẹmhẹn bi iwẹnna obọ nesẹmhẹn?
12 Imẹn man otọ yẹ man eria ne ha nyẹnlẹn bhọ.
Obọ nọnsẹmhẹn mẹn rẹ niẹn ene okhun an,
Sẹyẹ, imẹn taman emhin rebhe ne ribhi okhun* ebi ele ha lu.”
13 “Ranmhude Osẹ nọn lu emhin bhi uwedẹ nọn gbale mẹn khin, mẹn re ọria mundia, mẹn dẹ dia uwedẹ nọnsọle rebhe.
Ọle hi ọnọn ha bọn agbaẹbho nọnsẹmhẹn,
Yẹ fan ẹbho nesẹmhẹn ne ribhi imun fia.
Ọle i da haosa ọbhọ, la re igho nin ọria bhi ikeke,” iriọ Jehova nọn nyan ene eyokulo tale.
14 Ọnan hi ebi Jehova tale:
“Igho* ọsi Ijipt bi ẹki ọsi Ẹtiopia* dẹ kiẹn ọsi uwẹ, sẹyẹ, ibhokhan Siba ne tantan ki kiẹn eguọmhandia nesẹ.
Ele rebhe ki bu uwẹ re yẹ kiẹn eguọmhandia nesẹ.*
Ighan ki ha ri ele bhi oẹ beji ele rẹ khian rẹkhan uwẹ,
Ele ki bu uwẹ re yẹ deuhọnmhọnre nin uwẹ.
Ele ki ha nan erọnmhọn nin uwẹ yọle, ‘Gene-gene, Osẹnobulua wo ne uwẹ dia,
Ọle ọkpa hi Osẹnobulua; ehe, ọbhebhe i ribhọ.’”
15 Eo Osẹnobulua ọsi Izrẹl nin Ọmiẹnmhanfan,
Gene-gene, Osẹ nọn i re egbọle man uwẹ khin.
16 A dẹ re ekpẹn si ele rebhe bhi egbe re, yẹ re ẹkhọ lo ele a;
Ene manọ ẹbọ ki re ẹkhọle kpanọ.
17 Ọkpakinọn, uwẹ nin Izrẹl, Jehova dẹ miẹn uwẹ fan rẹ ha khian ighegheghe.
Ẹghe i ribhọ nan ha rẹ re ẹkhọle lo uwẹ a, la re ekpẹn si uwẹ bhi egbe re.
18 Ọnan hi ebi Jehova tale,
Aman nọn man okhun, Osẹnobulua ọsi ẹmhọanta,
Ọnọn man otọ, nọn man ọlẹn nọn deziẹn,
Nọn bha gheghe man ọlẹn kua, sokpan, ọle man ọlẹn nan ha nyẹnlẹn bhọ:
“Imẹn hi Jehova, Osẹ ọbhebhe i ribhọ.
19 Mẹn bha talọ bhi ẹkhokho, bhi otọ nọn so ebiuki a;
Mẹn bha taman ọmọn ọsi Jekọp ghe,
Nin ọle guanọ mẹn, ọkpakinọn, ọle i da miẹn elele bhọ.
Imẹn hi Jehova nọn ta ọta nọn gbale, yẹ wewe ẹmhọanta.
20 Bha siegbe koko, bha vae.
Bha kugbe vae, ibha ne miuhuọnmhọn bhi obọ ene agbaẹbho.
Ẹbho ne muno amanzẹ nan kanọ na bhi ijerebhe,
Yẹ nan erọnmhọn ji osẹ nọn i da sabọ hinmhin ele bha lẹn emhin soso.
21 Bha* mun ẹmhọn nọnsẹbha re, bha tare ebe sunu.
Bha ko zilo kugbe.
Họla ta ọnan ọbhi otọ bhi ẹghe nọn reele
Yẹ tale bhi ẹghe nọn gbera?
Ọ i be yi mẹn nin Jehova?
Osẹnobulua ọbhebhe i ribhọ gbera mẹn;
Osẹnobulua nọn khiale nọn yẹ re umiẹnfan re, ọle mẹn khin. Osẹ ọbhebhe i ribhọ gbera mẹn.
22 Ibha rebhe ne ribhi otọ, bha bu mẹn re nin bha da miuhọnmhọn,
Imẹn hi Osẹnobulua, Osẹ ọbhebhe i ribhọ.
23 Mẹn re egbe mẹn ve ihẹn;
Ẹmhọanta ọta nọn si mẹn bhi unun re khin,
Sẹyẹ, ọ i da fikie unun nọnsẹmhẹn.
Ọrebhe dẹ diguẹ nin mẹn,
Ọrebhe dẹ ve ghe ele dẹ ha sun rẹkhan mẹn,
24 Sẹyẹ, ele ki ha yọle, ‘Gene-gene, Jehova manman mhọn ahu, ọle yẹ lu emhin nọn gbale.
Ọrebhe ne khọẹkẹ ọle dẹ re ẹkhọle bu ọle re.
25 Ibhokhan Izrẹl rebhe ki dọ kere ghe, ele lu nọnsẹn nin ele rẹ ha ga Jehova,
Sẹyẹ, ele ki re ọle ha dẹgbọ.’”