Ẹzaya
43 Eo Jekọp, ọnan hi ebi Jehova nin Aman nọn man uwẹ tale,
Osẹ nọn man uwẹ, Eo Izrẹl:
“Hẹi ji ofẹn mun uwẹ, ranmhude mẹn dẹ uwẹ kiere,
Mẹn tie uwẹ elin nọnsẹ.
Ọsẹmhẹn uwẹ khin.
2 Mẹn dẹ ne uwẹ dia sade uwẹ na ẹdẹ gbera,
Sẹyẹ, ẹdẹ i da lọ uwẹ egbe sade uwẹ na ele gbera.
Uwẹ ha na eranlẹn gbera, ọ i da tuẹ uwẹ a,
La nin ọne eranlẹn riaria uwẹ egbe.
3 Ranmhude, imen hi Jehova nin Osẹnobulua nọnsẹ,
Ọnọn Khiale Ọsi Izrẹl nọn hinmhin uwẹ.
Mẹn re Ijipt rẹ dẹ uwẹ kiere,
Sẹyẹ, mẹn re Etiopia bi Siba rẹ dẹ iẹnlẹn nọnsẹ.
4 Uwẹ da kiẹn ọnọn ghanlẹn bhi ẹlo nọnsẹmhẹn;
Mẹn da mun ekpẹn uwẹ bhi egbe yẹ hoẹmhọn uwẹ.
Bhiriọ, mẹn dẹ re iẹnlẹn ọsi ẹbho rẹ dẹ uwẹ,
Yẹ re agbaẹbho kẹkẹ rẹ dẹ iẹnlẹn nọnsẹ kiere.
5 Hẹi ji ofẹn mun uwẹ, ranmhude mẹn ne uwẹ dia.
6 Mẹn dẹ taman otọ nọn ribhi obọ ọsi nọt* yọle, ‘Ze ele obọ!’
Yẹ taman otọ nọn ribhi obọ ọsi saot* yọle, ‘Hẹi mun ele mhọn.
Ne imikpia nesẹmhẹn ne ribhi eje reele re, bi imikhuo nesẹmhẹn ne ribhi eji otọ sẹle.
7 Ne ọrebhe nan tie elin nọnsẹmhẹn mun re,
Bi ọrebhe nin mẹn manlẹn, nin mẹn rẹ ha re uyi ji egbe mẹn,
Ehe, ọrebhe nin mẹn manlẹn.’
8 Ne ẹbho dagbare ne i daghe arẹmiẹn ele mhọn ẹlo,
Ene i họn ẹmhọn arẹmiẹn ele mhọn ehọ.
9 Ji ene agbaẹbho rebhe siegbe koko bhi ijian ọkpa,
Sẹyẹ, ji ene ẹbho rebhe siegbe koko.
Họla bhi ẹwẹ ele ha sabọ tale ghe ene emhin nan dẹ sunu?
La, họla ha sabọ taman mhan emhin ne ha ka sunu?*
Ji ele ne ẹbho re ne sọsali ọbhọ ghe, ẹmhọanta ele tale,
La, nin ele họn ọne ẹmhọn yẹ yọle, ‘Ẹmhọanta nọn.’”
10 “Esali nesẹmhẹn bha khin,
Ehe, ọguọmhandia nọnsẹmhẹn nin mẹn zẹle,
Beji bha ha da sabọ lẹn mẹn yẹ mhọn urẹọbhọ da mẹn,
Yẹ lẹn sẹbhọ ghe imẹn i fidenọ.
Osẹ ọbhebhe i ribhọ nọn ka mẹn ha nyẹnlẹn,
Sẹyẹ, gbera mẹn, Osẹ ọbhebhe i ribhọ nọn zegbere,” iriọ Jehova tale.
11 “Imẹn tobọmhẹn, imẹn hi Jehova. Gbera mẹn, osẹ ọbhebhe i ribhọ nọn ha miẹn bha fan.”
12 “Imẹn hi Ọnọn ta ebe ha sunu, Ọnọn miẹn bha fan, bi Ọnọn re ọle man
Bhi ẹghe nin osẹ ọbhebhe bha rẹ ha ribhi ẹwẹ bha.
Bhiriọ, esali nesẹmhẹn bha khin, imẹn hi Osẹnobulua,” iriọ Jehova tale.
13 “Rẹ deba ọnin, mẹn i gbo fidenọ,
Sẹyẹ, ọria soso i da sabọ gua emhin re bhi obọ nọnsẹmhẹn.
Ahamiẹn mẹn lu emhin, họla ha sabọ de idobolo ọbhọ?”
14 Ọnan hi ebi Jehova nin Osẹ nọn dẹ bha kiere, nin Ọnọn Khiale ọsi Izrẹl tale:
“Ranmhude ibha, mẹn dẹ je ọria ha khian Babilọn, sẹyẹ, mẹn ki nyanọn ene igeti rebhe nesọle sotọ.
Ibhokhan Kadia ki ha vioya bhi ẹkẹ okọ nesele.
15 Imẹn hi Jehova, Ọnọn Khiale nọnsẹbha. Imẹn hi Ojie nọnsẹbha, Aman nọn man Izrẹl.”
16 Ọnan hi ebi Jehova tale,
Nọn zẹ uwedẹ na okpẹdẹ,
Nọn zẹ odẹ na ẹkẹ okpẹdẹ nọn fi-yo-fi-re,
17 Ọnọn sun akasi bi awẹnẹwẹnẹ nan rẹ yo okhọnlẹn,
Yẹ sun eyokhọnlẹn bi ekakulo ne ziẹnlẹn:
“Ele dẹ nowẹ, sokpan ele i da riọre.
A dẹ fuẹn ele a beji a rẹ fun ukpa nọn ribhi olu a.”
18 “Hẹi ha ye emhin ne sunu bhi ẹghe nọn gbera re,
Sẹyẹ, hẹi ha ria ẹmhọn ẹghe nọn gbera.
19 Ghọle! Mẹn munhẹn ha lu emhin ọgbọn;
Ọne emhin bhọ zegbere nian.
Ibha bha be daghe ọle?
Mẹn dẹ zẹ uwedẹ na ojẹgbo,
Yẹ lu ọle nin ẹdẹ ha nẹ gbera bhi otọ ugbẹnẹbubu.
20 Ene elanmhẹn ẹwẹ dẹ ha gẹn mẹn,
Ranmhude mẹn lu ọle nin amẹn ha ribhi ojẹgbo,
Nin ẹdẹ ha ribhi otọ ugbẹnẹbubu,
Nin ẹbho nesẹmhẹn nin mẹn zẹle miẹn wọn,
21 Ẹbho nin mẹn manlẹn ne ha yi ọsẹmhẹn,
Beji ele ha da ha gẹn mẹn.
22 Ọkpakinọn, uwẹ bha sotie mẹn, Eo Jekọp,
Ranmhude, egbe imẹn lọ uwẹ, Eo Izrẹl.
23 Uwẹ bha mun ohuan rẹ lu izọese nan tuẹ a ji mẹn,
La re izọese nesẹ re uyi ji mẹn,
Mẹn bha sua uwẹ ọbhọ nin uwẹ lu ẹsele nin mẹn,
La re egbe lọ uwẹ ranmhude mẹn guanọ frankisẹns* bhi obọ uwẹ.
24 Uwẹ bha re igho nọnsẹ rẹ dẹ ilunmhun nọn viohin nin mẹn,
Sẹyẹ, uwẹ bha re abhii ọsi elanmhẹn zọese ji mẹn.
Ọkpakinọn, uwẹ da ha re emhin ebe nesẹ kpokpo mẹn,
Yẹ re egbe lọ mẹn ranmhude olukhọ nesẹ.
25 Imẹn hi Ọnọn gbo olukhọ nesẹ kua ranmhude elin nọnsẹmhẹn,
Sẹyẹ, mẹn i da ye olukhọ nesẹ re.
26 Ahamiẹn emhin ribhọ nin mẹn yelea, ye mẹn re; gui re nin mẹn gui re;
Gui re nin uwẹ rẹ rẹman ghe uwẹ bha lu ọbe.
27 Aba ẹ nin ọhẹnhẹn lu olukhọ,
Sẹyẹ, ene sun uwẹ* sọtẹ da mẹn.
28 Bhiriọ, mẹn dẹ fa ene ekhaẹmhọn ne ga bhi eje khiale a,
Sẹyẹ, mẹn dẹ ji a da fuẹn Jekọp a,
Yẹ re otọ nin ẹbho rẹ ha re unun je Izrẹl.