Ẹzaya

39 Bhi ọne ẹghenin, Mẹrodak-baladan nin ojie ọsi Babilọn, nin ọmọn nọnsi Baladan da gbẹnẹ ilẹta ji Hẹzẹkaya, yẹ ne emhin ji ọle rẹ lu ẹsele nanlẹn, ranmhude, ọle họn ghe egbe bha rẹ daan ọlẹn, ọkpakinọn, egbe ki daan ọlẹn nian. 2 Hẹzẹkaya da wo re eghọnghọn miẹn ene ukọ nan je bu ọle ọbhi egbe, yẹ re uwa nin emhin ne ghanlẹn nesọle ye man ele. Emhin bii isiliva, igolu, abhii ọsi basam, abhii nekẹle ne ghanlẹn, emhin rebhe nesọle nan rẹ yo okhọnlẹn, bi emhin rebhe ne ribhi ene uwa nin emhin ne ghanlẹn nesọle ye. Emhin soso i ribhọ nin Hẹzẹkaya bha rẹman ele bhi uwa* nọnsọle, bi bhi eji ọle gbẹloghe rebhe.

3 Ọnan ki sunu fo, Ẹzaya nin akhasẹ da bu Hẹzẹkaya nin ojie yẹ nọọn ọlẹn yọle: “Be ene ikpia nan taman uwẹ, sẹyẹ ijela ele na vae?” Hẹzẹkaya ki da taman ọlẹn yọle: “Babilọn ele na vae, ọne agbaẹbho nọn reele.” 4 Ọle da kie nọọn ọlẹn yọle: “Be ele miẹn bhi uwa* nọnsẹ?” Hẹzẹkaya da wanniẹn ọlẹn yọle: “Emhin rebhe ne ribhi uwa* nọnsẹmhẹn ele miẹn. Emhin soso i ribhọ nin mẹn bha rẹman ele bhi ene uwa nin mẹn ne emhin ne ghanlẹn nesẹmhẹn ọi.”

5 Ẹzaya da ki taman Hẹzẹkaya yọle: “Kaehọ ebi Jehova nọn nyan ene eyokulo tale, 6 ‘Ghọle, ẹghe vade nan ha rẹ muno emhin rebhe ne ribhi uwa* nọnsẹ ha khian Babilọn, rẹ dọ sẹbhi emhin rebhe nin aba ẹ nin ẹdẹlẹ koko ọbhi otọ rẹ dọ sẹbhi ẹlẹnan. Emhin soso i da kẹre,’ iriọ Jehova tale. 7 ‘Sẹyẹ, a dẹ muno eso bhi ẹwẹ imikpia nesẹ ha khian Babilọn yẹ re ele kiẹn ene wẹnna bhi ẹguale ọsi ojie ọsi Babilọn.’”

8 Bhiriọ, Hẹzẹkaya da taman Ẹzaya yọle: “Ẹmhọn nọnsi Jehova nin uwẹ tale wo mhẹn.” Ọle da yẹ yọle: “Ranmhude, ọfure dẹ ha ribhọ bhi ẹdagbọn iẹnlẹn nọnsẹmhẹn,* sẹyẹ emhin rebhe dẹ wo dia nọnsẹn.”