Ẹzaya
20 Bhi ọne ukpe nin Sagọn nin ojie ọsi Asiria je Tatan* ha khian agbaẹbho ọsi Ashdọd, Tatan da khọn Ashdọd, yẹ miẹn ele otọ. 2 Ẹghenin, Jehova da taman Ẹzaya nin ọmọn nọnsi Emọnz yọle: “Ha khian, ban ukpọn-akhiẹ sibhi akun re, uwẹ ha yẹ kuẹ ibata.” Ọle da gene lu iriọ. Ọle da re eban-eban* bi oẹ khọnkhan ha khian nẹga.
3 Jehova da ki yọle: “Beji Ẹzaya nin ọguọmhandia nọnsẹmhẹn rẹ re eban-eban bi oẹ khọnkhan ha khian nẹga bhi ẹkẹ ikpe ea, nọn ha yi iyaman bi emhin nin mẹn rẹ sekha nin Ijipt bi Ẹtiopia, 4 iriọ ojie ọsi Asiria ha rẹ muno usẹn ikpia bi ewanlẹn bhi otọ ọsi Ijipt bi Ẹtiopia ha khian imun. Ele ki re eban-eban, oẹ khọnkhan, bi uwedin nan bha re ukpọn gue kpanọ ha khian. A ki re ẹkhọle lu Ijipt a. 5 Bhiriọ, ofẹn ki ha mun ele. Ẹkhọle Ẹtiopia nin ele mun udu nyan ki ha lo ele, sẹyẹ ẹkhọle Ijipt nin ele rẹ hio ki ha lo ele.* 6 Bhi ọne ukpẹdẹ nin, ene ẹbho ne nyẹnlẹn bhi ọne otọ nan nọn ribhi egbe ẹdẹ ki yọle, ‘Ghe ebe ki sunu ji agbaẹbho nin mhan rẹ mun udu nyan, nin mhan rẹ nẹ bu ne rẹkpa mhan yẹ hinmhin mhan bhi obọ ojie ọsi Asiria! Be mhan ha ki rẹ miuhọnmhọn yẹ nian?’”