Ẹzaya
1 Ọnan hi imianlo nin Ẹzaya* nin ọmọn nọnsi Emọnz miẹn, rẹji Juda bi Jerusalẹm bhi ẹghe nin Uzaya, Jotam, Ehaz, bi Hẹzẹkaya nin ijie nesi Juda rẹ ha gbẹloghe:
2 Ene ribhi okhun, bha kaehọ!
Sẹyẹ, ene ribhi otọ, bha gbehọkotọ,
Bha kaehọ ebi Jehova tale:
“Imọn nin mẹn bẹẹ wanre sọtẹ da mẹn.
3 Ogho-ẹmena lẹn ọnọn dẹ ọle,
Sẹyẹ, jaki lẹn uwa nin ọnọn nyan ọlẹn da re ebale nanlẹn le;
Sokpan, ibhokhan Izrẹl bha lẹn mẹn,
Ẹbho nesẹmhẹn i lu emhin bii ene mhọn ilẹn-otọ-emhin.”
4 Ọkhọbhegbe hi ọsi agbaẹbho nin olukhọ vuọnlẹn,
Ẹbho nin emhin ebe nọnsele khua ele bii ihẹ,
Ikpia ne i mhẹn, bi imọn ne sankan an ele khin!
Ele zẹ Jehova obọ;
Ele bha mun ekpẹn nin Ọnọn Khiale ọsi Izrẹl;
Ele fikekegbe ọle.
5 Ijela mẹn ha ki da gbo fi bha emhin nian, ibha ne bha ka re obọ sibhi emhin ebe re?
Itẹ vuọn ibha uhọnmhọn,
Sẹyẹ, emianmhẹn wẹghẹ ibha udu a.
6 Rẹ na uhọnmhọn rẹ sẹ atata-oẹ nọnsẹbha, eje daanlẹn i ribhọ.
Itẹ-itẹ ọkpa vuọn ọlẹn
—A bha sẹ kpe ene itẹ,* re emhin gbanọ ele, la re abhii gbo ele.
7 A mun otọ nọnsẹbha fia.
A tuẹ agbaẹbho nesẹbha a.
Eriọbhe rọ emhin ekọnọn nesẹbha bhi isira ibha.
Ọne otọ diabe otọ nan mun fia, bọsi otọ nin eriọbhe khọn miotọ.
8 Ọmokhuo ọsi Zaiyọn diabe ibọkpọ nan zẹ ọle obọ bhi ugbo eran anyọn,
Bọsi obhi uwa* nọn ribhi ugbo kokumba,
Bọsi agbaẹbho nan mun okhọn bu.
9 Sade Jehova nọn nyan ene eyokulo bha hinmhin ikpeta bhi ẹwẹ mhan nọn,
Mhan ha rẹ diabe Sodọm,
Sẹyẹ, inian mhan ha rẹ diabe Gomora.
10 Bha kaehọ ọta nọnsi Jehova, ibha ne re obọ nọn kaka gbẹloghe Sodọm.
Ibha nin ibhokhan Gomora, bha re ehọ ọbhi adia* ọsi Osẹnobulua nọnsẹmhan.
11 Jehova yọlẹ: “Elele nela mẹn miẹn bhi izọese ne bunbun nesẹbha?
Ogho-ohuan, bi abhii ọsi elanmhẹn ne manman mhẹn nin bha rẹ lu izọese nan tuẹ a ji mẹn, egbe ele wo lọ mẹn,
Sẹyẹ, aranlẹn ọsi ogho-ẹmena, ọsi ihuan, bi ọsi ẹbhe i ti mẹn bhọ.
12 Họla yọle nin bha vae bhi uwa nọnsẹmhẹn,
Bhi ẹghe nọn hi ki rẹ ha khin nin bha rẹ vae,
Yẹ dọ ha khian nẹga ẹgodo nọnsẹmhẹn?
13 Bha hẹi yẹ ne izọese ọsi ebale ne bha kiọnlẹn ji mẹn.
Emhin nọn viohin nin bha rẹ ze sọnnọn mẹn.
Ibha lu iluemhin ọsi uki ọsọgbọn, iluemhin ọsi sabati, yẹ do usikoko kẹkẹ
—Ọkpakinọn, mẹn i da re otọ nin bha rẹ ha lu ilọnmhọn idunan bhi usikoko nọn khiale nọnsẹbha.
14 Mẹn he iluemhin ọsi uki ọgbọn bi iluemhin nekẹle nesẹbha.
Ihẹ ele ki khin rẹji mẹn;
Egbe ele bhọ ki lọ mẹn.
15 Mẹn denọ ẹlo kie bhi eji bha ye
Sade bha taan obọ nesẹbha a.
Arẹmiẹn bha nan erọnmhọn igba ne bunbun,
Mẹn i kaehọ;
Ranmhude, aranlẹn vuọn ibha obọ.
16 Bha khọ a, bha ha yẹ kpe egbe bha khia;
Bha ne emhin ebe nesẹbha si mẹn bhi ẹlo re;
Bha hẹi yẹ lu emhin ebe.
17 Luẹ ebi a rẹ lu emhin esili yẹ, hẹi ha lu eku,
Re adia nin ọnọn denyẹnyẹn ẹbho,
Ha khọnlẹn nin ọmọn nọn i mhọn aba,
Ha khọnlẹn nin okhuo nin ọdọ ọle yu.”
18 Jehova yọle: “Bha vae nin mhan ko zilo, nin mẹn rẹkpa bha hẹnhẹn ikolu nin mẹn bi bha ko mhọnlẹn.
Aharẹmiẹn olukhọ nesẹbha manman gian,
Imẹn dẹ re ele manman ha fua;
Aharẹmiẹn ele gian bii ukpọn nọn manman gian,
Imẹn dẹ re ele diabe ikuolu.
19 Bha ha degbere yẹ ka mẹn ehọ,
Ibha ki le emhin ne mhẹn ne ribhi ọne otọ.
20 Ahakimiẹn ibha bha ka mẹn ehọ, sẹyẹ, bha sọtẹ da mẹn,
A ki re agbada gbono bha a,
Imẹn nin Jehova tale.”
21 Agbaẹbho nọn rẹ ha sun rẹkhan Osẹnobulua khẹ kiẹn agbilẹ!
Ọle rẹ wo ha bhuohiẹn nọn gbale;
Ikhiale a rẹ wo ha miẹn bhi isi ọle,
Sokpan, ejayenan nian, ene gbugbele ki vuọn ọlẹn.
22 Isiliva nọnsẹbha kiẹn iku,
Sẹyẹ, a re amẹn gua anyọn nọnsẹbha.
23 Ekhaẹmhọn nesẹbha wo bhi uhọnmhọn, oyi ele ne muobọ.
Ele rebhe hoẹmhọn ẹsele nan re bhi ikeke, sẹyẹ, ele wo guanọ ẹsele bhi obọ ẹbho.
Ele i bhuohiẹn nọn gbale nin ọmọn nọn i mhọn aba,
Rẹ deba ọnin, ele i talọ bhi ẹmhọn ọsi okhuo nin ọdọ ọle yu.
24 Bhiriọ, inian Jehova nọn nyan ene eyokulo tale, Ebeanlẹn ọsi ẹmhọanta,
Osẹ Ọsi Izrẹl Nin Osẹ Nọn Mhọn Ahu,
“Ghọle, mẹn dẹ khu eghian nesẹmhẹn sibhi eji mẹn ye re,
Sẹyẹ, mẹn dẹ re oya nin eghian imẹn.
25 Mẹn dẹ re obọ mun ibha,
Imẹn dẹ re itọn nọn ribhi egbe nọnsẹbha kie sẹsẹsẹ,
Yẹ ne iku nesẹbha rebhe kie.
26 Imẹn dẹ ne ebhuohiẹn nin bha beji mẹn ka lu khẹ,
Bi ene ha re adia nin bha beji mẹn ka lu bhi ẹghe ọhẹnhẹn.
Ranmhude ọnan, a ki ha tie bha Agbaẹbho Ọsi Ikhiale, Agbaẹbho Nọn Sun Rẹkhan Osẹnobulua.
27 A dẹ ranmhude ibhuohiẹn nọn gbale hinmhin Zaiyọn,
Yẹ hinmhin ẹbho nesọle ne fikiere ranmhude ikhiale.
28 Ene sọtẹ, bi ene lu olukhọ, a dẹ fuẹn ele a kugbe,
Sẹyẹ, ene zẹ Jehova obọ, ọsi ele dẹ fo sẹsẹsẹ.
29 Ẹkhọle dẹ lo ele, ranmhude ene udede eran ne yẹẹ bha,
Sẹyẹ, a dẹ re ẹkhọle lo bha, ranmhude ene ogba* nin bha zẹle.
30 Ibha dẹ diabe okporan nin ebe nesọle khakha kua,
Yẹ diabe ogba nin otọ nọnsọle i mhọn amẹn.
31 Okpia nọn ziẹnlẹn dẹ kiẹn ilunmhun nọn kaka a,
Sẹyẹ, ebi ọle lu dẹ kiẹn ufieranlẹn;
Ele veva dẹ ko to a bhi eranlẹn,
Ọria i ribhọ nọn ha fuẹn ọne eranlẹn an.”