Ẹkliziastis
3 Emhin rebhe mhọn ẹghe ọle.
A miẹn ẹghe nan rẹ lu emhin kẹkẹ bhi ọne agbọn nan:
2 A miẹn ẹghe nan rẹ biẹ bi ẹghe nan rẹ yu;
A miẹn ẹghe nan rẹ gbọ emhin bi ẹghe nan rẹ vuno ebi a gbọle;
3 A miẹn ẹghe nan rẹ gbe ọria a, bi ẹghe nan rẹ hinmhin ọria;*
A miẹn ẹghe nan rẹ dunmhun emhin sotọ bi ẹghe nan rẹ bọn emhin okhun;
4 A miẹn ẹghe nan rẹ viẹ bi ẹghe nan rẹ jiẹ;
A miẹn ẹghe nan rẹ so usomhin eviẹ bi ẹghe nan rẹ gbikhiẹn;*
5 A miẹn ẹghe nan rẹ fino udo kua bi ẹghe nan rẹ rọ ele koko;
A miẹn ẹghe nan rẹ dede egbe bi ẹghe nan i rẹ dede egbe;
6 A miẹn ẹghe nan rẹ guanọ emhin bi ẹghe nan rẹ re ọkhọle sibhi ebe yulua re;
A miẹn ẹghe nan rẹ re emhin ya bi ẹghe nan rẹ re emhin fia;
7 A miẹn ẹghe nan rẹ nyanghan emhin an bi ẹghe nan rẹ sẹ ọle kugbe;
A miẹn ẹghe nan rẹ nyangbe bi ẹghe nan rẹ talọ;
8 A miẹn ẹghe nan rẹ hoẹmhọn emhin bi ẹghe nan rẹ he emhin;*
A miẹn ẹghe okhọnlẹn bi ẹghe nin ijerebhe rẹ fure.
9 Elele nela ọria nọn wẹnna kaka miẹn bhi iwẹnna nesọle? 10 Mẹn sẹ daghe ẹsọn nin Osẹnobulua gha nin eria nin ele re uri-ẹdẹ rebhe nọnsele ha miẹn. 11 Osẹnobulua da mhanmhan emhin rebhe nọn mhẹn an* bhi ẹghe nọn khẹke; ọle bhọ da lu ọle nọn ha yẹẹ eria rẹ ha nyẹnlẹn bhi ẹdẹdẹmhẹndẹ; ọrẹyiriọ, eria i da sabọ lẹn otọ emhin rebhe fo nin Osẹnobulua ọsi ẹmhọanta manlẹn.
12 Mẹn dọ kere ghe, emhin soso i ribhọ nọn mhẹn gbera nin eria rẹ ha sọnyẹnmhẹn yẹ lu emhin esili beji ele ribhi agbọn, 13 sẹyẹ, ọkhẹke nin ọrebhe ha le ebale yẹ da anyọn, yẹ sọnyẹnmhẹn bhi iwẹnna obọ nọnsele. Ẹsele nọn na obọ Osẹnobulua vae nọn.
14 Mẹn dọ kere ghe emhin rebhe nin Osẹnobulua ọsi ẹmhọanta manlẹn yẹ mun gbọ, dẹ ha ribhọ rẹ sẹbhi ighegheghe, emhin soso i ribhọ nan ha re ba ọle la re sibhọre. Osẹnobulua ọsi ẹmhọanta re inian mhanmhan ọlẹn beji a ha da miẹn ghe, ẹbho ki ha mun ofẹn ọlẹn.
15 Ebe sunu nian sẹ ka sunu khẹ, sẹyẹ ebe vade ki ka ribhọ khẹ; ọkpakinọn, Osẹnobulua ọsi ẹmhọanta dẹ mun emhin nin eria wo ha khu ọi sẹ.*
16 Mẹn yẹ dọ ke ọnan re bhi ọne agbọn nan ghe, bhi eji ọ da rẹ khẹke nan ha bhuohiẹn nọn gbale, ibhuohiẹn nọn bha gba a ki ha bhu, sẹyẹ, eji ọ da rẹ khẹke nan ha lu ebe gbale, emhin ebe a ki ha lu bhọ. 17 Bhiriọ, mẹn da yọle: “Osẹnobulua ọsi ẹmhọanta dẹ bhuohiẹn eria esili bi eria ne lu emhin ebe. Emhin rebhe nan lu bhi ọne agbọn nan mhọn ẹghe ọle.”
18 Mẹn da yẹ taman egbe mẹn ghe, Osẹnobulua ọsi ẹmhọanta dẹ dọnmhẹn eria fẹghe yẹ rẹman ele ghe, inian ele diabe elanmhẹn. 19 Ebe ha sunu ji ọria, ọle ha yẹ sunu ji elanmhẹn; emhin ọkpa, ọle sunu ji ele veva. Beji elanmhẹn rẹ yu, iriọ ọria yẹ rẹ yu, sẹyẹ, beji ohiẹnhiẹn* rẹ ri ọria bhi egbe, iriọ ọ yẹ rẹ ri elanmhẹn bhi egbe. Bhiriọ, ọria i mhọn ebi ọle rẹ nẹ elanmhẹn. Ihoho emhin rebhe khin. 20 Ijian ọkpa ele veva khian, ekẹn a ka rẹ man ele veva; ele veva dẹ yẹ dekẹn an. 21 Họla gene lẹn si okhun ẹlinmhin* ọsi ọria diọ i, la si otọ ẹlinmhin ọsi elanmhẹn diọ i? 22 Mẹn dọ kere ghe, emhin i ribhọ nọn mhẹn gbera nin ọria rẹ ha sọnyẹnmhẹn bhi iwẹnna-obọ nesọle, ranmhude, ọnin hi elele nọnsọle; ọria soso i da sabọ rẹkpa ọle daghe ebe ha sunu sade ọle yu.