Ẹkliziastis
1 Ọmọn nọnsi Devid nọn si ẹbho koko, ọle ta ene ẹmhọn nan. Jerusalẹm ojukhuo nọnsọle ye.
2 Ọnọn si ẹbho koko da yọle: “Udede ihoho nọn!
Ehe, udede ihoho nọn! Ihoho emhin rebhe khin!”
3 Elele nela ọria bhọ gene miẹn bhi ẹsọn ne kakale rebhe
Nin ọle miẹn bhi ọne agbọn nan?
4 Beji ore ọkpa rẹ siegbe kie, iriọ ore ọbhebhe rẹ zegbere,
Ọkpakinọn, ọne otọ nan dẹ ha ribhi eji ọ ye rẹ ha khian.
5 Oẹnlẹn ha hẹnre, ọ ki yẹ defia;
Ọ ki re ẹjẹje fikie diọbhi eji ọ da ka hẹnre, beji ọ ha da gbo kie hẹnre.
6 Ahoho ha fi diọbhi obọ ọsi saot,* ọ ki yẹ fi nẹga diọbhi obọ ọsi nọt;*
Iriọ ọ rẹ wo fi nẹga. A i gbo miẹn ghe ahoho bha fi nẹga.
7 Ẹkẹ okpẹdẹ, ọle ene ikuẹkuẹ ẹdẹ* rebhe nẹ diọ i, ọrẹyiriọ, ọne okpẹdẹ i gbo vuọn,
Eji ene ikuẹkuẹ ẹdẹ da nẹ vae, enin ele yẹ nẹ diọ i, beji ele ha da gbo kie nẹ vae.
8 Emhin rebhe bhọ re egbe lọ ọria;
Ọria i da sabọ tẹmhọn ele fo.
Egbe i gbo lọ ọria rẹ daghe;
Sẹyẹ, egbe i gbo lọ ọria rẹ họn ẹmhọn.
9 Emhin nan ka miẹn, a dẹ yẹ kie miẹn ọlẹn,
Sẹyẹ, emhin nan ka lu, a dẹ yẹ kie lu ọle;
A bha miẹn ebi a bha sẹ ka miẹn khẹ bhi ọne agbọn nan.
10 Emhin soso be ribhọ nin ọria ha sabọ yọle:
“Sẹ ghe! A bha sẹ ka miẹn ọnan khẹ”?
Eye! Ranmhude ọ reele nọn mọn da ribhọ;
Ehe, ọ ka ha ribhọ ọkuẹsẹ ọne ẹghe nan.
11 Ẹbho ne nyẹnlẹn bhi ẹghe nọn gbera, a bha yẹ ye ele re;
Ẹbho ne nyẹnlẹn nian, a dẹ sẹyẹ ye ele a;
Sẹyẹ, ene ha nyẹnlẹn bhi ẹghe odalo, iriọ a ha yẹ rẹ ye ele a.
12 Imẹn nọn si ẹbho koko, imẹn hi ojie ọsi Izrẹl, Jerusalẹm ojukhuo nọnsẹmhẹn ye. 13 Imẹn da muegbe nin mẹn rẹ re ẹwanlẹn nọnsẹmhẹn luẹ emhin rebhe ne sunu bhi ọne agbọn nan. Mẹn da gua otọ ẹsọn nin Osẹnobulua gha nin eria, nin ele re uri-ẹdẹ rebhe nọnsele ha miẹn; ọne ẹsọn nan i ri ele ghọnghọn.
14 Mẹn ki daghe ẹsọn nan miẹn bhi ọne otọ nan,
Mẹn da kere ghe ihoho ele rebhe khin, inian ọ diabe nan rẹ ha khu rẹkhan ahoho.
15 Emhin nọn gọnọ a, a i da sabọ dia ọle,
Sẹyẹ, emhin nọn i ribhi obọ, a i da sabọ ka ọle.
16 Bhi ẹkẹ ọkhọle nọnsẹmhẹn, mẹn da yọle: “Sẹ ghe o! Imẹn hi ọnọn ki sẹ dọ manman mhọn ẹwanlẹn nẹ. A bha miẹn ọria soso nọn mhọn ẹwanlẹn sẹ bii mẹn bhi ẹwẹ ẹbho ne ka mẹn nyẹnlẹn bhi Jerusalẹm. Mẹn wo dọ ha mhọn ẹwanlẹn bi ilẹnmhin.” 17 Mẹn luẹ ẹmhọn emhin nin ẹwanlẹn ye, bi ẹmhọn emhin nin ẹwanlẹn i ye, sẹyẹ, mẹn yẹ luẹ ẹmhọn emhin ne i yi ọle. Ọkpakinọn, inian ọnan yẹ diabe nan rẹ ha khu rẹkhan ahoho.
18 Ọria ha lẹn emhin gbe, ọ re egbe iẹnlẹn lọ ọle,
Bhiriọ, ọria nọn hi ki rẹ khin nọn ho nọn manman ha mhọn ilẹnmhin, dẹ miẹn ọbalọ.