Itan
29 Ọria nọn sẹyẹ wo bhi uhọnmhọn an arẹmiẹn a gbuhi nanlẹn bhi igba ne bunbun
Dẹ re osukpa miẹn ugbekhuelo.
2 Ahamiẹn eria esili bun ọbhọ, ene ẹbho ki wo ha ghọnghọn,
Ọkpakinọn, ahamiẹn ọria ọbe gbẹloghe, ene ẹbho ki wo ha ribhi ọbalọ.
3 Ọmọn nin ẹwanlẹn ti ọle bhọ re aba ọle ghọnghọn,
Ọkpakinọn, ọmọn nọn deba agbilẹ ha muobọ, ọle fuẹn emhin uku nọnsọle kua.
4 Ojie nọn bhuohiẹn nọn gbale re agbaẹbho nin ọle gbẹloghe deziẹn,
Ọkpakinọn, ọria nọn dọ ha miẹn ẹbho ẹse-ike* si ugbekhuelo ji ọne agbaẹbho.
5 Ọria nọn ri ikpunun gẹn ibo ọle,
Ifi ọ ke khẹ ọle.
6 Emhin ebe nin ọria ebe lu mun ọlẹn bii ufi,
Ọkpakinọn, ọria nọn lu ebe gbale ki wo ha so illo yẹ ghọnghọn.
7 Ebi obhioguele ha rẹ miẹn ibhuohiẹn nọn gbale yẹ, ọle rẹtẹ ọria nọn lu ebe gbale,
Ọkpakinọn, ọ i yi iriọ rẹji ọria ebe.
8 Eria ne dẹgbọ si ẹmhọn re bhi agbaẹbho,
Bhi obọ nọnkẹle, eria ne wanlan sabọ lọ ẹbho nin ohu re.
9 Ahamiẹn ọria nọn wanlan deba uhuki ha gbugan,
Ele ki wo gheghe ha nyanangban yẹ re egbe zọojiẹ. A i miẹn eji a yo bhi ọne ẹmhọn.
10 Eria ne gbugbele ki wo he ọria nọn bha lẹn-ọkpa-lẹn-eva,
Sẹyẹ ele ki wo ha guanọ nin ele gbe ọria nọn lu ebe gbale a.*
11 Uhuki, ọle re ohu nọnsọle man ẹghe rebhe,
Bhi obọ nọnkẹle, ọria nọn mhọn ẹwanlẹn ha rẹ ha khọẹkẹ, ọle ki sẹyẹ ko egbe ọi.
12 Ahamiẹn ọria nọn gbẹloghe re ehọ bhi ọta ohoghe,
Eguọmhandia nesọle rebhe ki kiẹn eria ebe.
13 Emhin ribhọ nọn re obhioguele bi ọnọn denyẹnyẹn ọlẹn yi ọkpa, ọnin hi:
Jehova rẹkpa ele veva rẹ daghe ẹfua.*
14 Ahamiẹn ojie bhu obhioguele ohiẹn bhi uwedẹ nọn gbale
Ejele nọnsọle ki deziẹn.
15 Uwẹ ha re adia nin ọmọn yẹ gbe ọle bhi esankan, ọne ọmọn ki ha wanlan,
Ọkpakinọn, ọmọn nan bha gbe bhi esankan ki re ẹkhọle lu inẹn ọlẹn an.
16 Ahamiẹn eria ebe bun ọbhọ, emhin ebe ki yẹ ha bun ọbhọ.
Sokpan, eria ne lu ebe gbale dẹ daghe ọle, ẹghe nan ha rẹ fuẹn ele a.
17 Uwẹ ha man ọmọn nọnsẹ emhin, ọle ki re ọfure ji uwẹ;
Sẹyẹ, ọle ki re uwẹ manman ha ghọnghọn.
18 Ahamiẹn Osẹnobulua bha re adia nin ẹbho, ele ki wo ha lu ebi ele sabọ.
Ọkpakinọn, ẹbho ne re obọ rẹkhan uhi dẹ wo ha ghọnghọn.
19 Ọta ọkpa bha sẹ nan rẹ gbuhi nin ọguọmhandia,
Ranmhude, ọle ha rẹ lẹn otọ ebi uwẹ taman ọlẹn, ọ i da re obọ rẹkhan ọlẹn.
20 Uwẹ sẹ ka miẹn ọria nọn i ria eria fo ọle kuẹ talọ?
Ẹghe odalo ọsi uhuki, ọle ha mhẹn gbera ọsọle.
21 Ahamiẹn a ne otọ munhẹn ha nyan ọguọmhandia,
Ọle i da ha mhọn unun ekhuẹnmhẹn sade akizẹbue.
22 Ọria nin ẹkẹ kẹ khọ, ọle si ẹmhọn re;
Sẹyẹ, ọria nin ohu kẹ re, ọle lu emhin ebe ne bunbun.
23 Ọria nọn tẹngbemun, a dẹ de ọle re
Ọkpakinọn, a dẹ re uyi nin ọria nọn mhọn idegbere.
24 Ọria nọn deba oyi ha muobọ bha hoẹmhọn egbọle,
Ranmhude, ọle ha rẹ họn ghe a yọle nin ọria nọn lẹn ọne oyi dọ tare,* ọle i da sẹyẹ tare.
25 Ufi ọria mun egbọle ọi sade ọle da ha mun ofẹn eria.
Ọkpakinọn, Jehova dẹ gbega ọria nọn mun udu nyan ọlẹn.
26 Ẹbho ne bunbun bu ọnojie re beji ọle ha da rẹkpa ele miẹn ibhuohiẹn nọn gbale.*
Ọkpakinọn, obọ Jehova ọria ha da gene miẹn ibhuohiẹn nọn gbale.
27 Ẹmhọn ọria ebe i ti ọria esili bhọ.
Sẹyẹ, ẹmhọn ọria esili i ti ọria ebe bhọ.