Itan
28 Ọria ebe ki wo kua oẹ bhi unẹ aharẹmiẹn ọria soso i khu ọle,
Ọkpakinọn, ofẹn emhin soso i mun ọria nọn lu ebe gbale beji ofẹn i rẹ mun oduman.
2 Agbaẹbho nan da ha gbobọrauhi, ọle a da fi ọnọn gbẹloghe denọ ẹghe rebhe,
Ọkpakinọn, okpia nọn mhọn ilẹn-otọ-emhin bi ilẹnmhin, dẹ sabọ rẹkpa ọle* rẹ gbẹloghe bhi ikpe ne bunbun.
3 Inian ọria nin obọ gbele nọn mun obhioguele lu,
Diabe ologho nọn re ebale rebhe nẹ kua.
4 Eria ne i re obọ rẹkhan uhi, ele gẹn eria ebe,
Ọkpakinọn, ene re obọ rẹkhan uhi khọẹkẹ eria ebe.
5 Eria ebe i da sabọ lẹn ebi a re ibhuohiẹn nọn gbale ta,
Ọkpakinọn, ẹbho ne guanọ adia nọnsi Jehova, ele sabọ lẹn otọ emhin rebhe.
6 Obhioguele nin obọ nọnsọle khiale,
Ọle mhẹn gbera ọria nọn fele nin obọ nọnsọle bha khia.
7 Ọmọn nọn mhọn ilẹn-otọ-emhin, ọle re obọ rẹkhan uhi,
Ọkpakinọn, ọmọn nọn dọ deba ẹbho ne le okpe-ebale ha muobọ, ọle re aba ọle bhi unun.
8 Ọria dẹ sabọ re asun bi aki eku rẹ tuẹn afe nọnsọle okhun.
Ọkpakinọn, bhi ọkike ọle, ọne afe ki kiẹn ọsi eria ne lu ibhioguele nọnsẹn.
9 Erọnmhọn ọsi ọria nọn i ho nọn re obọ rẹkhan uhi sọnnọn Osẹnobulua.
10 Ọria nọn dia ọria esili diọbhi uwedẹ nọn i mhẹn dẹ de ọbhi uhio nin ọle hianlẹn,
Ọkpakinọn, emhin esili dẹ sẹ ọria nọn lu ebe gbale obọ.
11 Ọria nọn fele sabọ rẹ ha riale ghe ọle wanlan nẹ,
Ọkpakinọn, obhioguele nọn mhọn ilẹn-otọ-emhin dẹ sabọ lẹn unan ọria nin ọle khin.
12 Ahamiẹn emhin kiọnlẹn nin ọria nọn lu ebe gbale, ẹbho rebhe ki wo ha ghọnghọn,
Ọkpakinọn, ahamiẹn ọria ebe nabhi ihe, ẹbho ki dọ nẹko
13 Emhin i da kiọnlẹn nin ọria nọn gbegue olukhọ nọnsọle,
Ọkpakinọn, ọria nọn hi ki rẹ khin nọn re olukhọ nọnsọle ka, yẹ rẹban ọlẹn, a ki mhọn itohan da ọle.
14 Eghọnghọn hi ọsi ọria nọn wo ha babegbe ẹghe rebhe,
Ọkpakinọn, ọria nọn hi ki rẹ khin nọn re zeze a bhi ọkhọle dẹ nabhi ẹmhọn.
15 Beji oduman nọn so rẹ lu emhin, bi beji elanmhẹn natiọle biẹ* nọn khian la gbe emhin le rẹ lu emhin,
Iriọ ọria ebe nọn re ẹbho khian rẹ ne eria ne i mhọn ọnọn ha rẹkpa ele lu emhin.
16 Ọria nọn ribhi ihe nọn i mhọn ilẹn-otọ-emhin, ọle noo ahu nọnsọle bhi uwedẹ nọn bha gba,
Ọkpakinọn, ọria nin aki eku sọnnọn dẹ tọmhin.
17 Ọria nin ọkhọle gbe ọle asan ranmhude nin ọle rẹ gbe ọria a, dẹ wo ha nẹ khian rẹ sẹbhi ẹghe nin ọle ha rẹ ke egbọle re bhi idin.*
Ọria soso hẹi rẹkpa ọle.
18 Ọria nin obọ ọle khiale dẹ miuhọnmhọn,
Ọkpakinọn, ọria nin uwedẹ nọnsọle bha dia dẹ re osukpa dere.
19 Ọria nọn mun ugbo dẹ wo manman ha mhọn ebale,
Ọkpakinọn, ọria nọn re ẹghe nọnsele rẹ dọ ha do aki nin elele i ye, dẹ kiẹn ọria nin obọ gbele.
20 Ọria nọn wo ha lu ebe gbale dẹ miẹn erọnmhọn ne bunbun,
Bhi obọ nọnkẹle, ọria nọn ho nin ọle re ẹjẹje fe, dẹ lu emhin ebe.
21 Ebe bha gba nọn nin ọria rẹ ha bhuohiẹn eku;
Ọrẹyiriọ, ọria dẹ sabọ ranmhude obhi ibrẹd khere lu eku.
22 Ọria nọn mhọn ẹlobhọ ki wo ha guanọ nin ọle re ẹjẹje fe,
Ọkpakinọn, ọle bha lẹn ghe ọle dẹ kiẹn ọria nin obọ gbe.
23 Ọria nọn hi ki rẹ khin nọn re adia nin ibo ọle, a dẹ manman khuẹnmhẹn ọlẹn sade azẹbue.
Ọle a ha khuẹnmhẹn gbera ọria nọn re ikpunun rẹ gẹn ibo ọle.
24 Ọria nọn hi ki rẹ khin nọn ra aba ọle bi inẹn ọlẹn yẹ yọle, “I bha lu ọbe,”
Bha miẹn ebi ọle rẹ dikẹ bhi ọria nọn si ugbekhuelo re.
25 Ọria nọn mhọn ẹlobhọ,* ọle si ẹmhọn re,
Ọkpakinọn, emhin dẹ kiọnlẹn nin ọria nọn mun udu nyan Jehova.
26 Ọria nọn hi ki rẹ khin nọn mun udu nyan egbọle* i wanlan,
Ọkpakinọn, ọria nọn re ẹwanlẹn lu emhin dẹ miuhọnmhọn.
27 Ọria nọn hi ki rẹ khin nọn lu ẹsele nin ibhioguele dẹ wo ha mhọn emhin,
Ọkpakinọn, ọria nọn re ẹlo fia, nọn bha rẹkpa ele dẹ miẹn ihẹn ne bunbun bhi egbe.
28 Ahamiẹn eria ebe munhẹn ha gbẹloghe, ẹbho ki dọ nẹko,
Ọkpakinọn, ahamiẹn ele i yẹ ribhọ, eria ne lu ebe gbale ki ha bun ọbhọ.