Hvernig nota Vottar Jehóva framlögin?
Við notum framlögin til að fjármagna trúarstarfsemi safnaðarins og hjálparstarf. Það er þáttur í að vinna að aðalmarkmiði okkar sem er að hjálpa fólki að verða lærisveinar Jesú Krists. – Matteus 28:19, 20.
Við notum framlögin aldrei til að gera nokkurn mann ríkan. Hvorki öldungarnir né aðrir í söfnuðinum fá greitt fyrir þjónustu sína og vottum Jehóva er ekki borgað fyrir að ganga hús úr húsi. Allir sem þjóna á deildarskrifstofum okkar og á aðalstöðvunum, meðal annars þeir sem sitja í stjórnandi ráði Votta Jehóva, eru sjálfboðaliðar og fá ekki greidd laun.
Dæmi um starfsemi okkar
Útgáfa: Við þýðum, prentum, sendum og dreifum milljónum eintaka af Biblíunni og öðrum biblíutengdum ritum á hverju ári án þess að rukka fyrir það. Og á vefsíðunni jw.org og JW Library-appinu eru rafræn rit okkar fáanleg ókeypis og án auglýsinga.
Byggingarvinna og viðhald: Við byggjum og viðhöldum látlausum samkomustöðum um allan heim til að söfnuðir hafi hentugt húsnæði til að safnast saman og lofa Guð. Hið sama á við um deildarskrifstofur og þýðingarstofur. Sjálfboðaliðar sjá um stóran hluta þessarar vinnu og það lækkar kostnaðinn.
Umsýsla: Starfsemin á aðalstöðvunum, deildarskrifstofum og þýðingastofum auk starfsemi farandhirða er fjármögnuð með frjálsum framlögum til alþjóðastarfs okkar.
Boðun: Vottar Jehóva fá ekki borgað fyrir að flytja fagnaðarboðskapinn eða kenna öðrum „orð Guðs“. (2. Korintubréf 2:17) En líkt og í frumkristna söfnuðinum á fyrstu öld er einstaka vottum sem hafa fengið þjálfun í boðuninni og verja mestum tíma sínum í henni séð fyrir látlausu húsnæði og öðrum nauðsynjum. – Filippíbréfið 4:16, 17; 1. Tímóteusarbréf 5:17, 18.
Fræðsla: Mótin okkar eru kostuð með frjálsum framlögum. Auk þess gefum við út hljóð-og myndefni. Við erum líka með skóla þar sem boðberar í fullu starfi og öldungar fá þjálfun til að sinna verkefnum sínum enn betur.
Neyðaraðstoð: Við útvegum mat, vatn og húsaskjól fyrir fórnarlömb náttúruhamfara og hamfara af völdum manna. Bæði trúsystkini okkar og aðrir njóta gagns af þessu hjálparstarfi. – Galatabréfið 6:10.