Haltu áfram að svala ‚andlegri þörf‘ þinni

1. Hvaða grundvallarþarfir eru okkur áskapaðar? (Matteus 5:3)

JEHÓVA skapaði mennina með ákveðnar grundvallarþarfir. Við þurfum til dæmis mat, klæði og húsaskjól. Ef eitthvað af þessu vantar, jafnvel um stuttan tíma, verður lífið mjög erfitt. Jehóva skapaði okkur auk þess með andlega þörf. (Lestu Matteus 5:3.) Við verðum að vera meðvituð um þessa þörf og halda áfram að svala henni til að vera raunverulega hamingjusöm.

2. Hvað felur það í sér að „skynja andlega þörf sína“? Lýstu með dæmi.

² Hvað felur það í sér að „skynja andlega þörf sína“? Orðalagið í frummálinu dregur upp mynd af betlara. Ímyndaðu þér útigangsmann í rifnum fötum sitjandi á götuhorni. Hann er veikburða af næringarskorti og óvarinn fyrir brennandi sól á daginn og nístingskulda á nóttunni. Aðrir forðast hann. Hann veit mætavel að hann þarf á hjálp að halda til að bæta líf sitt. Á sama hátt veit sá sem skynjar andlega þörf sína að hann þarf á hjálp Guðs að halda í lífinu. Hann er því óðfús að nýta sér ráðstafanir Jehóva handa þeim sem elska hann.

3. Hvað ræðum við í þessari námsgrein?

³ Í þessari námsgrein skoðum við í fyrsta lagi hvað við getum lært af fönikísku konunni sem sárbað Jesú um hjálp. Þessi frásaga leggur áherslu á þrjá eiginleika sem við þurfum að þroska með okkur til að sinna andlegri þörf okkar. Síðan skoðum við fordæmi postulanna Péturs og Páls og Davíðs konungs en þeir vildu allir fylgja leiðsögn Jehóva í lífinu.

FYRIRMYND UM AUÐMÝKT, ÞRAUTSEIGJU OG TRÚ

4. Hvað bað fönikísk kona Jesú um að gera fyrir sig?

⁴ Eitt sinn kom fönikísk kona til Jesú. Dóttir hennar var „sárþjáð af illum anda“. (Matt. 15:21–28) Hún féll á kné og lagði fast að Jesú að hjálpa dóttur sinni. Þessi fönikíska kona sýndi eftirtektarverða eiginleika þegar hún talaði við Jesú. Skoðum þrennt sem við getum lært af henni.

5. Hvaða eiginleika sýndi konan og hvað gerði Jesús fyrir hana? (Sjá einnig mynd.)

⁵ Fönikíska konan sýndi sanna auðmýkt. Hún móðgaðist ekki þegar Jesús virtist líkja henni við hvolp, dýr sem fólk af þjóðunum hafði sennilega sem gæludýr. Hvað hefðir þú gert ef Jesús hefði sagt þetta við þig? Hefðirðu móðgast og gefist upp á að biðja hann um hjálp? Fönikíska konan gerði það ekki. Hún var ekki bara auðmjúk heldur líka þrautseig. Hvers vegna var hún það? Hún hafði trú á Jesú. Þegar hann sá hversu sterka trú hún hafði gerði hann nokkuð óvænt fyrir hana. Hann rak illa andann út úr dóttur hennar þótt hann væri nýbúinn að segja að hann væri aðeins sendur til „týndra sauða af ætt Ísraels“.

6. Hvað lærum við af frásögunni um fönikísku konuna?

⁶ Við verðum að þroska með okkur þessa sömu eiginleika til að svala andlegri þörf okkar. Við þurfum að vera auðmjúk, þrautseig og hafa sterka trú. Aðeins þeir sem eru auðmjúkir halda áfram að biðja Guð um hjálp. Við verðum líka að hafa sterka trú á Jesú Krist og treysta þeim sem hann notar hér á jörð til að leiðbeina lærisveinum sínum. (Matt. 24:45–47) Jehóva og sonur hans vilja sinna andlegri þörf þeirra sem sýna þessa eiginleika. (Samanber Jakobsbréfið 1:5–7.) Skoðum núna hvernig Jehóva hjálpar okkur að næra trú okkar vel, íklæðast kristnum persónuleika og leita skjóls hjá honum. Við sjáum hvað við getum lært af fordæmi postulanna Páls og Péturs og Davíðs konungs.

NÆRÐU TRÚ ÞÍNA VEL EINS OG PÉTUR

7. Hvaða verkefni fékk Pétur og hvað annað þurfti hann að gera? (Hebreabréfið 5:14–6:1)

⁷ Skoðum fordæmi Péturs postula. Hann var einn af fyrstu Gyðingunum sem áttuðu sig á að Jesús væri Messías – sá sem Jehóva notaði til að næra fólk sitt með ‚orði eilífs lífs‘. (Jóh. 6:66–68) Áður en Jesús steig upp til himna fól hann Pétri verkefni og sagði: „Fóðraðu lömbin mín.“ (Jóh. 21:17) Hann sinnti því trúfastlega og Jehóva notaði hann jafnvel til að skrifa tvö bréf sem urðu hluti af Biblíunni. En Pétur þurfti líka að næra sína eigin trú. Hann rannsakaði til dæmis innblásin bréf Páls postula. Pétur viðurkenndi að sumt af því sem Páll skrifaði væri „torskilið“. (2. Pét. 3:15, 16) En hann gafst greinilega ekki upp. Hann treysti því að Jehóva myndi hjálpa sér að melta ‚föstu fæðuna‘, það er að skilja og fara eftir því sem Páli hafði verið innblásið að skrifa. – Lestu Hebreabréfið 5:14–6:1.

8. Hvernig brást Pétur við þegar engill Jehóva upplýsti hann um breyttan skilning?

⁸ Pétur sýndi mikla trú á Jehóva með því að hlýða leiðsögn hans. Þegar hann var til dæmis í hafnarborginni Joppe fékk hann vitrun þegar engill Guðs sagði honum að slátra og borða dýr sem voru óhrein samkvæmt Móselögunum. Pétur var Gyðingur og hlýtur því að hafa verið misboðið. Hann sagði í fyrstu: „Nei, herra, það get ég ekki. Ég hef aldrei borðað neitt sem er vanheilagt og óhreint.“ (Post. 10:9–15) Honum var þá sagt að hætta að kalla það óhreint sem Guð hefði lýst hreint. Pétur skildi nú hvað hann þurfti að gera. Stuttu síðar komu þrír sendiboðar Kornelíusar, manns af þjóðunum, heim til Péturs og báðu hann að koma með til húsbónda þeirra. Undir venjulegum kringumstæðum hefði Pétur ekki farið heim til manns af þjóðunum. Gyðingar álitu fólk af þjóðunum vera óhreint. (Post. 10:28, 29) En Pétur var fljótur að laga sig að nýjum skilningi sem Jehóva birti honum. (Orðskv. 4:18) Hann flutti Kornelíusi og heimilisfólki hans fagnaðarboðskapinn og allt fólkið tók við sannleikanum, fékk heilagan anda og lét skírast. – Post. 10:44–48.

9. Á hvaða tvo vegu nýtist það að þroska með sér löngun í fasta fæðu?

⁹ Líkt og Pétur þurfum við að nærast reglulega á andlegri mjólk, það er grundvallarsannindum í orði Guðs. Við verðum líka að þroska með okkur löngun í fasta fæðu, sannindi sem eru ekki jafn auðmeltanleg. Við þurfum að taka frá tíma og leggja hart að okkur til að skilja dýpri sannindi í orði Guðs. En það er þess virði. Það nýtist okkur að minnsta kosti á tvo vegu. Í fyrsta lagi lærum við eitthvað nýtt um Jehóva sem dýpkar kærleika okkar til hans og virðingu fyrir honum. Í öðru lagi fáum við sterkari löngun til að segja öðrum frá stórkostlegum himneskum föður okkar. (Rómv. 11:33; Opinb. 4:11) Við getum lært fleira af fordæmi Péturs: Við verðum að vera fljót að meðtaka breyttan skilning á orði Guðs og breyta í samræmi við hann. Þetta er nauðsynlegt til að koma að góðum notum í þjónustu Jehóva og halda áfram að vera andlega vel nærð.

ÍKLÆÐUMST NÝJA PERSÓNULEIKANUM EINS OG PÁLL

10. Hvað felur það í sér að íklæðast nýja persónuleikanum? (Kólossubréfið 3:8–10)

¹⁰ Til að þóknast Guði verðum við að gera annað sem hann biður okkur um. Við verðum að íklæðast nýjum persónuleika. Páll postuli skrifaði að við þyrftum að ‚afklæðast hinum gamla persónuleika og íklæðast hinum nýja‘. (Lestu Kólossubréfið 3:8–10, neðanmáls.) Það kostar tíma og mikla vinnu. Tökum Pál sem dæmi. Frá unga aldri lagði hann á sig mikið erfiði til að hljóta velþóknun Guðs. (Gal. 1:14; Fil. 3:4, 5) En hann skorti nákvæma þekkingu á fyrirætlun Guðs og gerði því ekki það sem var rétt í augum hans. Vanþekking Páls á kenningum Krists og hroki gerði hann að ósvífnum manni. – 1. Tím. 1:13.

11. Hvaða galla þurfti Páll að berjast við?

¹¹ Páll var skapbráður maður áður en hann gerðist fylgjandi Krists. Í Postulasögunni segir að hann hafi verið svo reiður við lærisveina Jesú að hann hafi ‚ógnað þeim af mikilli heift og hótað þeim lífláti‘. (Post. 9:1) Eftir að hann var orðinn fylgjandi Krists hefur hann án efa lagt hart að sér til að hafa stjórn á skapofsanum. (Ef. 4:22, 31) En það tókst ekki alltaf. Eitt sinn þegar þeir Barnabas voru ósammála fóru þeir að ‚rífast harkalega‘. (Post. 15:37–39) Þetta var afturkippur hjá Páli. En hann gafst ekki upp. Hann hélt áfram að ‚beita sig hörðu‘ við að berjast gegn hinum gamla persónuleika og hafa velþóknun Jehóva. – 1. Kor. 9:27.

12. Hvað hjálpaði Páli að halda áfram að breyta persónuleika sínum?

¹² Páll gat afklæðst gamla persónuleikanum og íklæðst nýjum af því að hann reiddi sig ekki á eigin styrk. (Fil. 4:13) Hann treysti á „máttinn sem Guð gefur“ eins og Pétur gerði. (1. Pét. 4:11) En stundum fannst Páli hann vera misheppnaður. Þá hugsaði hann um allt það góða sem faðir hans á himnum hafði gert fyrir hann og það gaf honum byr undir báða vængi. – Rómv. 7:21–25.

13. Hvernig getum við líkt eftir Páli?

¹³ Við þurfum öll, sama hversu lengi við höfum þjónað Jehóva, að leggja hart að okkur til að afklæðast gamla persónuleikanum og íklæðast hinum nýja. Þegar okkur verður á, ef við missum til dæmis stjórn á skapinu eða segjum eitthvað í hugsunarleysi, ættum við ekki að álíta okkur vonlaus. Við ættum öllu heldur að halda áfram að breyta hugsunarhætti okkar og verkum í samræmi við vilja Guðs. (Rómv. 12:1, 2; Ef. 4:24) En við þurfum þó að muna eftir einu grundvallaratriði: Ef við viljum halda áfram að íklæðast nýjum persónuleika verðum við að skilja hvaða kröfur Jehóva gerir til okkar og laga okkur að þeim.

LEITAÐU SKJÓLS HJÁ JEHÓVA EINS OG DAVÍÐ

14, 15. Á hvaða hátt veitir Jehóva þjónum sínum skjól? (Sálmur 27:5) (Sjá einnig mynd.)

¹⁴ Við þurfum meira en andlega fæðu og nýjan persónuleika til að vera raunverulega hamingjusöm. Við þurfum líka að leita skjóls hjá Jehóva. Hvernig verndar hann okkur og hvað þurfum við að gera til að njóta verndar hans?

¹⁵ Davíð konungur treysti á vernd Jehóva á erfiðum tímum. (Lestu Sálm 27:5.) Jehóva sér til þess að ekkert geti skaðað trú okkar varanlega. Hvernig verndar Jehóva þjóna sína fyrir utanaðkomandi ógnum? Hann lofar að ekkert vopn sem smíðað verður gegn þeim reynist sigursælt. (Sálm. 34:7; Jes. 54:17) Satan og þeir sem honum fylgja eru vissulega máttugir en þeir geta ekki valdið okkur varanlegum skaða. Þótt þeir svipti okkur lífi mun Jehóva reisa okkur upp í upprisunni. (1. Kor. 15:55–57; Opinb. 21:3, 4) Jehóva hjálpar okkur líka að takast á við innri óvin sem getur valdið okkur varanlegu tjóni – áhyggjur. (Orðskv. 12:25; Matt. 6:27–29) Og hann gefur okkur andlega fjölskyldu – bræður og systur sem styðja okkur og öldunga sem gæta okkar. Hann er faðir okkar og elskar okkur. (Jes. 32:1, 2) Þegar við komum á samkomu erum við minnt á hvernig við getum nýtt okkur þær mörgu ráðstafanir sem Jehóva gerir til að vernda okkur. – Hebr. 10:24, 25.

16. Hvernig verndaði Jehóva Davíð?

¹⁶ Davíð naut verndar Jehóva þegar hann hlýddi honum, ólíkt þeim sem syndguðu vísvitandi. (Samanber Orðskviðina 5:1, 2.) En þegar hann aftur á móti hunsaði mælikvarða Jehóva kom Jehóva ekki í veg fyrir að hann tæki afleiðingum gerða sinna. (2. Sam. 12:9, 10) En hvað þegar aðrir ollu Davíð þjáningum? Hann úthellti þá hjarta sínu fyrir Jehóva í bæn og fékk hugarró. Jehóva fullvissaði hann um að hann elskaði hann innilega og myndi annast hann. – Sálm. 23:1–6.

17. Hvernig getum við líkt eftir Davíð?

¹⁷ Við getum líkt eftir Davíð með því að leita leiðsagnar Jehóva áður en við tökum ákvarðanir. Og við vitum að stundum þjáumst við vegna slæmra ákvarðana okkar en ekki vegna þess að Jehóva hefur brugðist okkur. (Gal. 6:7, 8) Þegar við göngum í gegnum erfiðleika sem við komum okkur ekki sjálf í úthellum við hjarta okkar fyrir Jehóva í bæn í trausti þess að hann verndi huga okkar og hjörtu. – Fil. 4:6, 7.

HALTU ÁFRAM AÐ SVALA ANDLEGRI ÞÖRF ÞINNI

18. Hvers vegna getur verið erfitt að svala andlegri þörf sinni en hvers vegna megum við ekki gefast upp? (Sjá einnig myndir.)

¹⁸ Árstextinn 2026 segir: „Þeir sem skynja andlega þörf sína eru hamingjusamir“. Það er mikilvægara nú en nokkru sinni fyrr að sinna þessari þörf. Margir í dag viðurkenna ekki að þeir hafi andlega þörf. Og aðrir reyna að svala henni með því að leita í fölsk trúarbrögð eða heimspeki. Við megum ekki láta viðhorf þeirra smita okkur. Hvað þurfum við að gera til að halda áfram að treysta á Jehóva? Við verðum að næra okkur á andlegu fæðunni sem hann sér okkur fyrir, íklæðast hinum nýja persónuleika og leita skjóls hjá honum.