‚Verum hugrökk‘

1. Hvað fleira er hægt að segja um hugrekki?

Í ÞESSARI bók höfum við fjallað um fjöldann allan af hugrökku fólki og hvað við lærum af því. Er einhverju við að bæta núna í bókarlok? Já, Biblían segir mikið meira um hugrekki en hægt er að ræða í einni bók. Auk þess viljum við leggja áherslu á hvað við þurfum að gera til að vera hugrökk í raun og veru.

2. Nefndu fleiri trúfasta og hugrakka þjóna Guðs.

² Manstu eftir fleiri hugrökkum biblíupersónum en þeim sem rætt hefur verið um? Kannski verður þér hugsað til dugmikilla spámanna í Hebresku ritningunum eins og Jesaja, Jeremía, Esekíels, Jónasar eða Malakí. Innblásin orð Páls postula eiga sannarlega við um slíka menn. Hann talaði um menn sem voru „hæddir og húðstrýktir og voru jafnvel fjötraðir og hnepptir í fangelsi“. Aðrir, skrifaði hann, „liðu skort, voru aðþrengdir og þeim var misþyrmt“. Sumir voru jafnvel teknir af lífi. (Hebr. 11:36, 37) Þrátt fyrir það tóku þeir afstöðu með Jehóva Guði.

3, 4. Hvernig komu tvær ónafngreindar konur Davíð konungi til hjálpar á hættustund?

³ Biblían segir frá mörgum sem sýndu hugrekki en eru ekki nafngreindir. Tökum sem dæmi tvær konur á dögum Davíðs konungs. Þær komu Davíð til hjálpar þegar hann þurfti að flýja frá Jerúsalem eftir að Absalon, illur og hégómagjarn sonur hans, reyndi að ræna völdum. Davíð bað hugrakkan prest sem hét Sadók um að snúa aftur til borgarinnar og afla upplýsinga um næstu árás Absalons. Sadók þurfti síðan að senda Davíð upplýsingarnar. „Þjónustustúlka nokkur“ hætti lífi sínu til að færa tveim trúum þjónum Davíðs boð frá Sadók. Þeir lögðu af stað til Davíðs en ungur maður kom auga á þá og sagði Absalon frá. Þjónar Davíðs földu sig þá í brunni. Önnur ónafngreind kona, eiginkona mannsins sem átti brunninn, breiddi í snatri teppi yfir brunninn og stráði korni yfir. Þegar menn Absalons komu og leituðu að mönnunum villti hún um fyrir þeim. Þessar hugrökku konur áttu sinn þátt í að vernda útvalinn konung Jehóva. – 2. Sam. 15:23–37; 17:8–22.

⁴ Sannleikurinn er sá að í Biblíunni eru ótal dæmi um hugrakka karla og konur. Sum þeirra þekkjum við með nafni en önnur ekki. Sumir voru ríkir, aðrir fátækir. Sumir voru háttsettir og aðrir venjulegir almúgamenn. En þetta var allt hugrakkt fólk sem tók afstöðu með Jehóva og við getum lært margt af því.

Bænin er mikilvæg

5–7. Hvernig fékk Páll það hugrekki sem hann þurfti til að standast harðar ofsóknir?

⁵ Hvernig getum við líkt eftir hugrökkum körlum og konum sem sagt er frá í Biblíunni? Þessir einstaklingar voru ekki endilega hugrakkir að eðlisfari. Þjónuðu þeir Jehóva trúfastlega í eigin krafti? Nei, það þurfti meira til. Hvað var það?

⁶ Lítum til Páls postula. Í Filippí réðst æstur múgur á þá Sílas. Ráðamenn borgarinnar rifu af þeim fötin og létu hýða þá. Síðan var þeim varpað í fangelsi og fætur þeirra festir í stokk. (Post. 16:12, 19–24) Var Páll hræddur við að boða trúna eftir að þeim var sleppt? Það hefði verið eðlilegt. En Jehóva hafði fengið Páli verk að vinna og borgin Þessaloníka var næsti viðkomustaður. Hvað veitti honum þann styrk og hugrekki sem hann þurfti?

⁷ Hann skrifaði síðar: „Okkur var misþyrmt og við þjáðumst í Filippí eins og þið vitið, en við tókum í okkur kjark með hjálp Guðs til að flytja ykkur fagnaðarboðskap hans þótt andstaðan væri mikil.“ (1. Þess. 2:2) Páll vissi að hann þurfti hugrekki til að gera það sem Guð hafði falið honum. En hvaðan fengi hann það? Bjó hann sjálfur yfir einhverjum innri styrk sem hann leitaði í? Nei, hann tók í sig kjark „með hjálp Guðs“. Hann bað Jehóva um að veita sér hugrekki og Jehóva svaraði auðmjúkri bæn hans.

8. Hvernig getum við líkt eftir Páli þegar okkur skortir hugrekki?

⁸ Þú getur notað sömu aðferð og Páll. Þú þarft ekki að velta fyrir þér hvort þú búir sjálfur yfir nægu hugrekki og innri styrk. Leitaðu heldur til Jehóva Guðs í bæn og biddu hann um að gefa þér þann kjark sem þú þarft. – Post. 4:29.

9. Hvers vegna er skynsamlegt að biðja Jehóva um meiri trú?

⁹ Þú getur líka beðið föður þinn á himnum um trú því að trú er nátengd hugrekki. Trú er þáttur í ávexti heilags anda Jehóva. (Gal. 5:22, 23) Hún er líka hluti af andlegu herklæðunum sem allir kristnir menn þurfa. (Ef. 6:16) Kristin trú er svo sterkt afl að Biblían segir að hún hafi ‚sigrað heiminn‘. (1. Jóh. 5:4) Trúin á Jehóva er besta undirstaða hugrekkis. Ef þú ert algjörlega sannfærður um að Jehóva hjálpi þér í erfiðleikum geturðu verið hugrakkur hvað sem á dynur. Við höfum því öll ærna ástæðu til að biðja eins og postular Jesú: „Gefðu okkur meiri trú.“ – Lúk. 17:5.

‚Verið hugrökk‘

10, 11. Af hverju lagði Páll áherslu á hugrekki þegar hann skrifaði kristnum Hebreum?

¹⁰ Þegar Páll skrifaði kristnum Hebreum í Jerúsalem og nágrenni vissi hann að erfiðir tímar væru skammt fram undan. Jesús hafði spáð að skelfileg eyðing biði borgarinnar og sá tími nálgaðist óðum. (Lúk. 19:41–44; 21:20–24) Hvernig minnti Páll þá á að hugrekki væri mikilvægt? Lítum aftur á það sem haft er eftir honum í inngangsorðum bókarinnar. Hann minnti þá á hlýlegt loforð Jehóva: „Ég mun aldrei snúa baki við þér og aldrei yfirgefa þig.“ Hvaða áhrif gat þetta loforð haft á þá? Páll svarar því: „Við getum … verið hugrökk og sagt: ‚Jehóva hjálpar mér, ég óttast ekki neitt. Hvað geta mennirnir gert mér?‘“ – Hebr. 13:5, 6.

¹¹ Þótt Biblían gefi ekki miklar upplýsingar um eyðingu Jerúsalem árið 70 er eitt víst: Trúfastir þjónar Jehóva í borginni fylgdu innblásinni hvatningu Páls. Þeir tóku í sig kjark til að hlýða orðum Jesú um að ‚flýja til fjalla‘ á hárréttum tíma. – Lúk. 21:20, 21.

12. (a) Hvernig getur þú verið hugrakkur í erfiðleikum? (b) Hvernig hafa sumir sýnt einstakt hugrekki á síðustu dögum þessa heims og hvað ætlar þú að gera? (Sjá rammagreinina „Verum hugrökk eins og þau“.)

¹² Með hjálp Jehóva getur þú líka verið hugrakkur, bæði í núverandi erfiðleikum og þeim sem eru fram undan. (Esek. 38:1, 2, 10–12; Matt. 24:21) Gleymdu aldrei að Jehóva hefur lofað að vernda okkur. (Esek. 38:19–23; 2. Þess. 3:3) Hann yfirgefur aldrei þá sem elska hann og treysta honum. Jehóva hvatti Jósúa til að vera „hugrakkur og sterkur“ og hann veit að þú getur verið það líka. (Jós. 1:7, 9, 18) Munum alltaf eftir hlýlegri hvatningu Jesú: ‚Verið hugrökk.‘ Hann lofaði að senda þér heilagan anda Jehóva og þú mátt vera viss um að hann stendur við það. Þannig færðu hugrekki til að vera Jehóva trúr í öllum raunum. (Jóh. 14:26; 15:26, 27; 16:33) Við höfum því fulla ástæðu til að vera hugrökk.

13. Hvað getur verið þér hvatning til að sýna hugrekki?

¹³ Sjáðu fyrir þér hvernig það verður þegar allir á jörðinni búa við frið og við tökum á móti þeim sem Jehóva hefur varðveitt í minni sér og reisir upp frá dauðum. Hugsaðu þér að fá að hitta hugrakka karla og konur sem við höfum rætt um í þessari bók – og ótal aðra! Heldurðu að eitthvert þeirra sjái eftir því að hafa þjónað Jehóva í heimi Satans, jafnvel þótt það hafi kostað þau lífið? Auðvitað ekki. Og hvað um þig? Það verður spennandi að fá að vinna með þeim að því að breyta allri jörðinni í paradís. Heldurðu að þú munir sjá eftir að hafa sýnt hugrekki og hafa elskað Jehóva á síðustu dögum þessa heims? Það er ólíklegt. Haltu þá áfram að vera hugrakkur allt til enda. Þú munt gleðjast yfir því um alla eilífð.