Enero

Maysa kadagiti kararagsakan a kanito iti biag ti agassawa ket ti pannakaipasngay ti anakda. Ngem uray ay-ayaten dagiti nagannak ti kayyanak nga anakda, saanda a kayat nga agnanayon lattan nga ubing ti anakda. Kinaagpaysuanna, madanaganda unay no saan a dumakkel ti anakda. Kasta met, nupay maragsakan ni Jehova no rugiantayon nga am-ammuen isuna, dina kayat nga agtalinaedtayo nga ubbing iti naespirituan. (1 Cor. 3:1) Imbes ketdi, kidkiddawenna nga “agbalin[tayo] a nataengan” a Kristiano. Iti Biblia, ti Griego a sao a naipatarus kas “nataengan” ket mabalin met a kaipapananna ti “manakem,” “perpekto,” ken “kompleto.” (1 Cor. 2:6) No kasano a ti ubing ket agtultuloy a dumakkel agingga nga agbalin nga adulto, masapul met nga itultuloytayo a padakkelen ti ayattayo ken Jehova. Iti kasta, agmataengantayo iti naespirituan. Siempre, uray no nataengantayon iti naespirituan, masapul nga itultuloytayo latta ti rumang-ay.—1 Tim. 4:15. w24.04 2 ¶1, 3

Adda kadin ti nagsaludsod kenka iti, ‘Asino ni Jehova para kenka?’ Baka ti insungbatmo ket, ‘Ni Jehova ti Amak, Diosko, ken Gayyemko.’ Ngem adda pay sabali a titulo ken sasao a mangdeskribir ken Jehova. Naibagam kadin ti, ‘Ni Jehova ti mangsangsangaili kaniak’? Inkompara ni Ari David ti pannakigayyem ni Jehova kadagiti napudno nga agdaydayaw kenkuana iti relasion ti mangsangaili ken dagiti sangailina. Insaludsodna: “O Jehova, asino ti sangailiem iti toldam? Asino ti makapagyan iti bantaymo a nasantuan?” (Sal. 15:1) Iti daytoy a bersikulo, naammuantayo a posible nga agbalintayo a sangaili ni Jehova—kayatna a sawen, agbalin a gagayyemna. Agmaymaysa ni Jehova sakbay a nangparsua. Ngem idi naparsuanan ti inauna nga Anakna, isu ket kas ti manangsangaili a nangawis iti kaunaan a sangailina iti simboliko a toldana. Nakaragragsak ni Jehova iti baro nga akemna kas Manangsangaili. Ibaga ti Biblia a ti ‘nangnangruna a pakaragsakan’ ni Jehova ket ti Anakna. Ti met Anak, ti kaunaan a sangailina, ket ‘kanayon a naragsak iti sanguanan’ ti Amana a ni Jehova.—Prov. 8:30. w24.06 2 ¶1-3

Imadyinem daytoy nga eksena. Adda nasurok a 340,000 a lallaki a naguummong tapno pagbalinenda ni David nga ari iti intero nga Israel. Mangngegmo ti naragsak a panagiinnestoria ken panagkakanta a mangidaydayaw ken Jehova a nagallangogan iti katurturodan nga asideg iti Hebron. (1 Cron. 12:39) Karaman kadagiti adda sadiay ti agtutubo a ni Zadok a mabalin a saan a nadnadlaw ti adu a tattao. Ngem sinigurado ni Jehova a maammuantayo nga adda sadiay ni Zadok. (1 Cron. 12:22, 26-28) Ni Zadok ket maysa idi a padi a nasinged a katrabahuan ti Nangato a Padi a ni Abiatar. Maysa met a pumaparmata ni Zadok. Inikkan isuna ti Dios iti sirib ken abilidad a mangammo iti pagayatanna. (2 Sam. 15:27) Natured ni Zadok. Bayat dagitoy maudi nga al-aldaw, ikagkagumaan ni Satanas a pakapuyen ti pammati dagiti adipen ti Dios. (1 Ped. 5:8) Masapul nga agbalintayo a natured bayat nga ur-urayentayo a dadaelen ni Jehova ni Satanas ken ti dakes a sistemana. (Sal. 31:24) Iti kasta, matuladtayo ti kinatured ni Zadok. w24.07 2 ¶1-3

Idi pinarsua ni Jehova ti umuna a lalaki ken babai, kayatna nga agbalinda a naragsak. Inikkanna ida iti nagpintas a pagtaengan, sagut a panagasawa, ken makapnek a trabaho. Punnuenda ti daga kadagiti annakda, ket pagbalinenda a paraiso a kas iti hardin ti Eden ti intero a daga. Ngem adda laeng maysa ken simple a bilin a masapul a surotenda. Pinakdaaranna ida a no igagarada a sukiren dayta a bilin, sigurado a mataydanto. Ammotayo ti napasamak. Simrek iti eksena ti maysa nga espiritu a parsua a saan a mangay-ayat iti Dios wenno kadakuada. Sinulisogna da Adan ken Eva tapno agsukirda iti Dios. Sinurotda ti kayat dayta a dakes nga espiritu a parsua, ni Satanas. Saanda a nagtalek iti naayat nga Amada isu a nagbasolda. Kas ammotayon, husto ti imbaga ni Jehova. Sipud iti dayta nga aldaw, masapul a sagabaendan dagiti resulta ti inaramidda: limmakay ken bimmaketda, ken kamaudiananna, natayda.—Gen. 1:28, 29; 2:8, 9, 16-18; 3:1-6, 17-19, 24. w24.08 3 ¶3

Kayat ni Jehova ken ti ipatpategna nga Anak a naragsaktayo. Kuna ti Salmo 119:2: “Naragsak dagidiay mangtungtungpal kadagiti pammalagipna, a mangbirbirok kenkuana iti amin a pusoda.” Inkari met ni Jesus: “Naragragsak ketdi dagidiay dumdumngeg iti sao ti Dios ken mangtungtungpal iti dayta!” (Luc. 11:28) Naragsak a tattao dagiti agdaydayaw ken Jehova gapu ta inaldaw a basbasaentayo ti Sao ti Dios ken ikagkagumaantayo nga iyaplikar dagiti masursurotayo. (Sant. 1:22-25) No aramidentayo dayta, maparagsaktayo ni Jehova. (Ecl. 12:13) No iyaplikartayo dagiti mabasatayo iti Sao ti Dios, mapasayaattayo ti relasiontayo iti pamiliatayo ken lumagda ti pannakigayyemtayo kadagiti kapammatiantayo. Kasta met, saantayo a mapadasan ti adu a problema dagidiay saan a mangsursurot iti dalan ni Jehova. Umanamongtayo la ketdi ken Ari David. Kalpasan a dinakamatna iti kantana dagiti linteg, bilin, ken panangukom ni Jehova, imbagana: “No tungpalek ida, dakkel a gunggona ti masagrapko.”—Sal. 19:7-11. w24.09 2 ¶1-3

Makitkita ni Jehova ti amin a mapaspasaran dagiti adipenna ditoy daga. Ammona no naragsak wenno naladingitda. (Sal. 37:18) No makitkitana nga ikagkagumaantayo ti agserbi kenkuana uray no adda dagiti nasaem nga ib-ibturantayo, ipagpannakkelnatayo unay! Ngem saan la a dayta, magagaran met a tumulong ken mangliwliwa kadatayo. Kuna ti Salmo 147:3 a ‘bedbedan ni Jehova dagiti sugat’ dagiti nasaktan ti pusoda. Nailadawan ditoy ni Jehova a sidudungngo a mangay-aywan kadagidiay nasaem ti marikriknada. Ania ti aramidentayo tapno magunggonaantayo iti panangaywan ni Jehova? Kitaentayo ti maysa nga ilustrasion. Nagdakkel ti maitulong ti maysa a nalaing a doktor tapno umimbag ti maysa a masakit. Ngem tapno umimbag ti masakit, masapul a surotenna ti amin nga instruksion ti doktor. Babaen ti Saona, arigna makisarsarita ni Jehova kadagidiay maladladingitan gapu iti nasaem a marikriknada ken ipapaayanna ida iti nadungngo a balakad. w24.10 6 ¶1-2

Iti napalabas, ibagbaga dagiti publikasiontayo ti mapasamak kadagidiay inukom ni Jehova kas nakillo. Ibagbagatay idi nga awanen ti namnamada a mapagungar. Kitaentayo ti dadduma a salaysay ti Biblia maipapan iti panangukom ni Jehova kadagiti nakillo. Kas pagarigan, idi tiempo ti Layus, dinadael ni Jehova ti amin a tattao malaksid ken Noe ken ti pamiliana. Kasta met, binilinna dagiti Israelita a dadaelenda dagiti umili ti pito a nasion nga agnanaed iti Naikari a Daga. Ken adda met idi tiempo a nangibaon iti anghel a mangpapatay iti 185,000 nga Asiriano a soldado iti maysa laeng a rabii. (Deut. 7:1-3; Isa. 37:36, 37) Kadagita a pasamak, adda kadi umdas nga impormasion iti Biblia tapno maibagatayo nga amin dagita a tattao ket sinentensiaanen ni Jehova iti agnanayon a pannakadadael, ken saanna idan a pagungaren? Awan. Saantayo nga ammo no kasano nga inukom ni Jehova ti tunggal maysa kadakuada. Saantay met nga ammo no dagiti napapatay ket naaddaan iti gundaway a mangam-ammo ken Jehova ken agbabawi. w24.05 3 ¶5-7

Dinakamat ni Jesus ti maysa nga ilustrasion maipapan iti balo a namin-adu a nagpakpakaasi iti maysa a hues tapno magun-odna ti hustisia. Sigurado a naawatan ti adu nga adalan ni Jesus ti narikna ti balo. Ngamin, dagiti ordinario a tattao idi ti masansan a biktima ti kinaawan hustisia. (Luc. 18:1-5) Maawatantayo met ti narikna ti balo ta mabalin a napasarantayo aminen ti kinaawan hustisia. Adu a tattao iti lubong ita ti manangidumduma, naagum, ken saan a naasi. Gapu kadagita, ammotayo a no dadduma, mabalin a saan a patas ti pannakatratotayo. (Ecl. 5:8) Ngem baka mas maupaytayo no saan a nasayaat ti panangtrato kadatayo ti maysa a kabsat. Siempre, dagiti kakabsat ket saan met ketdi a kas kadagiti bumusbusor iti kinapudno. Imperpektoda laeng ngamin. Adu ti masursurotayo iti reaksion ni Jesus idi nakapasar iti kinaawan hustisia gapu kadagiti bumusbusor. No maanusantayo dagiti bumusbusor a saan a nasayaat ti panangtratoda kadatayo, di mas lalo koma pay nga anusantayo dagiti kapammatiantayo! w24.11 2 ¶1-2

Ti tinapay ti kangrunaan a taraon ti adu a tattao a nadakamat iti Biblia. (Gen. 14:18; Luc. 4:4) Kinapudnona, nakapatpateg dayta, ta adda dagiti gundaway nga inusar ti Biblia ti sao a “tinapay” a tumukoy iti taraon. (Mat. 6:11; study note ti Acts 20:7) Inusar met ni Jesus ti tinapay iti dua kadagiti nalatak a milagrona. (Mat. 16:9, 10) Mabasatayo ti maysa kadagita iti Juan kapitulo 6. Kalpasan a nangasaba dagiti apostol ni Jesus, inkuyogna ida a bumallasiw iti Baybay ti Galilea tapno makapaginanada. (Mar. 6:7, 30-32; Luc. 9:10) Napanda iti awan matataona a lugar iti Betsaida. Ngem nadamag dagiti tattao nga adda ni Jesus sadiay, isu nga immun-unada payen a nakadanon. Saan ida a binaybay-an ni Jesus. Insurona kadakuada ti maipapan iti Pagarian ken pinaimbagna dagiti masakit. Idi mumalemen, pinampanunot dagiti adalanna no paggatangan dagiti tattao iti kanenda. Mabalin nga adda bassit a balon ti dadduma kadakuada. Ngem kaaduanna ti masapul a mapan kadagiti purok tapno gumatang iti kanenda.—Mat. 14:15. w24.12 2 ¶1-2

Perpekto idi ti immuna a nagannaktayo a da Adan ken Eva, ken agnanaedda iti napintas a paraiso. (Gen. 1:27; 2:7-9) Adda pay ketdi namnamada nga agbiag a naragsak iti agnanayon. Ngem saan a napasamak dayta ta nagbasolda. Napukawda ti Paraiso a pagnanaedanda ken ti namnamada nga agbiag nga agnanayon. Ania ngarud ti maipatawidda kadagiti agbalin pay la idi nga annakda? Kuna ti Biblia: “Babaen ti maysa a tao [ni Adan], simrek ti basol iti lubong ken ti ipapatay babaen ti basol, isu a matay ti amin a tao ta nagbasolda amin.” (Roma 5:12) Ti impatawid kadatayo ni Adan ket basol nga agresulta iti ipapatay. Dayta nga impatawidna a basol ket kas iti nagdakkel nga utang a saan a mabayadan ti asinoman kadatayo. (Sal. 49:8) Impada ni Jesus dagiti basoltayo iti ‘utang.’ (Mat. 6:12; Luc. 11:4) No agbasoltayo, kas man la nakautangtayo ken Jehova. Saantayo a kaya a bayadan dayta nga utang a datdatayo. Makabayadtayo laeng no mataytayo.—Roma 6:7. w25.02 2-3 ¶2-3

Ibilbilangtayo a pribilehio ti panangipakaammo iti sabsabali ti kinapudno maipapan iti Pagarian ti Dios! Saan a nakalukat dayta a pribilehio iti asinoman. Kas pagarigan, idi adda ni Jesus ditoy daga, saanna nga impalubos a dagiti dakes nga espiritu ti mangsaksi maipapan kenkuana. (Luc. 4:41) Ita, sakbay a mapalubosan ti maysa a makiraman iti ministerio a kadua ti ili ni Jehova, masapul a makualipikar nga umuna iti dayta a pribilehio. Ipakpakitatayo nga ap-apresiarentayo unay ti pribilehiotayo a mangipakaammo iti naimbag a damag kadagiti tattao, sadinoman ken kaanoman a posible dayta. Kas ken Jesus, ti kalattayo ket ti panangimula ken panangsibug iti bukel ti kinapudno maipapan iti Pagarian iti puso dagiti tattao. (Mat. 13:3, 23; 1 Cor. 3:6) Kas panangtulad iti ulidan ni Jesus, ar-aramiden ti organisasion ni Jehova ti amin a pamay-an tapno maammuan dagiti tattao ti nagan ti Dios. Kas pagarigan, impablaakna ti Baro a Lubong a Patarus ti Nasantuan a Kasuratan a nangisubli iti nagan ti Dios kadagiti orihinal a nagparanganna iti Biblia. Magun-odanen ti patarus daytoy a Biblia iti intero wenno dadduma a pasetna iti nasurok a 270 a lengguahe. w24.04 9 ¶8-9

Dadduma a brother a naragsak ti panagasawada nakairuamanda nga adda inaldaw nga aramidenda a mangipakita nga ay-ayatenda unay ni baketda. (1 Juan 3:18) Mabalin nga ipakita ti asawa a lalaki ti kinalailona ken baketna kadagiti simple a pamay-an kas iti panangiggemna iti imana wenno iti panangarakupna kenkuana. Mabalinna met a teksan ken ibagana, “I miss you” wenno “Komustakan?” Sagpaminsan a mabalin met nga agsurat iti agkakapintas a sasao iti kard tapno iyebkasna nga ay-ayatenna unay ni baketna. No aramiden dagita ti asawa a lalaki, mapadayawanna ni baketna ken mapalagdana ti relasionda kas agassawa. No padpadayawan ti asawa a lalaki ni baketna, pabpabilgenna isuna ken iparpariknana ti panangipategna kenkuana. Ti maysa a pamay-an a maaramidna dayta ket ti kanayon a panangipakita iti apresasionna iti amin nga ar-aramiden ni baketna para kenkuana. (Col. 3:15) Naragsak ken natalged ti rikna ti asawa a babai ken mariknana met a maay-ayat ken mapadpadayawan no naimpusuan nga ap-apresiaren isuna ni lakayna. w25.01 11 ¶15; 13 ¶16

Nagpatingga ti Salmo 15 iti daytoy a kari: “Dinto pulos maan-ano ti asinoman a mangaramid kadagita.” Imbaga ti salmista no apay a kayat ni Jehova nga aramidentayo ti amin a nadakamat iti dayta a salmo. Kayat ni Jehova nga agbalintayo a naragsak. Isu nga isursurona dagiti aramidentayo tapno bendisionan ken salaknibannatayo. Naraniag a masakbayan ti manamnama dagiti sangaili ni Jehova. Dagiti dinutokan ti espiritu ket agnaedto idiay langit a nangisaganaan ni Jesus kadakuada iti ‘adu a pagyanan.’ (Juan 14:2) Padpadaanan met dagidiay addaan iti naindagaan a namnama ti kaitungpalan ti kari iti Apocalipsis 21:3. Sigurado nga ibilangtayo amin a naisangsangayan a pribilehio ti panangawis kadatayo ni Jehova nga agbalin a gagayyemna, ti panagbalintayo nga agnanayon a sangailina iti toldana!—Sal. 15:1-5. w24.06 13 ¶19-20

Ania ti kaipapanan ti dayag? Iti Biblia, ti sao a “dayag” ket mabalin a tumukoy iti aniaman a mamagbalin iti maysa a persona a nakaskasdaaw. Impakita ni Jehova ti naisangsangayan a dayagna di nagbayag kalpasan nga insalakanna dagiti Israelita manipud iti pannakaadipenda idiay Egipto. Imadyinem daydi nga eksena: Minilion nga Israelita ti nagtataripnong iti sakaanan ti Bantay Sinai tapno sumangoda iti Diosda. Adda nangisit nga ulep a nangabbungot iti bantay. Pagammuan ta nagginggined iti napigsa, nagkimat, naggurruod, ken immaweng ti makatitileng nga uni ti tangguyob. (Ex. 19:16-18; 24:17; Sal. 68:8) Permi la ketdi ti siddaaw dagidi nga Israelita idi impakita ni Jehova ti dayagna. Ita, maipadayagtayo ni Jehova no ipakaammotayo ti maipapan iti nakaskasdaaw a pannakabalinna ken kadagiti nagsayaat a kualidadna. Maipadayagtayo met ti Dios no iturongtayo kenkuana ti dayaw kadagiti maar-aramidantayo gapu iti tulongna.—Isa. 26:12. w25.01 2 ¶2-3

Bayat nga agturturong dagiti Israelita iti Naikari a Daga, nagrebelde dagiti prominente a lallaki maibusor ken Moises ken kinuestionaranda ti akem nga inted ni Jehova kenkuana. Imbagada: “Nasantuan ti intero nga Israel [saan la a ni Moises,] ket adda kadakuada ni Jehova.” (Num. 16:1-3) Agpayso met ketdi a para iti Dios, nasantuan “ti intero nga Israel.” Ngem pinili ni Jehova ni Moises a mangidaulo iti ilina. Isu nga idi a ni Moises ket krinitikar dagiti rebelde, ni Jehova ti talaga a krinitikarda. Saanda a nagpokus iti kayat ni Jehova, no di ket iti kayatda—ti agbalin a prominente ken maaddaan iti ad-adu pay nga autoridad. Pinatay ti Dios dagiti nangidaulo iti panagrebelde, kasta met ti rinibu pay a dimmasig kadakuada. (Num. 16:30-35, 41, 49) Ita, siguradotayo met a kagura ni Jehova dagiti saan a mangraraem kadagiti urnos ti organisasionna. w24.07 11 ¶11

Kaaduan a tattao ita ti saan a mamati—ken um-umsienda pay ketdi—ti pakdaar ti Biblia nga agpatingga daytoy a sistema ti bambanag. (2 Ped. 3:3, 4) Nupay adu pay ti saantayo nga ammo, masapul a nabileg ti pammatitayo nga agpatingga daytoy a sistema ti bambanag iti umiso a tiempo ken kombinsidotayo nga aywanannatayto ni Jehova. Masapul met a pabilgentayo ti pammatitayo iti us-usaren ni Jehova ita a mangigiya kadatayo—“ti matalek ken masirib nga adipen.” (Mat. 24:45) Inton mangrugi ti dakkel a rigat, mabalin a makaawattayo kadagiti espesipiko ken makaisalakan nga instruksion. Itan ti tiempo a pabilgentayo ti panagtalek ken kompiansatayo kadagiti instruksion a maaw-awattayo manipud kadagiti mangidadaulo iti organisasion ni Jehova. Ngamin, no ita pay laeng ket marigatantayon a mangsurot kadagiti instruksionda, lallalo inton dakkel a rigat. w24.09 11 ¶11-12

Ammo dagiti Kristiano a nagannak a saanda a maipatawid iti anakda ti pammatida iti Dios. Isu nga addanto tiempo a mabalin a maisaludsodna: ‘Talaga kadi nga adda Dios? Agpayso kadi dagiti ibagbaga ti Biblia?’ Kinapudnona, iparparegta ti Biblia nga usarentayo ti ‘abilidadtayo nga agpanunot’ ken ‘siguraduentayo ti amin a banag.’ (Roma 12:1; 1 Tes. 5:21) Ngem kasanoyo a matulongan ti anakyo a mangpabileg iti pammatina? Paregtaenyo ti anakyo a mangbirok kadagiti ebidensia a talaga nga agpayso ti ibagbaga ti Biblia. No agsaludsod ti anakyo, usarenyo dayta a gundaway a mangisuro kenkuana no kasano ti agbirok kadagiti sungbat. Usarenyo dagiti alikamen iti panag-research, kas iti Watch Tower Publications Index ken Giya iti Panagsukimat Para Kadagiti Saksi ni Jehova. Iti Giya iti Panagsukimat, iti suheto a “Ti Biblia,” mabalin a kitaenna ti “Impaltiing ti Dios” tapno makabirok kadagiti ebidensia a ti Biblia ket saan la a nasayaat a libro nga insurat dagiti tattao. Imbes ketdi, dayta ti “sao ti Dios.”—1 Tes. 2:13. w24.12 14-15 ¶4-5

Kasano a matulad dagiti panglakayen ni Jesus? Masapul a sanayenda dagiti brother, uray dagiti agtutubo pay, a mangibaklay iti ad-adu pay a responsabilidad. Maawatan dagiti panglakayen nga adu pay ti masapul a sursuruen dagiti sansanayenda. Masapul nga ipaayanda ida iti naayat a balakad tapno makasursuroda ken makitada ti kinapateg ti panagbalin a napakumbaba, matalek, ken situtulok nga agserbi iti dadduma. (1 Tim. 3:1; 1 Ped. 5:5) Saan laeng a panangasaba no di ket panangisuro pay ti impabaklay ni Jesus a responsabilidad kadagiti adalanna. Mabalin a narikna idi dagiti adalan a saanda a maikari iti dayta a responsabilidad. Ngem nagtalek ni Jesus a kabaelanda dayta. Sigurado isuna ta imbagana kadakuada: “No kasano nga imbaonnak ti Ama, ibaonkayo met.”—Juan 20:21. w24.10 16 ¶15; 17 ¶17

Naisangsangayan nga ari ni David. Isu ket maysa met a musikero, mannaniw, mannakigubat, ken propeta. Adu a suot ti napasaranna. Iti adu a tawen, inlemlemmenganna ni Ari Saul a mayat a mangpapatay kenkuana. Idi nagbalinen nga ari, masapul manen nga isalakan ni David ti bagina ta kamkamaten isuna ti anakna a ni Absalom a mayat a mangagaw iti tronona. Ngem uray no naipasango ni David kadagita a problema ken nakaaramid iti sumagmamano a nadagsen a basol, nagtalinaed latta a matalek iti Dios agingga a natay. Imbilang isuna ni Jehova kas ‘makaay-ayo iti pusona.’ Sigurado la ketdi a magunggonaantayo no ipangagtayo ti balakad ni David! (1 Ar. 15:5) Kas pagarigan, kitaentayo ti balakad ni David iti anakna a ni Solomon a simmaruno kenkuana nga agari. Pinili ni Jehova dayta nga agtutubo a lalaki a mangitultuloy a mangisaknap iti nadalus a panagdaydayaw ken mangbangon iti templo a pagdaydayawan dagiti tattao iti Dios. (1 Cron. 22:5) Adu a pakarigatan ti pakaipasanguan ni Solomon. Ania ngarud ti imbalakad kenkuana ni David? Imbaga ni David iti anakna a no agtulnog ken Jehova, agballigi iti biag.—1 Ar. 2:2, 3. w24.11 10 ¶9-11

Adda dagiti masapul nga aramiden ti asawa a lalaki a mangkabkabil ken agsasao iti makapasakit ken baketna tapno maisublina ti nasayaat a relasionna ken Jehova ken ni baketna. Umuna, masapul a bigbigenna a dakes dagiti ar-aramidenna. Awan ti mailemmengna ken Jehova. (Sal. 44:21; Ecl. 12:14; Heb. 4:13) Maikadua, masapul nga isardengna ti panangabusona ken baketna ken balbaliwanna ti kababalinna. (Prov. 28:13) Maikatlo, bigbigenna a nasaktanna unay ni baketna ken ni Jehova, isu a masapul a naimpusuan a kiddawenna ti pammakawanda. (Ara. 3:19) Agpakaasi met ken Jehova nga ipaayanna iti tarigagay nga agbalbaliw ken tulonganna a mangkontrol iti panagpampanunot, panagsasao, ken ar-aramidna. (Sal. 51:10-12; 2 Cor. 10:5; Fil. 2:13) Maikapat, masapul nga agtignay maitunos kadagiti kararagna babaen ti panagsursurona a manggura iti amin a klase ti kinaranggas ken nasakit a panagsasao. (Sal. 97:10) Maikalima, dagus nga agpatulong kadagiti naayat a panglakayen iti kongregasion. (Sant. 5:14-16) Maikanem, masapul a mangaramid iti plano a makatulong kenkuana a mangliklik iti amin a dakes nga ar-aramidenna. w25.01 11 ¶14

Ay-ayatem kadi ni Jehova a Dios, a mangmangted kenka iti amin a nagsasayaat a sagut, agraman ti biagmo? Kayatmo kadi nga ipakita nga ay-ayatem isuna? Ti kasayaatan a pamay-an a maaramidmo dayta ket ti panangidedikarmo kenkuana iti biagmo ken panagpabautisarmo. No aramidem dagita, agbalinka a paset ti pamilia ni Jehova. Kas resultana, iwanwan ken aywanannaka ti Amam ken Gayyemmo gapu ta kukuanakan. (Sal. 73:24; Isa. 43:1, 2) No agdedikar ken agpabautisarka, maaddaanka met iti namnama nga agbiag nga agnanayon. (1 Ped. 3:21)Adda kadi manglaplapped kenka nga agpabautisar? No kasta, saanka nga agmaymaysa. Minilionen ti nangbalbaliw iti kababalin ken panagpampanunotda tapno makualipikarda nga agpabautisar. Nakaragragsak ken nakaregregtada itan nga agserserbi ken Jehova. w25.03 2 ¶1-2

Iti Biblia, dagiti basol ket masansan a mayarig iti nadagsen nga awit. Kastoy ti panangdeskribir ni Ari David kadagiti basolna: “Nalapunosak iti kaadu dagiti biddutko; kasda la iti nadagsen nga awit a diak kabaelan a susuonen.” (Sal. 38:4) Ngem no agbabawi dagiti nakabasol, pakawanen ida ni Jehova. (Sal. 25:18; 32:5) Ti Hebreo a sao a naipatarus kas “pakawanen” kaipapananna ti “ikkaten” wenno “bagkaten.” Isu a no pakawanennatayo ni Jehova, arigna ikkaten wenno ipanawna dagiti awittayo a mangpadpadagsen kadatayo. Adda pay sabali nga ilustrasion a mangipakita no kasano kaadayo ti pangipanan ni Jehova kadagiti basoltayo. Kuna ti Salmo 103:12: “No kasano ti kaadayo ti pagsingisingan ti init iti paglennekanna, kasta met ti kaadayo ti nangikabilanna kadagiti basoltayo.” Ti daya ti kaadaywan a lugar manipud iti laud. Dinto pulos agsabat dagita. Kayatna ngarud a sawen nga ipanaw ni Jehova ti basoltayo iti kaadaywan a lugar a mapanunottayo. Ipasigurado dayta kadatayo a talaga a naan-anay ti panangpakawan ni Jehova kadatayo! w25.02 9 ¶5-6

Kalpasan a nagsubli idiay langit ni Jesus, simimilagro a pinaimbag ni apostol Pedro ti maysa a lalaki a nayanak a pilay. (Ara. 1:8, 9; 3:2, 6-8) Adu a tattao ti nakakita iti dayta a milagro isu a napanda inaribungbongan ni Pedro. (Ara. 3:11) Ngem impalastog kadi ni Pedro dayta nga inaramidna? Saan. Agpayso a napadakkel ni Pedro iti kultura a pagaayat dagiti tattao ti kinaprominente wenno kinalatak. Nupay kasta, sipapakumbaba nga inturongna ti dayaw kada Jehova ken Jesus, saan ket nga iti bagina. Imbagana: ‘Babaen ti nagan ni Jesus ken ti pammatimi iti naganna, pimmigsa daytoy a lalaki a kitkitaen ken am-ammoyo.’ (Ara. 3:12-16) Matuladtayo ti ulidan ni Pedro no itultuloytayo a sursuruen ti agbalin a napakumbaba. Agaramidtayo iti naimbag para iti dadduma gapu ta ay-ayatentayo ni Jehova ken dagiti tattao, saan a gapu ta kayattayo ti maidaydayaw. Maipakitatayo a talaga a napakumbabatayo no pagragsakantayo ti agserbi ken Jehova ken kadagiti kakabsat, uray no saan a makitkita ti dadduma ti ar-aramidentayo.—Mat. 6:1-4. w25.03 10-11 ¶11-12

Naregregtatayo a mangasaba no agpokustayo iti ayattayo ken Jehova ken iti kaarrubatayo. (Mat. 22:37-39) Panunotem laengen no kasano karagsak ni Jehova no makitkitanatayo a mangar-aramid iti trabaho nga intalekna kadatayo ken no kasano karagsak dagiti tattao no rugiandan ti agadal iti Biblia! Panunotem met a posible a maisalakan dagidiay umawat iti mensahetayo. (Juan 6:40) Saanka kadi a makapanaw iti balayyo gapu iti nagduduma a rason? No wen, panunotem ti kayam nga aramiden tapno maipakitam ti ayatmo ken Jehova ken kadagiti tattao. Bayat ti COVID-19 pandemic, saan a makapanaw da Samuel ken Dania iti balayda. Iti dayta a narigat a tiempo, regular a nag-telephone witnessing-da, nagaramidda kadagiti surat, ken nangyadalda iti Biblia babaen ti Zoom. Uray no saanen a kas iti dati ti maar-aramidan da Samuel ken Dania, inaramidda ti amin a kabaelanda isu a naragsakda. w24.04 18 ¶15-16

Nupay saan met ketdi a ti panagasawa ti tulbek ti kinaragsak, kayat ti adu a single a Kristiano ti makiasawa, agtutubo wenno nataenganda man. Siempre, sakbayka nga agarem wenno makiinnarem, masapul a nabilegen ti relasionmo ken Jehova, nataenganen ti panagpampanunotmo, ken kabaelamon nga ibaklay dagiti pinansial a responsabilidad ti agbalin a pamiliam. (1 Cor. 7:36) Nagsayaat met no ammuem dagiti kualidad a birbirokem iti agbalinto nga asawam sakbayka nga agarem wenno makiinnarem. Ta no saan, baka mapalabasmo ti gundaway a maam-ammom ti nasayaat a pakiasawaam koma, wenno baka ti maaremmo ket daydiay saan a maibagay kenka. Siempre, ti nasayaat a pakiasawaan ket masapul a bautisado a Kristiano. (1 Cor. 7:39) Ngem saan a gapu ta Saksi ti maysa ket nasayaaten a pakiasawaan. Isu a mabalinmo nga isaludsod iti bagim: ‘Ania dagiti kalatko iti biag? Ania dagiti napateg a kualidad a birbirokek iti agbalinto nga asawak? Rasonable kadi dagiti eks-ekspektarek?’ w24.05 20 ¶1; 21 ¶3

Kas agnobio, ania ti aramidenyo no adda problema ken diyo pagkinnaawatan no dadduma? Kayat kadi a sawen dayta a saankayo nga agkabagayan? Saan met ketdi. Normal laeng iti amin nga agnobio ti saan nga agkinnaawatan no dadduma. Ti nalagda a panagasawa ket ti panagtipon ti dua a tao nga agrinrinnaem iti maysa ken maysa ken nakasagana a makibagay kadagiti nagdumaanda. Ti pamay-an ti panangsolbaryo iti problema ita ti pakakitaan no naballiginto ti panagasawayo. Isaludsodyo iti bagiyo: ‘Kayami ngata a pagsaritaan dagiti problema iti kalmado ken nadayaw a pamay-an? Nakasaganakami kadi a mangamin kadagiti kamalimi ken ikagkagumaanmi ti agbalbaliw? Alistokami kadi nga agpinnabus-oy, agpadispensar, ken agpinnakawan?’ (Efe. 4:31) Ngem no agnobiokayo pay laeng ket kanayonen nga adda diyo pagkinnaawatan wenno kanayonkayo nga agapa, posible a kastakayto latta inton agassawakayon. No naamirismo a saan a talaga nga isu ti nasayaat a pakiasawaan, nasaysayaat laengen nga agsinakayo. w24.05 29 ¶12

No natibker ken determinadotayo a mangaramid iti umiso ken no agdesisiontayo a naibatay kadagiti prinsipio ti Biblia, agbalintayo a nasayaat nga ulidan iti dadduma. No adalentayo ti Sao ti Dios ken patibkerentayo ti pammatitayo ken Jehova, agbalintayo a matalek kenkuana ken kadagiti pagalagadanna. Mailasintayo dagiti ulbod a pannursuro ken opinion a maikontra iti pampanunot ni Jehova. Saantayo a maimpluensiaan kadagita. (Efe. 4:14; Sant. 1:6-8) Matulongantayo met uray dagidiay mabalin a maipaspasango kadagiti pakasuotan. (1 Tes. 3:2, 3) Dagiti panglakayen ket natimbeng ti ugalida, nasimbeng ti panunotda, naurnos, ken nainkalinteganda. “Sursuroten[da] a naimbag ti mapagtalkan a sao” isu a mapatibkerda ti dadduma. (Tito 1:9; 1 Tim. 3:1-3) Maparparegtada dagiti kakabsat tapno agbalinda a regular kadagiti gimong, panangasaba, ken personal a panagadal. No problemado dagiti kakabsat, dakkel ti maitulong dagiti panglakayen tapno agtultuloy nga agpokusda ken Jehova ken kadagiti panggepna. w24.06 31 ¶16-18

Idi adda ni Jesus ditoy daga, insurona kadagiti tattao a magagaran ni Amana a mangpakawan kadatayo no makabasoltayo. Kitaentayo ti ilustrasion maipapan iti napukaw nga anak. Pinili dayta nga agtutubo ti pumanaw iti balayda ken agaramid iti dakes. Ngem idi “nakapagpampanunot,” nagsubli iti balayda. Ania ti reaksion ti amana? Imbaga ni Jesus a nupay no ti anak ket “adayo pay laeng, nakitan ni amana . . . , isu a timmaray a simmabat. Inarakupna ti anakna ket sidudungngo nga inagkanna.” Saanen a namnamaen ti anak a pakawanen pay ti amana isu a kiniddawna nga agserbi laengen nga adipen iti sangakabbalayan ni amana. Ngem inawagan isuna ni amana a “daytoy nga anakko” ken inawatna manen iti pamiliana. Imbaga ti amana: “Napukaw ngem nabirokan met laeng.” (Luc. 15:11-32) Idi adda pay laeng ni Jesus idiay langit, sigurado a namin-adu a nakitana ti kinaasi ni Jehova ken ti dagus a panangpakawanna kadagiti agbabbabawi a nakabasol. Talaga a makaliwliwa dayta nga insalaysay ni Jesus ken ipakitana a naasi ti Amatayo a ni Jehova! w24.08 11 ¶11-12

Ti maysa a Kristiano a nasimbeng ti panunotna ikagumaanna ti agdesision maitunos iti panagpampanunot ni Jehova. Ammo dayta a Kristiano nga awanen ti napatpateg iti biagna no di ti relasionna ken Jehova. Balanse ti panangmatmatna iti bagina ken bigbigenna a saanna nga ammo ti amin. Ipakpakitana met nga agpampannuray ken Jehova babaen ti masansan a panagkararagna a sipapakumbaba kenkuana. Bigbigentayo a masapul nga itultuloytayo ti agkararag ken Jehova aniaman ti abilidad wenno paglaingantayo. Masapul ngarud nga ikararagtayo ken Jehova ti panangidalanna, nangruna no agaramidtayo kadagiti napateg a desision. Agtalektayo nga ammona ti kasayaatan para kadatayo. Anian a yamantayo ta pinarsuanatayo ni Jehova nga addaan iti abilidad a mangipakita kadagiti kualidadna. (Gen. 1:26) Siempre, saantayo a naan-anay a matulad ni Jehova.—Isa. 55:9. w25.03 11 ¶13; 13 ¶17-18

Liklikantayo a kuestionaran ti motibo ti dadduma. No saan nga iyebkas ti dadduma ti apresasionda iti inaramidtayo, mabalin nga isaludsodtayo iti bagitayo: ‘Talaga kadi a saanda a managyaman, wenno baka nalipatanda laeng ti nagyaman?’ Posible nga adda ti dadduma pay a rason no apay a saan a kas iti namnamaentayo ti panangyebkasda iti apresasion. Mabalin nga agyamyaman met ti dadduma ngem marigatanda laeng a mangyebkas iti dayta. Baka mabain met ti dadduma nga umawat iti tulong lalo no isuda idi ti tumultulong iti dadduma. Aniaman ti rason, no talaga nga ay-ayatentayo dagiti kakabsat, saantayo a pagduaduaan ti motiboda ken itultuloytayo latta ti agbalin a naragsak a manangted. (Efe. 4:2) Agan-anuska. No maipapan iti kinaparabur, insurat ti masirib a ni Ari Solomon: “Ipuruakmo ti tinapaymo iti danum, ta masarakamto manen kalpasan ti adu nga aldaw.” (Ecl. 11:1) Isuro kadatayo dagita a sasao a no dadduma, maawattayo laeng ti apresasion ti sabsabali “kalpasan ti adu nga aldaw” wenno napaut a tiempo. w24.09 30 ¶18-19

No dadduma, maipakaammo iti kongregasion a ti maysa a kabsat ket natubngar. Iti kasta a kaso, mabalintayo latta ti makilangen kenkuana gapu ta nagbabawin ken insardengnan ti dakes nga ar-aramidenna. Paset latta isuna iti kongregasion ken kasapulanna ti pammaregta babaen ti pannakikaduana kadagiti kapammatianna. (Heb. 10:24, 25) Nupay kasta, adda nakaidumaanna no naikkat ti maysa iti kongregasion. ‘Isardengtayo ti makikadkadua’, “uray makipangan man la koma iti kasta a tao.” (1 Cor. 5:11) Kayat kadi a sawen dayta a naan-anay a liklikantayo isuna? Saan met. Siempre, saantayo a kalangen isuna. Ngem mabalin nga usaren dagiti Kristiano ti konsiensiada a sinanay ti Biblia no agdesisionda no awisenda a makigimong ti maysa a naikkat iti kongregasion a nalabit kabagianda wenno dati a nasinged a gayyemda. w24.08 30 ¶13-14