Benibile Tuu Mọ, Bá Benibilemụ Yọmị Yelaaemi Bara Ma Sụọtuunimi

1. Omịnị tebara kị mịẹtimi benibileyemị yelaaemi bara nimi ma o?

AYA KỊMỊ angọdịẹpaamọ Jehovah pịrịwẹrị benibiledaba, wo mịẹ pọwẹị nanamịnị! Bịsẹ pọwẹịmị Pentecost 33 C.E. kịmịama benibile wẹrị yetolumọye mịẹ ifie kpọ paamị. Bịsẹ yọmị kịmịotu benibile, bá benibilemịnị tuu kpọ kọn ẹrẹbịbị pịrịmị. (Acts 2:​38, 40, 41) Fịrịmọpaa-owei Paul kpọ tuu ifiemị “Christ tolumọ yebo” “benibile tolumọye kpọ sụọemi” bara gbaamị. (Heb. 6:​1, 2) Omịnị Bible bolouma bọlọụ tolumọmịnị yebo benibile tolumọye kpọ sụọemi, mọabịkpọ omịnị ebibara mị benibileyemị a sụọtuunimi agbẹị-emi. Tetuu a o?

2. Tetuu kị duonị omịnị ebibara benibileyemị a sụọtuunimi agbẹị-emi a o?

² Kịmị ebibara wó warị kẹrị kụrọmọdaba, ekime kị bo kpọ korogha fa baramị, omịnị benibileyemị ebibara sụọtuu nimi wẹrịemisẹ, baratụa wo pịrịwẹrị kụrọ peibolou nanamịnị. Omịnị aya ka benibile dọụmịnị, anịghakpọ benibile wẹrị biin kụraịama kị baịdẹ kpọ, benibilemịnị tuu nimi agbẹị-emi. Anịduonị, mị egberitịbịmị bei biibịbịbo wo mọ parụmịnị: Teeki benibile tuu a o? Te yeama kị Christtuuduo-kịmị benibile bolouma sụọemi a o? Bá tetuu kị duonị omịnị Daụ ẹrẹ mọ, Tọbọụ ẹrẹ mọ, bá yalịyalị tẹmẹ ẹrẹ mọ kọn benibilemịnị a o?

BENIBILEMỊNỊ TUUMỊ

3. Iné benibilemịnị yọmị teeki mịẹgaan paamọmịnị a o?

³ Iné benibilemịnị yọmị, ị́mịnị Jehovah mọ Jesus Christ mọ gbelemọ gesii kẹrịakịdẹ, iné mịẹtimi seibo a barasindẹ, Jehovah karịmụ yọ duonị, iné ụndụma deiyọama mịẹdẹ, Jesus kị Jehovah mọ kọn wo zụọbụọmọmụ bara peidẹ, bá Jehovah ogbo sụọmọ wẹrị wó dọụyọ bẹtịbị kị mịẹmụ bara kọn tẹẹbịbị mịẹdẹ bara kị mịẹgaan paamọmịnị. Ị́mịnị bei yebosẹ mịẹmụ bara kikoromọ, anịghakpọ angọdịẹpaamọ Jehovah pịrịwẹrị benibiledaba, ị́mịnị koro fagha fagha ụndụ ụwọụ ma wẹnịdẹ.

4. Ị́mịnị benima sụọ, bá paabomịnị yọmị teeki wo tuu a o? (Foto kpọ dii.)

⁴ Iné benibile ifiemị, iné angọsẹ kị beni bolouma sụọdẹ kị waị paabomị,a gbaamaba ị́mịnị fịị wẹrị á pịrị dibi, bá waị fịịyọ duo seribo bara k’emi. (Colossians 2:12 kpọ dii.) Benibile yọmị ị́mịnị, iné ụndụma mịẹtimi yebo deidẹ bara kị mịẹgaan paamọmịnị. Tetuu kị duonị omịnị bịsẹ bara gbaa ma o? Ị́mịnị beni bolouma sụọmịnịmị, ị́mịnị iné bọlọụ mịẹtimi seibosẹ a barasindẹ bara kị mịẹdịamịnị. Ị́ ba paabomịnịmị, ị́mịnị Ọkpọnanaowei dọụyọ mịẹmụ aya inyenrinbụọ nanadẹ bara kị mịẹdịamịnị.

5. Ị́mịnị benibile dọụmịnị duonị angọtọlọmọmịnị yọmị, tebara ka kị Noah arụ kaị fịrị mọ lei-emi a o? (1Peter 3:​18-21)

⁵ Wo 1Peter 3:​18-21 goo. Ị́mịnị Bible tolumọ timi benibile baramị, akị Noah arụ kaị fịrị tọnmọ a paaemi. Ị́mịnị bei tịẹkiri kị Jehovah tolumọ nimi wẹrị benibile dọụmịnịaba, fịrịmị kụrọ bụọemi bara ị́ mọ iroro a paaemi, anị Noah arụ kaị fịrị kpọ kụrọ ụ pịrị baramị. Ị́mịnị angọtụa bịsẹ kụrọ fịrịsẹ kị wẹnịmịnị? Bịsẹ bara. Tetuu kị duonị omịnị bịsẹ bara parụ ma? Noah kpọ bịsẹ bara kị mịẹmị. Ọkpọnanaowei kị arụ kaịmụ barasẹ gbaamị, Noah ba ụndụ zụọmụ yọ duonị, Ọkpọnanaowei gbaa bara kị dii arụ kaịmịnị. Noah peibolou akị Ọkpọnanaowei a tụa wẹrịemi duonị, Jehovah gbaa bara kị peiwẹrị aru kaịmị. Noah mịẹ baramị, ị́mịnị kpọ laa “Ọkpọnanaowei gbaamịnị yebosẹ” mịẹ a paaemi.—Gen. 6:22.

6. Benibilemịnị yọmị te ụwọụ ka zụọbụọmọye mịẹpaamọ ị́ pịrị a paaemi a o?

⁶ Wo 1Peter 3:21 diidaba, bịsẹ yọmị fịrịmọpaa-owei Peter benibilemịnị yọ kị “ánị ụndụbo zụọmịnị” bara gbaamị. Anịa iné angọsẹ akị beni bolouma tụamịnị yọ kị ị́ zụọ, anịghakpọ iné seibosẹ sụrụsindẹ bara fa. Anịa Jesus asịịn bẹtịbị kị iné mịẹdẹ seibosẹ kụọ serimịnị. (1John 1:7) Mọabịkpọ, benibilemụ yọmị yelaaemi. Tuubị, Jehovah kị omịnị benibile bara gbaamị, bá ị́ benibilemịnịmị, Jehovah peree ịkịọụ kọn ị́ pịrị bara kị ị́ mọ biimịnị. Ị́ benibiledaba, Jehovah pọwẹịtimi Jesus kụn ịkịan duonị, iné seibo kọn ị́ bụọmọmịnị. Bá inyenrintimi bẹseri bẹseri laamụ fomuun nanamịnị. Anịkị duonị benibilemịnị yọmị ị́ zụọmịnị bara wo mọ gbaa a paaemi. Anịduonị,

CHRISTTUUDUO-KỊMỊ BENIBILE BOLOUMA SỤỌEMI YEBO

7. Tebara ka kị benibile agbẹị-emi a o?

⁷ Benibilemịnị ifiemị, angọsẹ kọn beni bolouma sụọyọ bụọmọmị, Bible mị benibile gbelemọ yọmị zịnị biin egberiama gbaagha. Mọabịkpọ, Bible mị baratụa wo pịrịwẹrị benibile dọụmịnị ifiemị, mịẹ agbẹị-emi yeama nimimịnị. Gbaamaba, Bible tolumọ yebo baratụa wo pịrịwẹrị benibile dọụmịnị otubo tụa agbẹị-emi bịdẹ mọ, bá benibileye diimịnị otubo angọ wẹrịmụ bara mọ nimimịnị. (1Cor. 14:40; 1Tim. 2:9) Mị tịẹkirimị, itu-kosuotu kị kịmịotu kọn benibilemọmịnị, bịsẹ bara kị gbaa kpọ, omịnị bẹbẹ didụbamọye kọn á pịrị bara gbaagha. (1Cor. 1:​14, 15) Benibilemịnị ifiemị, diimịnị otubo biin-emi anịghakpọ, biingha kị gbaa kpọ, bịsẹ benibileyemị Jehovah tọrụ yọma yelaaemi.—Acts 8:36.

8. Benibile dọụmịnị otubo te maa biibịbịama kị parụmịnị a o, bá tetuu a o? (Acts 2:​38-42) (Foto kpọ dii.)

⁸ Bible mị, omịnị “kịmịsẹ yọ zụọbụọmọye pịrịmịnị peibolou” gbaa bara kọn wo kụrọmọ wẹrịemi, anị wo peibolou gbaa kịmịotu pịrịmịnị fịrịmị. (Rom. 10:​9, 10; “publicly declare” study note kpọ dii) Omịnị egberigbaa kịmịotu pịrịmịnị yọ bẹtịbị ka kị kịmịsẹ yọ zụọbụọmọye pịrịmịnị peibolou gbaamịnị bara fa, anịa wo benibile erein kị omịnị bịsẹ yọ mịẹgaan paamọ dẹịnmịnị! Bịsẹ tuu kị duonị, maa biibịbị kọn benibile dọụmịnị otubo biimịnị. Bọlọụ yemị, “Ị́ kpọ iné mịẹ seibo duo boloudei, iné angọdịẹpaamọ Jehovah pịrị, má Jesus Christ duotolu kị zụọbụọmọye ị́ laamịnị bara biberindẹ a o?” Mị biibịbịmị, ụbọmị angọtọlọmọdẹ kị benibile yọma boemi bara kị ditụamịnị, Peter kpọ Pentecost ifiemị mị bara tọrụ egberi gbaa benibile dọụmịnị otubo pịrịmị. Maamụkaramọ yemị, “Ị́mịnị angọdịẹpaamọ benibile daba ị́ kpọ bo Jehovah Iseri kịmị ka paadẹ, má wo ogbo mọ kẹnịsụọmọ wẹnịmụ bara nimi wẹrịemi a o?” Mị biibịbịmị, ụbọ mịẹmụ ye kị gbaa wẹrịemi, anị ụbọmị Jehovah ogbo bọọ emi bịnaotubo sụọmọ wẹrị, ogbo duo bomịnị yebosẹ mịẹmụ bara gbinipẹlẹdẹ. Bọlọụ kụraị sọnransii Christtuuduo otubo kpọ bịsẹ bara mịẹmụ bara gbinipẹlẹmị. (Acts 2:​38-42 goo.) Benibile dọụmịnị otubo ánị adụdụsẹ duo mị maa biibịbịbo yinye biberindaba, ámịnị laa benibile a paadẹ.

9. Kịmịsẹ teeki mịẹwẹrị Ọkpọnanaowei ikieotu a paamịnị a o?

⁹ Ị́mịnị naa bo gesii nimigha ifiemị, kaanghaba ị́mịnị kụrọ sei kpọ mịẹgha, bá gerede akpọ kị inyenrintimimị. Anịghakpọ Jehovah karịmịnị daụ mọ yin mọ kị ị́ ziimị, bá baratụa ị́ pịrịwẹrị Jehovah karịmịnị. Anịa bịsẹ bara k’emi kpọ, ị́mịnị Ọkpọnanaowei mịẹ bolouịmbẹlẹmọ dọụmịnịsẹ mọkpọ boloudei, bá benibile agbẹị-emi a o? Agbẹị-emi. Wosẹ Adam mọ Eve mịẹ seimị, wo angọma emi bara nimi agbẹị-emi, bịsẹ seimị wo mịẹ Ọkpọnanaowei mọ ikie kẹrị a paagha. (Ps. 51:5) Anịa, omịnị bo Jehovah nimi dẹịnmịnịmị, omịnị wó dọụyọ mịẹmụ yọ ka kị bọlọụdaamụ bara sẹlẹ angọ pịrịmị. Anịduonị, omịnị Jehovah dịsẹgha yesẹ a barasin wẹrị Jehovah mịẹ pọwẹịmụ yeama kị mịẹmịnị. Omịnị bịsẹ bara mịẹdaba, benibile a paadẹ.—Acts 3:19.

10. Ị́mịnị zịnị karịbụọ ka timi benibile wẹrị kpọ, mọkpọ teeki mịẹmịnị a o?

¹⁰ Fịrịmọpaa-owei Paul Ephesus ma zụa kịmịama mọ gbelei ifiemị, ámịnị naa Christ gbelemọ gesii nimigha timi benibile wẹrịmị, anịduonị Paul baratụa á pịrịwẹrị, ámịnị waị benibileb agbẹị-emi bara kọn angọ a nimimị. (Acts 19:​1-5) Mị Ephesus otubo mịẹ baramị, ị́ kpọ zịnị karịbụọ ka timi benibiledẹ wẹrị kpọ, bo Jehovah Iseri ụbọ a paamụ yọbị, ị́mịnị mọkpọ benibilemịnị. Tetuu a o? Ị́mịnị naa Jehovah mọ Jesus mọ gbelemọ gesii nimigha wẹrịmị. Ị́mịnị angọdịẹpaamọ tẹẹbịbị mịẹ Ọkpọnanaowei pịrịwẹrị kpọ, bịsẹ ifiemị, ị́mịnị naa ebibara wó dọụyọ nimigha wẹrị bịsẹ tẹẹbịbị mịẹmị. Ephesus otubo paamọ baramị mị ifie kpọ, kịmị ebibara Jehovah dọụyọ ma sụọtuu nimidaba, bịsẹ ifie kị Jehovah wó benibileye kẹrịakịmịnị.

“DAỤ ẸRẸ MỌ TỌBỌỤ ẸRẸ MỌ, BÁ YALỊYALỊ TẸMẸ ẸRẸ MỌ”

11. “Daụ ẹrẹ mọ, tọbọụ ẹrẹ mọ, bá yalịyalị tẹmẹ ẹrẹ mọ” kọn benibilemụ yọmị teeki wo tuu a o? (Matthew 28:​18-20)

¹¹ Jesus gbaa amọ aya tuuduo-otubo “Daụ ẹrẹ mọ, tọbọụ ẹrẹ mọ, bá yalịyalị tẹmẹ ẹrẹ mọ” ka kị benibile. (Matthew 28:​18-20 goo.) Jesus mị gbaa egberimị, teeki wo tuu a o? Bible mị, “ẹrẹ” gbaadaba, biin ifieama kọn kịmịotu akị ụbọ nimi wẹrịemi bara kị bẹmọ wẹrịemi. Kọn wó nana wẹrịemi fịrị mọ, bá wó nana wẹrịemi kụrọ kpọ bẹmọmịnị. Anịduonị, omịnị Jehovah ẹrẹ mọ, Jesus ẹrẹ mọ kọn benibiledaba, ámịnị kọkọ wo mịẹ agbẹị-emi ye gbaa wo pịrịmụ kụrọ nana wẹrịemi bara kị mịẹdịamịnị. Bá omịnị yalịyalị kụrọ ẹrẹ kọn benibiledaba, omịnị yalịyalị tẹmẹ bụọmọ wẹrị wo ụndụbo daamịnị bara kị mịẹdịa wẹrịemi. Wo wẹrị wo laa kọn bịsẹ bara mịẹ a paaemi bara kẹrị ẹrẹtei.

12. Omịnị tebara ka kị daụ ẹrẹ kọn benibilemịnị a o? (Revelation 4:11) (Fotob kpọ dii.)

¹² Daụ ẹrẹ kọn benibilemụ yọmị. Jehovah kị wo agọnọ daụ, bá ụndụ kọn wo pịrị owei bara wo mọ nimi wẹrịemi. Bịsẹ yọ bụọmọ kpọ, ómịnị kị Seridẹịn Ọkpọnanaowei, bá yebosẹ Tẹmẹowei. (Revelation 4:11 goo.) Jehovah kị tẹẹbịbị naamịnị bara wo mọ nimi wẹrịemi, anịduonị omịnị tẹẹ ụ yarịmịnị ifiemị, peree, bá didụbamọye nana bara ka kị wó ẹrẹ tịịn tẹẹ ụ yarịmịnị, bá mọkpọ gbaa kịmịotu kpọ pịrịmịnị. (Ps. 65:2) Pentecost mị Peter peitimi otubo, bịsẹ yebosẹ nimi wẹrịemi, mọabịkpọ, daụ ẹrẹ kọn benibilemụ yọmị, ámịnị mọkpọ zịnị ye nimi agbẹị-emi. Wo kpọ bịsẹ ye nimi agbẹị-emi, anị Jehovah kị Jesus duotolumị fagha fagha ụndụ kọn wo pịrịmụ bara nimi agbẹị-emi.—Rom. 5:8.

13. Omịnị tebara ka kị tọbọụ ẹrẹ kọn benibilemịnị a o? (Foto kpọ dii..)

¹³ Tọbọụ ẹrẹ kọn benibilemụ yọmị. Jesus kị Ọkpọnanaowei kpekpekẹnị tọbọụ bara wo mọ nimi wẹrịemi. Ómịnị kị “ụwọụmị,” wosẹ ụ duotolu kị Ọkpọnanaowei mọ ebi ikie nanamịnị. (John 14:6) Omịnị ụndụ nanamụ yọ kị duonị Jesus fịị wo pịrịmị, anịduonị, Jesus kị wo zụọbụọmọ owei bara wo mọ biberin wẹrịemi. Bịsẹ nimi ye nana yọmị wo dịnẹmọ wẹrị ereinbosẹ Jesus mịẹdịaye dimịẹmịnị, wo benibile erein bẹtịbịgha. (1John 2:6) Anịduonị, omịnị kpọ Jesus mịẹ baramị, angọtụa egberigbaamịnị yọmị kẹnịye kpọ bụọmọ wo tịẹmọgha fa. (Luke 4:43) Bá ụyamọye kị bo kpọ, Jehovah a barasingha bara inemịnị. (2Tim. 3:12) Jesus kị “ituma tịbịowei,” bara wo mọ nimi wẹrịemi duonị, omịnị pọwẹịtimi ụ kọn itu daa, bá kekeremịnị otubo gbaa bara diwẹnịmịnị.—Eph. 4:​8, 11, 12; 5:23.

14. (a) Omịnị tebara ka kị yalịyalị tẹmẹ ẹrẹ kọn benibilemịnị a o? (Foto kpọ dii.) (b) Agọnọ a múmịnị otubo te zịnị benibile yeama kị mịẹmịnị a o? (“Agọnọ Amúmụ Otubo Mịẹmụ Zịnị Benibile Yeama” ekpedi kpọ dii.)

¹⁴ Yalịyalị tẹmẹ ẹrẹ kọn benibilemụ yọmị. Omịnị yalịyalị tẹmẹ gbelemọ gesii kẹrịakị wẹrịemi. Gbaamaba, yalịyalị tẹmẹmị kịmịgha, anịghakpọ Ọkpọnanaoweigha, anịa yalịyalị tẹmẹ mị Ọkpọnanaowei kọn fịrị wẹnịmịnị kụrọ. Jehovah yalịyalị tẹmẹ kị kọn baratụa bụrụ-otubo pịrịwẹrị gbaa agbẹịye nimi, bá baratụa Bible gẹẹ otubo kpọ pịrịwẹrị wó dọụ yebo gẹẹ akị Bible bọọ tụa bara wo mọ nimi wẹrịemi. Anịduonị omịnị ifiebosẹ Bible goo, bá wo goo naa yebo dimịẹmịnị. (2Pet. 1:​20, 21) Bịsẹ yọ bụọmọ kpọ, omịnị kụrọ sei mịẹmụ yọ kilemịnị, tuumị, omịnị kụrọ sei mịẹdaba, Jehovah yalịyalị tẹmẹ mị ba wo angọma timigha fa, bá itu kpọ a timigha fa.—Eph. 4:30.

15. Omịnị teeki gbinipẹlẹ agbẹị-emi a o?

¹⁵ Ị́mịnị benibiledẹ Christtuuduo ụbọsẹ, “benibile gbelemọ tolumọ yebosẹ”c nimi ebimọmụ bara gbini angọ pịrị, bá iné angọdịẹpaamọ wẹrị benibile ifiemị kikoromọ Jehovah pịrịwẹrị yebo inyenrin beinmọ. Anịa ị́na benibileghaba, teeki iné benibilemụ yọ tịẹmọmịnị a o? Barịị egberitịbịmị, ị́mịnị mịẹdẹ kị laa benibilemụ bara kị kẹrị ẹrẹteimịnị.