Jisọs Kọla Ñwu Onubulẹ Ka Eti Obuga

Anubi ku ma f’Ucholo Elaloji che kpa, Jisọs kpai am’akọchẹ-wñ legwu ef’ewo Samaria du adabi alo ti Galili. Amẹru ef’ewo Saika, Jisọs kpo dago ugbo ku ma adọ obuga Jekọp. Alu ki na ñmi ọmọ, am’akọchẹ-wñ le t’efewo ku ma nya l’ujẹñwu.

Oñ onobulẹ ka lewa obuga lẹ ki kp’omi. Taki Jisọs ka ñwu kakini: “D’omi ñwu mi ku ñmọ.” Onobulẹ lẹ dohi ñwu kakini: ‘Ẹñwu chi k’ẹ kọla kp’omi? Onobulẹ Samaria u che. AmiJu la cha kọla kp’ẹnẹ Samaria n.’ Oñ Jisọs dohi ñwu kakini: ‘Uwẹ ma m’ẹnẹ k’u che, ẹ ma bi mi k’u d’omi ñw’ẹ, u ma la d’omi e-iñmi ñw’ẹ.’ Tak onobulẹ lẹ ti Jisọs ene kakini, ‘Ẹñwu ch’ofe ọla k’ẹ ka-i taa? Uwẹ la ne n’ẹñwu k’ẹ du kp’omi n.’ Oñ Jisọs dohi ñwu kakini: ‘Ẹnẹ duu ki añm’omi e-ku na adu ñwu ki dẹ-i, olugbẹ akp’ọ ogbegbelẹ gẹ n.’ Tak onubulẹ lẹ kakini: “Ọnẹnyi, agba d’omi lẹ ñwu mi.”

Ubilẹ, Jisọs ka ñwu kakini: ‘Lo k’ẹ nya d’ọkọ-wẹ omu wa e-mi.’ Tak onubulẹ lẹ dohi ñwu kakini: ‘U n’ọkọ n.’ Oñ Jisọs kakini: ‘Ochochi oñ ẹ ka-i. Onu mẹlu ẹ n’ọko-i, ọnẹkẹlẹ k’ẹ la anẹ abajọ-i ch’ọkọ-wẹ i che n.’ Tak onobulẹ lẹ dohi kakini: ‘U che li kaki akachẹ oñ ẹ che. Abo mi kẹdọno kakini a neke r’Ọjọ ojuwo ki dẹ. Amaa, amiJu kakini Jerusalẹm kate oñ a neke r’Ọjọ. U che kẹdọno kak ichẹñwu ki Mẹsaya lewa, i akọ wa ọna k’a r’Ọjọ le.’ Ubilẹ, Jisọs kọla ka, ki ma ka ñwu ẹnẹ duu kwobi ta n, i ka ñwu kakini: ‘Omi che Mẹsaya-i.’

Onobulẹ lẹ rule t’efewo, i la ka ñwu abo Samaria kakini: ‘U neju kak u fi Mẹsaya li mẹ. I che m’ẹñwu duu ki lugbo mi. Mẹ lewa ku mẹ go!’ Amonẹ lẹ la t’onobulẹ lẹ ubi w’obuga lẹ, ma la netiru ukọ ki Jisọs akọ.

Abo Samaria ka ñwu Jisọs ki b’uma gwugwu. Jisọs gwugwu ọmọ ọjọ meji, i la na kọ ma ẹñwu. E-lẹ jẹñwu amonẹ wewe kẹdọno Jisọs. Tak amonẹ lẹ ka ñwu onobulẹ lẹ kakini: ‘Ubi k’a netiru ọnẹkẹlẹ-i, a che ma jalii ka k’owñ ch’Ẹnajadu abo ilẹ.’