Jọn F’ọla Amonẹ Mu Anede Mẹsaya

Jọn ki ch’ọma Zẹkaraya kpai Elizabẹt mud’akachẹ iko ki gba. Jihofa du Jọn chekwu todu ki ka ñwu amonẹ ki la kọ ma kakini Mẹsaya awa. Gbake-ki Jọn ak’amonẹ ef’unyi ujeju ujeju amiJu abẹk ef’ewo ma, Jọn k’amonẹ ef’ajẹtachi. Amonẹ kwi Jerusalẹm kpai Judia todu ku ma wa kọchẹ kw’ugbo Jọn. I kọ ma kakini, ichẹñwu ku ma atene chẹñwu ki ajẹñwu ẹdọ Ọjọ ki bọ ru ma, i dukpẹ ku ma f’ọwọ no ẹbiẹnẹ eche. Ubi ku ma netiru ẹñwu ki Jọn aka ñwu ma, amonẹ wewe efu ma gbalu ẹbiẹnẹ-ma, oñ Jọn la na che ma baptism ef’Aji Jọrdan.

Jọn ko amẹñwu am’anana jọ n. Edudu inyakulumi oñ ma du hi ukpo ki Jọn anyi. Akpachi kpai omi iñọ la ch’ujẹñwu ki ajẹ. Amonẹ wewe atene m’ẹnẹ ki Jọn che. AmiFarisi kpai amiSadusi wewe ñọ wa dejudo Jọn gẹ todu ki che ma baptism. Amaa, Jọn ka ñwu ma kakini: ‘Mẹ chẹñwu ki adu ña kaku mẹ mu rida kwef ẹbiẹnẹ mẹ. Mẹ kaki mẹ ch’amọma Ebraham. Mẹ ki kpibe kak’e-lẹ jẹñwu mẹ ch’ẹnẹ ogbogaga n. Todu, i ch’e-lẹ adu ña k’amọma Ọjọ mẹ che n.’

Amonẹ wewe w’ugbo Jọn at’ọ ene kakini: ‘Ẹñwu i dukpẹ k’a che, k’a neke jẹñwu ẹdọ Ọjọ ki bọ?’ Jọn ka ñwu amiJu lẹ kakini: ‘Ẹnẹ duu ki n’afẹ meji ki k’oka ñwu ẹnẹ ki ma nẹ n.’ Ẹ che m’eñwu ki chi ki Jọn k’abalẹ? Jọn atene k’amakọchẹ-wñ ki ma kakini taku ma neke chẹñwu ki ajẹñwu ẹdọ Ọjọ ki bọ, otila i che ku ma fẹdọ amonẹ.

Jọn ka ñwu amagbọkọ-udu kakini: ‘Mẹ ki gb’ọkọ amonẹ t’alu k’ọda ka le n.’ I ñọ ka ñwu uchẹ am’isoja ka kakini: ‘Mẹ ki gb’ọkọ kw’ugbo ẹnẹ duu ọna uji n, mẹ ki la gwajọ ọlemi n’onẹ ofofo n.’

Amatama kpai abo Lifai ñọ wa tẹ Jọn ene kakini: ‘Ẹnẹ uwẹ che taa? Amonẹ wewe atene ma.’ Jọn dohi kakini: ‘Omi ch’ẹnẹ ki akpogwu ef’ajẹtachi, todu k’u ch’atẹko amonẹ ku ma wa rẹ Jihofa dabalu k’akachẹ Aizaya ka.’

Amonẹ añeju ẹñwu ki Jọn akọ ma lẹ, todulẹ amonẹ wewe chanẹ ekpibe ichẹñwu ki Jọn chi Mẹsaya. Amaa, Jọn ka ñwu ma kakini: ‘Ẹnẹ ki d’ubi awa-i che n’ukpahiu t’umi le. Omi nye nyọ bọjọ k’u na agwọ ẹda-wñ n. Omi n’omiofo che mẹ baptism, amaa ẹnẹ lẹ muda an’Afu Ki Afọ che mẹ baptism.’