Ojanẹ Ka Ki Adẹ Ogbegbelẹ

Odu ọjọ ka, Onu Nebiukadnẹza n’ọna ubailo ka. Ọna lẹ che d’ihianyi ñwu nyọnyọ, e-lẹ la jẹñwu ki neke lolu gb’ẹgba k’ọjọ ñwa gẹ n. Nebiukadnẹza kpuchẹ ru am’achifamu-wñ chakaa ku ma wa, i la ka ñwu ma kakini: ‘Mẹ k’ofe ọna k’u na ñwu mi.’ Oñ ma dohi ñwu Nebiukadnẹza kakini: ‘Uwẹ ki f’ọna k’ẹ na lẹ ka ñwu wa, O Onu.’ Amaa, Nebiukadnẹza ka ñwu ma kakini: ‘U f’ibe-mi mujọ kaki amẹ aka ọna k’u na lẹ ñwu mi-i. I ma dabalẹ n, na ko mẹ kpa.’ Oñ ma ñọ dabi dohi ñwu onu kakini: ‘Uwẹ ki f’ọna k’ẹ na lẹ ka ñwu wa ejodudu ta, ubilẹ awa la ak’ofe-wñ ñw’ẹ.’ Tak onu ñọ dabi ka ñwu ma kakini: ‘Mẹ f’alu mujọ ku mẹ na r’umi ọlemi alo waa. Mẹ ka ñwu mi ọna k’u na lẹ!’ Taku ma ñọ dohi ñwu onu kakini: ‘I n’ẹnẹ duu ef’ilẹ-i ki neke chẹñwu k’onu atene-i no! Ẹñwu k’onu atene-i che gbiti ololo.’

Ẹdọ Nebiukadnẹza mu kpabiẹ nyọnyọ, i la d’ọda ku ma f’amachifamu kp’amanibe ku ma d’ojanẹ lẹ chakaa kpa rinyọ. Daniẹl, Shedrak kpai Mishak manyu Abẹdnigo la defu abo k’onu ka ku ma kpa. Taki Daniẹl ka ñwu onu ki d’iko ñwu pẹẹ. Ubilẹ, owñ kpai amonukwu-wñ ch’adua ru Jihofa ki ch’atẹko ma. Ẹñwu Jihofa che?

Jihofa d’ọna ki Nebiukadnẹza na lẹ ñi Daniẹl lefu anẹ-ego, i la d’ofe ọna lẹ tejugede ñwu Daniẹl. Ọjọ ekeji, Daniẹl le t’ugbo adu onu, i la ka ñwu ma kakini: ‘Me ki kpa amanibe Babilọn rinyọ no! U neke k’ofe ọna k’onu na lẹ.’ Tak adu lẹ mu Daniẹl du le t’ọgba Onu Nebiukadnẹza. Oñ Daniẹl ka ñwu onu kakini: ‘Ọjọ ki d’efojale jẹñwu onu Nebiukadnẹza ma ẹñwu ki awa che ejọgba. Ọna k’ẹ na lẹ dẹ: Ẹ li ojibo lile ka, oji ojibo lẹ ch’ọjamalia yaala, agbẹdọ-wñ kp’ọwọ-wñ ch’ajifa, efu-wñ kpai uta-wñ ch’ebijekpa, ẹrẹ-wñ ch’ebije, adaba ẹrẹ-wñ ch’ebije kpai ikẹtẹ ki chẹ kpẹgwa ny’omunẹ. Taku ma f’okwuta kọda kw’ojuwo, i la ch’ọwọ onẹ ma nẹ k’okwuta lẹ da n, oñ i lewa nu ẹrẹ ojibo lẹ. I la f’u kpọfọ yẹgẹ-yẹgẹ tak afu mu ko rinyọ. Okwuta ki kp’ojibo lẹ fọ la mu d’uwo lile, oñ i f’ilẹ chakaa kpẹkọ.’

Ubilẹ, Daniẹl kakini: ‘Ẹñwu ki ch’ofe ọna k’ẹ na lẹ dẹ: Ọfẹ wẹ ch’oji e-ọjamalia lẹ. Ajifa lẹ ch’ojanẹ omunẹ ki awa ubi e-wẹ. Ubilẹ, i an’e-ki dab ebijekpa ki an’ọda anẹ ilẹ-i chakaa. E-ki arọno e-lẹ, agbiti dab ebije. Otitala-wñ, i an’ojanẹ ki akpẹru, i la an’ugbo k’ojanẹ lẹ agbiti dab ebije, i la an’ugbo ki ma la agbiti n dab ikẹtẹ. Okwuta ki rida t’uwo lile lẹ ch’Ojanẹ Ọjọ. Ojanẹ Ọjọ af’ojanẹ-i duu liẹ, ojanẹ lẹ kate la adago ogbegbelẹ.’

Nebiukadnẹza f’eju banẹ ma ọgba Daniẹl taki ka ñwu kakini: ‘Ọjọ wẹ d’ẹñwu-i tejugede ñwẹ-i. I n’Ọjọ duu ki dab owñ n.’ Gbake-i k’onu adu Daniẹl kpa, Nebiukadnẹza mu Daniẹl du ch’agboji amanibe kpai ẹnẹ ki n’ọda ojanẹ Babilọn chakaa. Ẹ li ọna ki Jihofa dohi adua Daniẹl le?