Abokolobia Mẹlẹ Ki Gb’omu Jihofa Gbọ

Iko ki Nebiukadnẹza ki ch’onu Babilọn k’amagboji Juda lo ti Babilọn, i jẹñwu adeju t’amẹñwu ki d’ologbo unyi onu, ki ch’agboji ma. Odu-wñ kọ Ashpẹnaz. Nebiukadnẹza ka ñwu Ashpẹnaz ki m’uchẹ ka kwefu abo Israẹl ki n’ọlafia añọla, ku ma la ch’okolobia ko wa. I ka ñwu k’abo ki ako wa ki ch’abo ku ma ma n’ọlọ duu ọla n, ku ma la ñọ gbeju. Ma ad’ọdọ mẹta kọ abokolobia lẹ alu ku ma achẹñwu le ojanẹ Babilọn. Ukọchẹ lẹ ajẹñwu ma ch’ẹnẹ ogbogaga ef’ewo Babilọn. Abokolobia lẹ anya kọchẹ alu ku ma ak’ichi ma ef’ewo Babilọn manyu alu ku ma agba kpai alu ku ma akọ gẹ . Onu m’ọda du tẹ kakini, ku ma na d’ujẹñwu k’onu ajẹ kpai omi k’onu añmọ ñwu ma. Uchẹ ka efu ma lẹ che Daniẹl, Hananaya, Mishaẹl kpai Azaraya. Ashpẹnaz la m’odu etitọ du ñwu ma, Daniẹl kọ Bẹltẹshaza, Hananaya kọ Shadrak, i la dọ Mishaẹl kọ Mishak, oñ i dọ Azaraya kọ Abẹdnigo. Ẹ neju kak ukọchẹ lẹ ajẹñwu ma d’ọwọ no erẹ Jihofa?

Abokolobia mẹlẹ-i chẹ tu ku ma na arẹ Jihofa alo waa. Abokẹlẹ-i che ma kak i dukpẹ ku ma j’ujẹñwu onu lẹ n, todu ọlọda Jihofa che du tejugede kak am’ujẹñwu lẹ fẹ n. Todulẹ ma ka ñwu Ashpẹnaz kakini: ‘Agba, ẹ ki jẹñwu wa j’ujẹñwu lẹ n, todu k’a we kp’ọla wa biẹ.’ Oñ Ashpẹnaz ka ñwu ma kakini: ‘Ichẹñwu k’ondu-mi li kakini añọla mẹ ch’utọ dabu abokolobia ki bọ n, edu mi kpa oñ i adu mi kpa o!’

Amaa, Daniẹl f’ibe ka kpẹ. Tak i ka ñwu Ashpẹnaz kakini: ‘Agba, ẹ ki d’eñmi kwẹkwẹkwẹ ñwu wa k’a jẹ, ẹ ki la d’omi ofofo ñwu wa k’a ñmọ ọjọ mẹgwa. Ubilẹ tak ẹ ch’ajama añọla-wa kpai añọla abokolobia ku ma aj’ujẹñwu e-onu.’ Tak Ashpẹnaz jẹ kp’ama.

Ubi ọjọ mẹgwa lẹ, ma li kakini añọla e-ma dẹ bọlọ bọlọ t’e-abokolobia chakaa ku ma aj’ujẹñwu onu lẹ le. Ẹdọ Jihofa chẹ bọ nyọnyọ alu ku ma gb’omu-wñ gbọ. Ọjọ la ñọ m’alu ku ma am’oji anẹ ego kpai ọna k’amonẹ ana du ñwu Daniẹl.

Alu k’iko k’onu datẹ ku ma kọ ma wa lewa jọ, Ashpẹnaz m’ọchakaa abokolobia lẹ ko le t’ọgba Nebiukadnẹza. Alu k’onu f’ọla ka ñwu ma, i li kakini i n’ẹnẹ duu ef’ọchakaa ma lẹ ki n’ofili dabu Daniẹl, Hananaya, Mishaẹl kpai Azaraya n. Todulẹ, ma m’ama mẹlẹ lẹ ko ku ma ch’ukọlọ ef’unyi onu. Nebiukadnẹza at’uma ene ku ma d’ibe-wñ oji am’ọla ogbogaga iko duu. Jihofa jẹñwu ma n’ibe t’amachifamu kpai am’anibe ku ma d’ojanẹ lẹ chakaa le ugbo mẹgwa.

Dagba ku ma d’ojanẹ omunẹ, Daniẹl, Hananaya, Mishaẹl kpai Azaraya gbenyọ kaki ma ch’abo Jihofa n. Uwẹ arewa Jihofa ugbo duu k’ẹ dẹ dagba k’ata abẹk iye-wẹ ma d’ọmọ kp’uwẹ ni?