Josaya Añeju Ọla Ọjọ

Josaya j’onu ojanẹ Juda iko ki ch’ọma ọdọ mẹjọ. Iko lẹ, amonẹ ach’ifamu, ma la ar’amojibo. Alu ki Josaya jọ ọdọ mẹgwẹfa [16], i kọchẹ ọna ki neke rẹ Jihofa l’ọna ki Jihofa atene. Alu ki jọ ọdọ ogwu [20], i chanẹ ekp’amojibo kpai am’ubọ ichẹbọ ki d’ojanẹ lẹ fọ rinyọ. Alu ki la jọ ọdọ ogwu ny’oke mẹfa [26], i jẹñwu ma ku ma f’unyi arẹ Jihofa ñwọche.

Ef’unyi Ọjọ ku ma añwọche lẹ, Hilkaya ki ch’agboji amatama li ọtakada ọlọda Ọjọ, i la neke ch’e-ki Mosis kọ. Akọtakada onu ku ma adọ Shafan m’ọtakada lẹ du w’ugbo Josaya, i la chanẹ egba dufu gbogbo. Alu ki Josaya na netiru ẹñwu ki na gba lẹ, i li kak abo Juda dọmọ ach’ẹñwu k’Ọjọ ma tene n, kw’ọdọ wewe mẹ. Onu Josaya ka ñwu Hilkaya kakini: ‘Jihofa awẹdọ b’uwa nana, lo k’ẹ nya tẹ Jihofa ene. Jihofa aka ñwu wa ẹñwu ki dukpẹ k’a che.’ Jihofa dohi lef’akachẹ onobulẹ ka ku ma adọ Hulda, i ka ñwu kakini: ‘Abo Juda hi-umi tinyọ mẹ. Na d’uchobi b’uma-ma, i muda ch’iko ki Josaya ch’onu n, todu i f’ọla-wñ hi wanẹ.’

Alu k’Onu Josaya gb’ọla lẹ, i le t’unyi Ọjọ tak i f’abo Juda chakaa dọ jeju. Ubilẹ, i f’ọtakada ọlọda Jihofa gba gbogbo ñwu ọgbọ amonẹ lẹ chakaa. Taki Josaya kp’amonẹ lẹ chakaa gbalu kaki ma aleb’ọda Jihofa kp’ọgbọ ẹdọ ma chakaa.

Abo ojanẹ Juda ch’uche Elaloji kw’ọdọ wewe n. Amaa, alu ki Josaya gb’ọlọda Jihofa ki kakini i dukpẹ ku ma ch’ucholo Elaloji ọdọ-ọdọ, i ka ñwu abo lẹ kakini: ‘Mẹ f’Elaloji jẹ ñwu Jihofa.’ Ubilẹ, Josaya f’ọla mu ki ch’ichẹbọ ñwu Jihofa, i la chi am’akeli ef’unyi Ọjọ. Tak abo ewo chakaa f’Elaloji jẹ kpai Uyọ Ibrẹdi k’Ọjọwu Ma Dọ N che, ma che ọjọ mebie. I n’Elaloji duu ku ma che ki dab’e-i mama kw’iko akachẹ Samuẹl n. Josaya añeju ọlọda Jihofa nyọnyọ. Ẹ ch’añeju ekọchẹ lugbo Jihofa?