Ọkogwu Jihofa Ki N’una

Bẹn-hadad ki ch’onu Siria dọmọ ad’ihianyi ñwu abo Israẹl ta. Amaa, akachẹ Ẹlaisha na ad’ufeti ñwu onu Israẹl iko duu lugbo ẹñwu ki Bẹn-hadad atene che. E-lẹ la jẹñwu ki neke f’abogwu Siria ọwọ. Todulẹ, Bẹn-hadad kpibe ki m’Ẹlaisha du mu. Alu ki gbọ kaki Ẹlaisha d’ugbo ka ku ma adọ Dotan, i kpẹ am’isoja-wñ ku ma lo nya mu Ẹlaisha.

Am’isoja lẹ le w’ọmọ odu. Alu k’ọjọ mu ñwa, adu Ẹlaisha dufu t’ugbọda tak i li am’isoja wewe ku ma l’efewo lẹ daka. I chanẹ ech’okpo, oñ i kwa dufu kakini: ‘Atoogwo ondu-mi, abu ache le taa?’ Tak Ẹlaisha dohi ñwu kakini: ‘Ẹ ki ch’okpo n, todu abo ku ma j’ugbo wa wewe t’abo ku ma j’ugbo ma le.’ Ẹrẹrẹ lẹ Jihofa m’eju adu Ẹlaisha chi, tak i li ojuwo lẹ ki chẹ kọ ñwu amanyẹla kpai ọkogwu e-una.

Iko k’amisoja lẹ atene ku ma mu Ẹlaisha, i ch’adua kakini: ‘Agba Jihofa jẹñwu eju amonẹ-i ki fọ.’ Ma muda na li anẹ, amaa ma m’ugbo ku ma dẹ n. Tak Ẹlaisha ka ñwu ma kakini: ‘I ch’ọna lẹ dẹ-i n, mẹ t’umi ubi k’u ko mẹ ny’ugbo ẹnẹ ku mẹ atene.’ Oñ ma t’Ẹlaisha ubi gbogbo w’efewo Samaria ugbo onu Israẹl.

Ẹgba k’abo Siria wa m’ugbo ku ma dẹ, i ñọ n’ẹñwu duu ku ma neke che gẹ n. Tak onu abo Israẹl t’Ẹlaisha ene kakini: ‘U mu ma ko kpa?’ Ẹlaisha d’iko ki dẹ-i ch’abo-i ẹbiẹnẹ ki koji ekpa ku ma le ku ma d’owñ kpa? Ehee. Ẹlaisha kakini: ‘Ẹ ki ko ma kpa n. K’ujẹñwu ñwu ma ku ma jẹ, k’ẹ la t’uma nọ ku ma lo ma.’ Tak onu f’ujẹñwu ojo lile hi ñwu ma, ma f’ẹñwu jẹ, i la jẹñwu ma mu dabi le t’unyi ma.