Jehoyada D’ẹdẹgbo Ña

Jẹzẹbẹl che n’ọma onobulẹ ka ku ma ad’odu-wñ kọ Atalaya, owñ onugo la che biẹnẹ dab iye-wñ. Atalaya ch’ọya onu abo Juda. Alu k’ọkọ-wñ lekwu, ọma-wñ ọnẹkẹlẹ f’onu jẹ. Amaa, alu k’ọma-wñ lekwu, Atalaya m’ọla-wñ du j’onu abo Juda. Ubilẹ, i che ki m’abo unyi onu chakaa ko kpa rinyọ dagba ki ch’amaju-wñ todu ki we n’ẹnẹ duu ki atukana onu kp’owñ. Todulẹ ọgbọ amonẹ duu ach’okpo-wñ.

Agboji amatama ku ma adọ Jehoyada kp’ọya-wñ Jehosheba che ma kak ẹñwu k’Atalaya ache lẹ che biẹnẹ nyọnyọ. Ma m’oji ọla-ma du t’ukwu lefu ed’ọma ọnẹkẹlẹ ka ef’amaju Atalaya k’odu-wñ kọ Joash maja. Ma n’ọma lẹ ef’unyi Ọjọ.

Alu ki Joash jọ ọma ọdọ mebie, Jehoyada f’amagboji abo unyi onu kpai abo Lifai dọ wa jeju. Tak i ka ñwu ma kakini: ‘Mẹ ki d’ide am’ọna unyi Ọjọ chakaa, mẹ la jẹñwu ẹnẹ duu ki gwudu n.’ Ubilẹ, Jehoyada mu Joash du j’onu abo Juda, i la m’ikẹbẹ onu du do Joash oji. Abo Juda d’omu nyatẹ na kwa kakini: ‘Oji onu ki gbo kakala!’

Onu onobulẹ Atalaya gbọ ekwukwu amonẹ alu ku ma na ra lo t’unyi Ọjọ. Alu ki li onu etitọ lẹ, i chanẹ ekpogwu kakini: ‘Alo ma che ny’umi-i! Alo ma che ny’umi-i!’ Amagboji unyi onu lẹ la gwọnyu Atalaya onu onobulẹ bibi lẹ, taku ma mu du le, ma la mu du kpa. Amaa, uche ẹbiẹnẹ k’i jẹñwu b’ewo lẹ ma ha?

Jehoyada jẹñwu amonẹ lẹ ku ma dabi f’alo kpẹ kpai Jihofa, ma la gbalu kaki Jihofa kate ama arẹ-i. Jehoyada jẹñwu ma f’amunyi ichẹbọ Beal kpai am’ojibo lẹ chakaa kpọfọ rinyọ. I chi amatama kp’abo Lifai, i la jẹñwu ma chanẹ ech’ukọlọ unyi Ọjọ todu k’amonẹ ki neke dabi chanẹ er’Ọjọ ọmọ. I chi amadide ku ma dide ọna unyi Ọjọ todu k’ẹnẹ ki ma fẹ n ki we gwudu t’unyi Ọjọ. Ubilẹ, Jehoyada kpai amagboji unyi onu mu Joash du le t’efu unyi onu, ma la mu du gw’oji akpẹtẹ onu. Ẹdọ abo Juda chakaa chẹ bọ, todu ma neke rẹ Jihofa kp’ẹdọ foo, i la n’okpo Atalaya echi abẹk erẹ Beal gẹ n. Ẹ li alu k’ẹdẹgbo ki Jehoyada nẹ ch’atẹko amonẹ wewe?