Ajogwu Kpai Ọma Kẹkẹ Ka

Ef’ewo Siria, i n’ọma kẹkẹ ka ki d’ugbo ki chẹ jiji r’abo akwọra unyi-wñ. Iko k’abo Siria k’ogwu b’abo Israẹl, ma m’ọma lẹ du le t’ewo-ma. Abajọ-i, ọma kẹkẹ lẹ mud’adu ki achẹñwu ñw’ọya agboji am’isoja k’odu-wñ kọ Neman. Ọma kẹkẹ lẹ arẹ Jihofa dagba k’abo ki d’ugbo-ma ar’ọjọ omunẹ.

Neman che n’ọga bibi ka ku ma adọ ki ikpemute. Iko duu Neman defu iwọ. Ọma kẹkẹ lẹ añeju ki ch’atẹko Neman, tak ọma lẹ ka ñwu ọya Neman kakini: ‘U che m’ẹnẹ ki neke ch’ọga ọkọ-wẹ kpa, akachẹ ka ku ma adọ ki Ẹlaisha ki def’ewo Israẹl neke ch’ọga-wñ kpa.’

Ọya Neman ka ñwu ọkọ-wñ ọla k’ọma kẹkẹ-i ka. Neman jẹ ki chẹñwu duu todu k’ọla-wñ ki che che mẹ. Todulẹ, i le t’unyi Ẹlaisha ojanẹ Israẹl. Neman neju kakini Ẹlaisha adufu w’ugbo-wñ ki kọla kp’owñ todu ki ch’ẹnẹ ojima. Amaa, gbake k’Ẹlaisha adufu w’ugbo-wñ, i f’onẹ kpẹ ki nya gw’ọ, k’i la ka ñwu ẹñwu ki ache k’ọga-wñ atakpa. I kakini: ‘Lo k’ẹ nya gw’ọla ef’aji Jọrdan onu mebie, tak añọla-wẹ adabi t’iko, oñ ọga-wẹ la atakpa.’

Ama, Neman chanẹ ewẹdọ, tak i kakini: ‘Omi neju kak i adufu wa tilaa, i la adago akwadọ odu Jihofa Ọjọ-wñ, tak i la ad’ọwọ-wñ l’oji ugbo k’ọga dẹ ọla-mi fẹfẹlẹ ki f’ọga ikpemute lẹ che kpa. Gbak’e-lẹ i ka ñwu mi k’u lo t’aji ki dẹ Israẹl. A che n’amaji ki nyọ t’ọchaka am’aji-i le Siria, ẹñwu chi ku ma neke gwọla-mi ọmọ k’ọla mi achẹ fẹ n?’ Oñ Neman mu wẹdọ rida dabi alo.

Amaa, amadu Neman ch’atẹko-wñ ki kpibe nyọnyọ lef ọla ku ma ka ñwu. Ma ka ñwu Neman kakini: ‘Ẹ chẹñwu duu ki ka ñw’ẹ k’ẹ che todu k’ọga wẹ ki takpa n? Ẹñwu k’akachẹ-i ka ñw’ẹ k’ẹ che chẹ lọla eche. Ẹñwu chi k’ẹ ma che k’ọga wẹ ki takpa n?’ Neman gb’ọla amadu-wñ gbọ. Oñ Neman le t’Aji Jọrdan, i la m’ọla-wñ du tunyu onu mebie dabalu ki Ẹlaisha ka. Ubi onu ẹkebie ki Neman dufu kwefu aji lẹ añọla-wñ mu dabi t’iko dabu añọla okolobia, ọga-wñ la takpa. Ẹdọ Neman bọ nana, tak i mu dabi lo nya gw’Ẹlaisha ugwa. Neman kakini: ‘Abajọ-i, u che ma kaki Jihofa ch’Ọjọ ochochi.’ Abu ẹ neju kak ẹdọ ọma kẹkẹ lẹ dẹ iko ki li kak ọga Neman takpa mẹ alu ki dabi w’unyi?