Onu Defid F’adure Ta

Defid f’onu jẹ ubi ki Sọl kwu. I ch’ọmọdọ ogwu-ẹgwa ẹgba ki j’onu. Ubi ọdọ gwẹẹ ki j’onu, anẹ ọjọ ka Defid t’oji unyi-wñ ale tak i li onobulẹ ka ki chẹ fẹ ọmẹmẹlẹ. Defid tejanẹ, tak i ma kak odu onobulẹ lẹ che Batsheba, kak ọya aj’ogwu ka ku ma adọ Uraya i che. Defid jẹñwu ma fu Batsheba dọ w’unyi-wñ, tak i la dachi kp’owñ. Batsheba la f’efu nyọ. Defid atene ed’ẹñwu ki che lẹ maja. Todulẹ, i ka ñwu ẹnẹ ki at’ọgba ogwu abo Israẹl kak i jẹñwu Uraya ki kwo t’ọgba ogwu ku ma la l’ubi ubi b’ọ tẹ. Ubilẹ ma f’Uraya kpa okogwu, taki Defid la mi Batsheba ọya Uraya du nẹ.

Ama Jihofa che li am’ẹbiẹnẹ gbaa ki Defid che. Ẹñwu Jihofa ache? Jihofa kpẹ akachẹ Netan lo t’ugbo Defid. Netan ka ñwu Defid kakini: ‘Anana ka che n’amala wewe, ama ẹnale ka la che n’ala kẹkẹ ka ki añeju nyọnyọ. Anana lẹ la m’ala okate k’ẹnale lẹ nẹ du.’ Defid mu wẹdọ. Tak i kakini: ‘Anana lẹ dukpẹ ki kwu!’ Netan dohi ñwu kakini: ‘Uwẹ ch’anana lẹ!’ Ọwọ fu Defid ọla, ẹdọ-wñ la mu kpabiẹ nyọnyọ. Tak i jẹ nyu Netan ọwọ kakini: ‘U f’adure ta nyu Jihofa mẹ.’ Adure ki dẹ-i n’ihianyi wewe wa ñwu Defid kpai akwọra unyi-wñ. Jihofa d’olofi ñwu Defid. I muda jẹñwu deju todu ki k’ochochi, ki la hiọla wanẹ.

Defid atene ki k’unyi ñwu Jihofa. Ama Jihofa chi ọma Defid k’odu-wñ kọ Solomọn ki k’unyi lẹ. Defid chanẹ ek’amẹñwu ku ma adu k’unyi lẹ jọ. Oñ i kakini: ‘I ch’otila k’unyi Jihofa ki n’uwohi kpai ojima. Solomọn gbokonẹ ta n, todulẹ na f’anẹ ukọlọ ñwọche jọ ñwu.’ Defid d’ọkọ nana tanẹ ku ma du ch’ukọlọ unyi lẹ. Defid tejanẹ abo ku ma meju ukọlọ nyọnyọ, i k’ọjamalia kpai ajifa manyu oli-sida kw’ewo Taya kpai Saidọn. Amẹr’ukpoji ọlai Defid, i mu ifoto ọna ku ma ak’unyi lẹ le du ñwu Solomọn. Tak i kakini: ‘Jihofa jẹñwu mi k’u da tanẹ chili chili ñwẹ alu k’ukọlọ unyi lẹ adẹ. Jihofa ach’atẹko wẹ, ẹ ki ch’okpo n. Ọla-wẹ ki da ef’ukọlọ lẹ n.’