Jonatan N’ẹdẹgbo, I La Ch’onukwu Ọmẹmẹlẹ

Ọmọgba Onu Sọl ọnẹkẹlẹ k’odu-wñ che Jonatan ch’ajogwu ki n’ẹdẹgbo. Defid kakini Jonatan ay’ọla t’ọrẹ le, i la n’ukpahiu t’idu le. Ọjọ ka, Jonatan li abogwu abo Filistia onẹ ogwu [20] ojuwo. Oñ i ka ñwu ẹnẹ ki ab’ọ n’anẹ ogwu-wñ kakini: ‘Ichẹñwu ki Jihofa m’ujiwe du ñwu wa, ẹgba lẹ tak a nya k’ogwu bọ ma. Ichẹñwu k’abo Filistia ka ñwu wa kakini mẹ lew’ugbo-wa, ẹgba lẹ oñ a tẹgwu ny’ọmọ na k’uja b’uma.’ Abo Filistia d’omu nyatẹ kakini: ‘Mẹ lew’ugbo-wa ku mẹ wa j’uja!’ Jonatan kpai ẹnẹ ki ab’ọ n’anẹ ogwu-wñ m’uwo lẹ tẹgwu ma la f’abogwu lẹ du.

Jonatan dukpẹ ej’onu ubi Sọl ata-wñ-i todu ki ch’owñ ch’ọmọgba Sọl ọnẹkẹlẹ. Ama, Jonatan che ma kaki Defid ch’ẹnẹ ki Jihofa chi ki j’onu ojanẹ Israẹl ubi Sọl. Tabalẹ, Jonatan ch’ulaka Defid n, i la liẹna-wñ n. Jonatan kpai Defid ch’onukwu ọlali. Ma gbalu ñwu ọla-ma kaki ma ajẹ t’ọla-ma ubi, ma la adide ọla-ma. Jonatan m’afẹ-wñ, manyu ugbada-wñ kpai ọfa-wñ kpai bẹliti-wñ gwọ ñwu Defid todu ki dago ñwu onukwu-ma.

Ẹgba ki Defid ara todu ki Sọl atene du kpa, Jonatan lo t’ugbo-wñ, i la ka ñwu kakini: ‘F’ẹdọ nẹ, ẹ ki la ch’okpo. Jihofa f’uwẹ chi todu k’ẹ ch’onu abo Israẹl mẹ, Sọl ata-mi onugo la che ma abalẹ.’ Ẹ ñeju k’ẹ n’onukwu ọmẹmẹlẹ dabu Jonatan?

Ẹgba wewe, Jonatan d’oji ọla-wñ t’ukwu todu ki ch’atẹko onukwu-wñ. I che ma kak Onu Sọl atene du Defid kpa. Todulẹ, i ka ñwu ata-wñ kakini: ‘Ichẹñwu k’ẹ fu Defid kpa, abẹk’ẹ f’udu fẹ ny’ẹnẹ ki ma ch’ẹbiẹnẹ n t’ebitele mẹ.’ Sọl che wẹdọ ru Jonatan nyọnyọ. Ubi ọdọ gwẹẹ, Sọl kpai Jonatan lekwu okogwu ọjọ kate.

Anubi ki Jonatan kwu, Defid tejanẹ ọma Jonatan ọnẹkẹlẹ k’odu-wñ kọ Mẹfibosẹt. Alu ki Defid fu Mẹfibosẹt li, i ka ñwu kakini: ‘Todu k’omi kpai ata-wẹ Jonatan ch’onukwu, na adejut’ẹ gbogbo ọjọ udeju wẹ. Ẹ gwugwu ef’unyi-onu, uwẹ la ajẹñwu oji itebulu onu.’ Defid gbenyọ onukwu-wñ Jonatan n.