Joshua Kpai Abo Gibiọn

Inabali lugbo ẹñwu ki che Jẹriko le gbogbo t’amewo ki dẹ Kenan. Am’onu Kenan jẹ ku ma k’ọwọ dama b’abo Israẹl j’ogwu. Ama, abo Gibiọn kpibe echẹñwu omunẹ ojoji. Ma n’ukpo ẹgbo w’ugbo Joshua, ma la ka ñwu kakini: ‘Ojanẹ ọnajiji oñ a kwo wa-i. A che gb’inabali lugbo ukọlọ lile ki Jihofa che ojanẹ Ijipt kpai Moab. Mẹ gbalu ñwu wa kaki mẹ k’ogwu bu wa n, a la ach’amadu mẹ.’

Joshua kẹdọno ọla ku ma ka, i la gbalu ñwu ma kaki ma k’ogwu bu ma n. Ubi ọjọ mẹta, Joshua fu ma kakini ma kw’ojanẹ ọnajiji n, kak ojanẹ Kenan ma kwo-i. Joshua t’abo Gibiọn lẹ ene kakini: ‘Ẹñwu chi ku mẹ ch’ugbeju nyu wa?’ Ma dohi ñwu kakini: ‘Todu k’a na railo! A che ma kaki Jihofa Ọjọ-mẹ aj’uja ñwu mẹ. Mẹ gba, mẹ ki kpa wa n.’ Taki Joshua che dabalu ki gbalu, i la t’uma nọ.

Tak’ẹ ma, am’onu Kenan mẹlu kp’abo ogwu-ma che ku ma k’ogwu bọ abo Gibiọn. Joshua kp’abo ogwu-wñ kwanẹ ulẹ kw’odu gbogbo gb’ọjọñwa ku ma ch’atẹko abo Gibiọn. Uja lẹ chanẹ odudu odudu. Abo Kenan mu kpatuka na ara alo. Jihofa f’okwuta ọmọjọcha kwefu ojale rọ nu ma ugbo duu ku ma ra tu. Joshua bi ki Jihofa ki jẹñwu olu ki kpo dago ugbo kate. Ẹñwu chi ki abi ki Jihofa ki jẹñwu olu ki ko dago ugbo kate dagba ki ma dabalẹ ma ma ta n? Todu ki Joshua kẹdọno Jihofa. Olu tunyanẹ gbogbo w’iko k’abo Israẹl du ef’ogwu ku ma ja kp’amonu Kenan many’abo ogwu-ma n.