Ẹnutọgba Etitọ Kp’abobulẹ Meji Ku Ma N’ẹdẹgbo

Ubi ki Joshua n’abo Jihofa le ọdọ wewe, i lekwu iko ki ch’ọdọ ọgbọmẹlu ny’oke mẹgwa [110]. Iko ki deju, abo Israẹl arẹ Jihofa. Amaa, ubi ki Joshua lekwu, ma chanẹ er’ojibo dabu abo Kenan. Todu ku ma kọ erẹ Jihofa, i jẹñwu onu Kenan k’odu-wñ kọ Jebin ki ch’uma ọbata. Tak abo Israẹl kwadọ Jihofa ki ch’atẹko ma. Ọñ Jihofa m’ẹnutọgba etitọ du dago ñwu ma. Odu-wñ kọ Berak. Owñ anya ch’atẹko abo Israẹl ku ma neke dabi chanẹ erẹ Jihofa.

Dẹbọra, ki ch’akachẹ onobulẹ kp’uchẹ ru Berak, todu i n’ọla ki Jihofa du kp’uchẹ ki ka ñwu Berak. Taki Dẹbọra ka ñwu kakini: ‘M’amonẹ icham ny’ọgwọkọ ugbo mẹgwa [10,000] ko rubi k’ẹ la t’uma ọgba tugbo abogwu Jebin ef’aji Kishọn. Ọmọ lẹ uwẹ anya fu Sisẹra ki ch’agboji abogwu Jebin du.’ Oñ Berak ka ñwu Dẹbọra kakini: ‘Ichẹñwu k’ẹ leb’umi, na le.’ Taki Dẹbọra dohi ñwu kakini: ‘Na aleb’ẹ. Amaa, uwẹ ki muda ma ki ch’uwẹ anya du Sisẹra kpa n. Jihofa kakini ef’ọwọ onobulẹ i adu Sisẹra tẹ ki kpa.’

Dẹbọra lebọ Berak kpai abogwu-wñ lo t’uwo Tebọr ku ma nya m’ọla ogwu. Ẹrẹrẹ ki Sisẹra gbọ, i m’ọchakaa ọkogwu-wñ kp’abogwu-wñ ko w’efu ukpolo. Taki Dẹbọra ka ñwu Berak kakini: ‘Eñini-i ch’ọjọ ki Jihofa ajẹñwu ọwọ wẹ ki bọ Sisẹra.’ Berak kpai abogwu onẹ icham ny’ọgwọkọ ugbo mẹgwa [10,000] mu gwọru kw’ojuwo ku ma nya kẹrẹbọ abogwu Sisẹra ku ma n’ukpahiu nyọnyọ lẹ.

Jihofa jẹñwu aji Kishọn ki ch’uwobi b’ọmọ ma. Am’ọkogwu Sisẹra kpo ma jef’ẹpiọ. Sisẹra mu rọ tanẹ kwef ọkogwu-wñ, i la chanẹ era kp’ẹrẹ ofo. Oñ Berak kpai am’isoja-wñ f’amisoja Sisẹra du. Amaa, Sisẹra ra le! I la nya maja ef’unyi onobulẹ ka ku ma ad’ọdu-wñ kọ Jeẹl. I d’omi ẹnya [imiliki] ñwu ñmọ, i la k’ukpo b’ọla Sisẹra ma. Taki Sisẹra m’olu du kpono todu ọla-wñ chẹ kpa nyọnyọ. Ubilẹ, Jeẹl m’ale unyiabo kpai hama du, tak i le yẹyẹ w’ugbo-wñ. Oñ i m’ale lẹ du do manyu oji-wñ, i la mu gudu wa tunyanẹ. Taki Sisẹra la lekwu.

Berak tene Sisẹra w’ọmọ. Taki Jeẹl mu daba dufu kwefu unyiabo-wñ, i la ka ñwu Berak kakini: ‘Na w’ejefu ku d’ẹnẹ k’ẹ tene ñ’ẹ.’ Berak le t’ejefu, i la li alu k’okwu Sisẹra dachi tanẹ ọmọ. Berak kpai Dẹbọra jẹnyu ñwu Jihofa lefu eli todu ki jẹñwu abo Israẹl ku ma neke f’amẹnọla-ma du. Abo Israẹl n’urẹdọ gbogbo ọdọ ọgbọ meji [40].