Jihofa Fi Joshua Chi

Anubi ki Mosis t’ọgba ñwu abo Israẹl ọdọ wewe, ki la mẹru iko ukwu-wñ. Jihofa ka ñwu kakini: ‘I chu wẹ anẹ abo Israẹl lo t’Anẹ ugbo ku Gbalu ñwu ma n. Ama na jẹñw’ẹ l’anẹ lẹ.’ Ubilẹ, Mosis ka ñwu Jihofa ki chi ẹnẹ omunẹ ki adejutẹ abo-wñ. Taki Jihofa ka ñwu Mosis kakini: ‘Lo t’ugbo Joshua, k’ẹ la ka ñwu kak owñ ch’ẹnẹ ki anya dejutẹ abo Israẹl.’

Mosis ka ñwu abo Israẹl chakaa kak owñ anya gbanẹ tak i kwu gẹ n, taki Jihofa mi Joshua chi ki nẹ abo Israẹl t’oji Anẹ ugbo ki Gbalu ñwu ma mẹ. Ubilẹ, Mosis ka ñwu Joshua kakini: ‘Ẹ ki ch’okpo n. Jihofa ana ch’abunẹ wẹ.’ I gbanẹ anubilẹ n, Mosis le t’oji Uwo Nebo, ọmọ lẹ Jihofa d’anẹ ki gbalutanẹ ñwu Abraham, Aijik kpai Jekọb lẹ ñọ. Mosis ch’ọdọ ọgbọ mẹfa [120] ẹgba ki kwu.

Jihofa ka ñwu Joshua kakini: ‘M’Aji Jọrdan daba, k’ẹ la lo ti Kenan. Na nya ch’abunẹ wẹ alu k’u ch’abunẹ Mosis. Ẹ ki kwef Ọl’ọda mi ọjọ duu n. Ẹ ki ch’okpo n. F’ẹdọ nẹ. Lo k’ẹ na chẹñwu duu k’u ka ñwẹ k’ẹ che.’

Joshua kpẹ amonẹ meji ku ma nya tu ewo Jẹriko. Efu ọhiala ki rọno e-ki dẹ, a nya kọchẹ manyu ẹñwu ki che ọmọ lẹ. Ẹgba k’abo ku ma nya tu anẹ lẹ d’oji wa, ma d’inabali wa kakini ẹgba ku ma lo ti Kenan ch’iko ọmẹmẹlẹ. Ọjọñwa-wñ, Joshua ka ñwu abo-wñ ku ma m’uru ma ko. Ubilẹ, i f’amatama chi ku ma d’akpati alo d’ọgba alo t’Aji Jọrdan. Aji lẹ la acha kp’ukpahiu. Ama ugbogbolo k’ẹrẹ amatama lẹ kwo kad’omi lẹ, aji lẹ ñọ cha gẹ n, i la mu gbẹ! Alu k’amatama l’ẹrẹ lewa alumeji aji lẹ, ma kwo dago ọmọ lẹ tak abo Israẹl chakaa f’ẹrẹ le laale t’udaba aji. Ẹ neju kakini awuwu ki dẹ-i che jẹñwu ma rewa ẹñwu ki Jihofa che ugbo Ohimini Ekpikpa?

Otitala-wñ, anubi am’ọdọ lẹ, abo Israẹl d’oji Anẹ ugbo ki Jihofa Gbalu ñwu ma. Ma kọ am’unyi kpai ewo wewe. Ma neke gbẹ amẹñwu oko kp’uchẹ achiwebẹtẹma ef’anẹ ki arọjẹ. Anẹ lẹ chanẹ k’omi ẹnya kpai iñọ acha.