Amatuanẹ Mẹgweji

Abo Israẹl kw’Uwo Sainai legwu ajẹtachi Paran du lot’ugbo ku ma adọ ki Kedẹsh. Ọmọ lẹ Jihofa ka ñwu Mosis Kakini: ‘F’abokẹlẹ megweji kpẹ, onẹ ka onẹ ka kwefu ọgbọ ọlọpu ma, ku ma f’anẹ Kenan tu, e-k’u na adu ñw’amọma Israẹl.’ Oñ Mosis f’abokẹlẹ mẹgweji chi, i la ka ñwu ma kakini: ‘Mẹ lotu Kenan ku mẹ go ichẹñwu k’anẹ lẹ nyọ ku ma adu gb’ujẹñwu. Mẹ go ichẹñwu ku ma ch’ẹnẹ ẹgbiti abẹku ma ch’ẹnẹ gbiti n, ichẹñwu ki ch’unyi uru ma j’efu-wñ abẹk ewo lile lile ma jọ.’ Õn amatuanẹ mẹgweji lẹ le ti Kenan, Joshua kpai Kelẹb la defu ma.

Anubi ọjọ ọgbọ meji oñ amatuanẹ lẹ mu dabi wa, ma la m’amẹro oli achiwebẹtẹma, pomegranẹt kpai ọgbaikolo ko wa. Amatuanẹ lẹ k’ohi ñwu ma kakini: ‘Anẹ ọmọ ch’anẹ ọmẹmẹlẹ, abo ma ch’amagbiti, akwu la chẹ bu nyu ewo ewo ma ọmọ.’ Ubilẹ Kelẹb kakini: ‘A che n’ukpahiu k’a gb’anẹ lẹ kwefu ọwọ ma. Mẹ lewa k’a tẹgwu ny’ọmọ abajọ-i!’ Ẹ m’ẹñwu ki chi ki Kelẹb k’abalẹ? Todu ọwñ kpai Joshua che kẹdọno Jihofa. Ama, amatuanẹ mẹgwa ki bọ jẹ kp’ama n. Ma kakini: ‘A neke k’ogwu b’abo lẹ n! Todu ma chẹ gbọga, ma la ch’amakachi! A dabu amakpachi ọgba ma.’

Ọla ku ma ka-i f’ẹdọ abo Israẹl gwegbo nyọnyọ. Ma chanẹ ek’eñimini, ma la aka ñw’ọla-ma kakini: ‘A m’agboji omunẹ chi, k’a mudabi t’Ijipt. Ẹñwu chi k’a lo t’ọmọ ku ma kọ wa kpa?’ Taki Joshua kpai Kelẹb kakini: ‘Mẹ ki kọ egb’omu Jihofa gbọ n, mẹ ki la ch’okpo n. Jihofa adide wa.’ Ama, abo Israẹl kọ eneti. Ma añọ tene ku ma mu Joshua kpai Kelẹb du kpa!

Ẹñwu Jihofa la che? I ka ñwu Mosis kakini: ‘Anubi k’u f’ẹñwu wewe che ñw’abo Israẹl, ma ñọ dọmọ akọ enetiru mi. Ma anya j’efu egbili ọdọ ọgbọ meji [40], ọmọ lẹ oñ ma na kwu. Amọma-ma kpai Joshua manyu Kelẹb kate aj’efu anẹ k’u gbalu edu ñwu ma.’