Ukọlọ Awuwu Ki Wa Che Ohimini Ekpikpa

Alu ki Fero gbọ kak abo Israẹl kw’ojanẹ Ijipt, i f’ibe-wñ rida ki we jẹñwu ma ku ma lo. I d’ọda ñwu abogwu-wñ kakini: ‘Mẹ m’ọkọ ogwu-mi ko jọ, k’a lo nya mu ma! A ma jẹñwu ma lo n.’ Tak owñ kpai abogwu-wñ chanẹ era no ma, ku ma mu ma.

Jihofa t’ọgba ñwu abo-wñ, i la d’akpa ojale ch’uganẹ ma ọrọka, una la ch’uganẹ ma odu. I mu ma ko le t’iba Ohimini Ekpikpa, i la ka ñwu ma ku ma k’unyiabo ma ku ma la j’efu-wñ.

Abo Israẹl ch’eju-ma ny’atẹ, ma la li Fero kp’abogwu-wñ ku ma no ma awa. I dabẹnẹ kaki Fero kp’abogwu-wñ anya m’abo Israẹl eti ohimini lẹ. Tak abo Israẹl kwadọ Mosis kakini: ‘Ekwu anya kwu-i o! Ẹ ma t’uwa nọ ojanẹ Ijipt o.’ Ama, Mosis ka ñwu ma kakini: ‘Mẹ ki ch’okpo n. Mẹ dago ku mẹ li ujadu Jihofa.’ Ẹ li kaki Mosis che kẹdọno Jihofa nyọnyọ, abẹk i ch’abalẹ n?

Jihofa ka ñwu abo Israẹl ku ma chanẹ ulẹ ma. Anẹ ọjọ lẹ, Jihofa m’akpa lẹ du t’alumeji abo Ijipt kp’abo Israẹl. Ugbo abo Ijipt ch’ẹchubi tak ugbo abo Israẹl la ch’uganẹ.

Jihofa ka ñwu Mosis ki f’ọwọ-wñ nadala oji ohimini lẹ. Ubilẹ, Jihofa jẹñwu afu ki nana ki ju odu ọjọ lẹ. Ohimini lẹ la mu kpẹr’eji, anẹ ẹgbẹ la kpo t’alumeji-wñ. Ọgbọ duu abo Israẹl l’anẹ ẹgbẹ alumeji ohimini lẹ, omi lẹ la ch’ọdọ dago ọwọ awọtọ kpai ọwọ awohi-ma.

Fero kp’abogwu-wñ l’alumeji ohimini lẹ at’abo Israẹl ubi. Jihofa f’eju abogwu Ijipt gw’ila. Ọka-ọkọ abogwu Ijipt chanẹ echi rinyọ. Tak abogwu Ijipt chanẹ kpogwu kakini: ‘A kw’emi alo! Todu Jihofa aj’uja ñwu ma-i.’

Jihofa ka ñwu Mosis kakini: ‘F’ọwọ nadala oji ohimini lẹ.’ Ẹrẹrẹ lẹ, ọdọ omi lẹ mu gwulọ b’abogwu Ijipt ma. Fero kp’abogwu-wñ chakaa lekwu. Okate ma bọ n.

Ubi k’abo Israẹl mu daba ohimini lẹ, ma chanẹ ek’eli jẹnyu ñwu Ọjọ kakini: “Na k’eli dọ Jihofa, todu edu i du ma, i m’anya kpai ẹnẹ ki tan’o ko rọ ny’efu ohimini.” Alu k’amonẹ na k’eli, abobulẹ ma na t’ido, ma la n’eicha ọwọ na gwo. Ọgbọ duu ma ayọ todu ki Jihofa f’uma jadu ochochi mẹ.