Ẹnẹ Job Che?

Ọnẹkẹlẹ ka dodo ojanẹ Uz ki rarẹ Jihofa kp’ọgbọ ẹdọ-wñ chakaa, odu-wñ kọ Job. Anana lile i che, i la che n’akwọra unyi ki nana. I ch’ẹnẹ ki akwula ñw’onẹ, i la ach’atẹko am’ẹnẹ ale, am’ọya ukwu-ọkọ kpai amọmayokwu. Ama, todu ki ach’ẹñwu ẹnyọ, e-lẹ che kaki Job onugo neke n’amihianyi duu n?

Job ma n, ama Setan Abulumonẹ lẹ na li Job. Jihofa ka ñwu Setan kakini: ‘Ẹ f’ibe adu-mi lẹ kpẹ mẹ dee? Ẹnẹ duu dab owñ ef’ilẹ n, i aneti ru mi, i la ach’ẹñwu ọkpakpa.’ Taki Setan dohi kakini: ‘Ochochi Job agb’omu wẹ gbọ. Ẹ na dide-wñ, ẹ m’ẹnyọ du ñw’ukọlọ ọwọ-wñ, ẹ d’anẹ kpai amẹñwọrẹ nana ñwu. Ama, ichẹñwu k’ẹ m’amẹñwu lẹ ko b’ọwọ tẹ, i ad’ọwọ no arẹ wẹ.’ Oñ Jihofa ñwu kakini: ‘Ẹ neke ch’ajama-wñ, ama ẹ ki n’ọwọ dala kado ọlai-wñ n.’ Ẹñwu chi ki Jihofa jẹñwu Setan ki ch’ajama Job? Todu ki kẹdọno Job kak i ad’owñ tinyọ n.

Setan chanẹ ek’amuchobi ojoji ojoji kẹrẹbọ Job. Ejodudu Setan jẹñwu abo Shẹba ku ma lewa m’amokwunọ Job kp’amọkẹkẹtẹ-wñ ko oji. Ubilẹ, Setan jẹñwu una ki f’amala Job jo, i la f’uma liẹ. Uchẹ abomunẹ ki ch’abo Kaldia lewa m’amanyakwulumi-wñ ko gẹ, ma la f’amadu-wñ ki adejutẹ ma kpa. Ubilẹ, uchobi e-ki biẹnẹ tule ñọ lewa. Amọma Job chakaa lekwu alu k’ọdọ gwulọ buma ma unyi ugbo ku ma jọ ach’uyọ. Job kpo t’efu ẹdọdudu ama Job kọ erẹ Jihofa n.

Setan atene ki Job ki ch’ọbata tabẹlẹ le, i jẹñwu ikete ọkọ ẹbiẹnẹ ki dufu ọla Job chakaa. Job def iwọ lile, Job m’ẹñwu ki chi k’amẹñwu-i duu ache kẹrẹb’ọ n, tabalẹ tabalẹ i na rẹ Jhofa kpọ. Ọjọ li amẹñwu lẹ gbaa, ẹdọ-wñ la bọ ru Job.

Ubilẹ, Setan kpẹ abokẹlẹ mẹta ku ma ji Job ma, ma ka ñwu Job kakini: ‘I n’ada k’ẹ jẹ k’ẹ du maja, owñ Ọjọ ak’ẹ ọla-i.’ Taki Job kakini: ‘I n’ada duu k’u jẹ n.’ Ama, Job chanẹ ekpibe kakini Ọjọ ch’ẹtẹ ọbata-wñ, tak i kakini Ọjọ ch’ali ẹnyọ kp’owñ n.

Ọnẹkẹlẹ ka k’odu-wñ kọ Ẹlaihu na neti r’ọla ku ma na aka awa lẹ, i la dohi n. Ubilẹ, tak i kọla, i kakini: ‘Ẹñwu k’ọgbọ mẹ ka lẹ ch’eju-wñ n. Jihofa che nana t’ẹñwu k’a ma le. I neke chẹñwu ẹbiẹnẹ duu n. I ali ẹñwu duu, i la ach’atẹko abo ku ma def ihianyi.’

Ubilẹ, Jihofa kọla ñwu Job, i kakini: ‘Ugbo ẹ dẹ ẹgba ku ny’ojale kp’anẹ ilẹ? Ẹñwu chi k’ẹ kaki u k’ajọ ọkpakpa n? Ẹ kọla ama ẹ m’oji amẹñwu ki tẹ ache n.’ Job jẹ kak i che biẹnẹ, tak i kakini: ‘U che biẹnẹ mẹ, u che gb’ọla wẹ tanẹ ama abajọ-i u f’ẹ ma nyọnyọ mẹ. Ẹñwu duu neke kp’ọna ny’ẹñwu k’ẹ ñwa k’ẹ che n, agba mudu ba ñwu mi oji ọla ku ka.’

Alu k’ajama lẹ kpoji, Jihofa jẹñwu Job ki f’ọla-wñ nẹ, i jẹñwu ọga-wñ takpa i la ñọ jẹñwu Job n’amẹñwu ki t’e-ki nẹ akwobi le. Job kpojologbo nyọnyọ, i la che n’ọlai ọmẹmẹlẹ. Jihofa k’ẹnyọ ñwu Job todu ki netir’owñ dagba k’ẹñwu chẹ gbiti ñwu Job. Ẹ che dabu Job k’ẹ rẹ Jihofa dagba k’ẹñwu ki mu rida?