Mosis Tu Ki Rẹ Jihofa

Amọma Jekọp mu d’abo ku ma ma r’abo Israẹl ojanẹ Ijipt. Anubi ki Jekọp kpai Josẹf kwu, Fero omunẹ mud’onu ojanẹ Ijipt. Fero lẹ na ch’okpo kaki abo Israẹl chanẹ en’ukpahiu t’abo Ijipt le mẹ. E-lẹ jẹñwu Fero m’abo Israẹl du ch’adu, i jẹñwu ma chanẹ ech’ukọlọ ẹkẹtẹ etẹ kpai otubeli ebọ manyu ukọlọ ẹgbiti. Ama, alu ku ma na d’abo Israẹl ch’ukọlọ ẹgbiti lẹ, abalẹ aluka ma na nana nyọgba, todabu ki Fero ma ñeju ki dabalẹ n, i m’ọda du kaku ma f’amọma ọnẹkẹlẹ duu k’abo Israẹl bi etitọ kpa. Ẹ neke kpibe oji ọna k’abo Israẹl ach’okpo kade iko lẹ?

Jokebẹb onobulẹ ẹnẹ Israẹl ka bi ọma ọnẹkẹlẹ ka ki chẹ fẹreju nyọnyọ. Todu ki neke dide ọma-wñ, i mu du t’efu agba taki mu du maja et’iba Ohimini Nayẹl. Ọmaye ọma kekele lẹ k’odu-wñ kọ Miriam gw’ugbo ka mẹru ọmọ lẹ todu ki na g’ẹñwu ki ana che.

Ọma Fero onobulẹ wa ki gw’ọla tak i f’agba lẹ li, i l’ọma kekele efu-wñ ki na r’akwu ejumomi ọma lẹ la chanẹ ech’o, owñ Miriam kakini: ‘U lo nya d’onobulẹ ka ki adẹnya ñwu ọma ñmọ wa ki n’ọma-i ñwẹ?’ Alu ki ọma Fero onobulẹ lẹ kakini i-i, Miriam na fu Jokebẹd iye ọma lẹ gẹgẹdẹ dọ wa. Ọma Fero onobulẹ lẹ ka ñwu kakini: ‘M’ọma-i du alo k’ẹ nẹ ñwu mi, omi la arọmẹ ñwẹ.’

Alu k’ọma lẹ mugba, Jokebẹd m’ọma lẹ du lo t’ugbo Ọma Fero onobulẹ, i la mugba i chanẹ enẹ kp’ọla-wñ dabu ọma e-wñ, i la d’odu ọma lẹ kọ Mosis. Mosis gba dab’ọma onu, i la neke n’ẹñwu duu ki tene ama Mosis gbenyọ Jihofa n, i che ma kaki ẹnẹ Israẹl owñ che i ch’ẹnẹ Ijipt n, i la ñọ tu ki rẹ Jihofa.

Alu ki Mosis jọ ọdọ ọgbọ meji [40] i fu tu ki ch’atẹko abo-wñ. Alu ki Mosis li ẹnẹ Ijipt ka ki agwo ẹnẹ Israẹl ka ki ch’adu, Mosis r’ẹñwu nyu ẹnẹ Ijipt lẹ i la lekwu. Mosis m’okwu ẹnẹ Ijipt lẹ du maja ef’ẹkẹtẹ. Alu ki Fero ma kado ẹñwu ki Mosis che i atene ki fu kpa, ama Mosis ra le t’ojanẹ Midian, Jihofa la dejut’ọ ọmọ.