Jisọs Mu Dajikwanẹ

Ubi ki Jisọs lekwu, ọnẹkẹlẹ anana ka k’odu-wñ kọ Josẹf le t’ugbo Pailet, i la ka ñwu ki jẹñwu ki m’okwu Jisọs du kw’oji oli ukwu. Taki Josẹf f’ukpo linẹn wenyu okwu Jisọs manyu amẹñwu ki akpo, i la mu du dachi ef’oji etitọ, oñ i la f’okwuta lile kpali b’alu oji lẹ ma. Tak amatama ogijo ka ñwu Pailet kakini: ‘A dejiji todu ẹgba k’amakọchẹ Jisọs awa m’okwu-wñ du kwef oji ku ma la aka k’i mu dajikwanẹ.’ Oñ Pailet ka ñwu ma kakini: ‘Mẹ lo nya f’oji lẹ ñwọche, ku mẹ m’amadide ko j’ọmọ ki dẹ kpakaa’

Inajọ odudu ọjọ ẹkẹta, abobulẹ ka lot’alu oji lẹ, ma la li kaki okwuta ki b’alu oji lẹ ma chẹ kpali b’alu oji lẹ tẹ. Oñ ma li onuchẹ Ọjọ ka ef’oji lẹ, i la ka ñwu abobulẹ lẹ kakini: ‘Mẹ ki chokpo n. Ma mu Jisọs du dajikwanẹ mẹ. Mẹ lo nya ka ñwu amakọchẹ-wñ ku ma led’o Galili.’

Meri Magdalin hika nya tejanẹ Pita kpai Jọn. Alu ki fu ma li, i ka ñwu ma kakini: ‘Ma m’okwu Jisọs du kwef oji mẹ!’ Pita kpai Jọn hika ra le t’alu oji lẹ, alu ku ma li kak okwu Jisọs dọmọ n, ma mu dabi le t’unyi-ma .

Alu ki Meri mu dabi t’alu oji lẹ, i li amonuchẹ Ọjọ meji ọmọ. Tak i ka ñwu ma kakini: ‘U m’ugbo ku ma d’Ondu-mi lo n.’ Ubilẹ, i li ọnẹkẹlẹ ka, i la neju kaki ẹnẹ ki n’uchẹ ọmọ lẹ i che, tak i ka ñwu kakini: ‘Ọnẹnyi, agba ka ñwu mi ugbo k’ẹ d’okwu-wñ tẹ.’ Amaa, alu k’ọnẹkẹlẹ lẹ kakini “Meri!” I fu ma ẹrẹrẹ lẹ kaki Jisọs dọmọ. Taki Meri kpogwu kp’uyọ kakini: “Akonẹwñ!” i la kpaka nyu Jisọs. Oñ Jisọs ka ñwu kakini: ‘Lo k’ẹ ka ñwu amakọchẹ-mi kak’ẹ fu mi li mẹ.’ Ẹrẹrẹ lẹ, Meri ra t’ugbo amakọchẹ Jisọs, i la ka ñwu ma kak i fu Jisọs li mẹ.

Adaranẹ ọjọ lẹ, amakọchẹ meji t’ejọna alulẹ kwi Jerusalẹm alo t’ewo ku ma adọ Ẹmayọs. Ọnẹkẹlẹ ka la lew’ugbo ma, owñ kp’ama la kpẹrẹ alo, i la tu ma ene ẹñwu ku ma akọla oji-wñ. Oñ ma ka ñwu kakini: ‘Uwẹ gbọ ta n? Enyi-kẹta amatama ogijo fu Jisọs kajọ t’ukwu ma la f’u kpa. Amaa, abobulẹ ka kak i deju abajọ-i!’ Tak ọnekẹlẹ lẹ tu ma ene kakini: ‘Mẹ kẹdọno ọla amakachẹ lẹ n? Ma kak i ch’otila ki Kraist ki kwu ki la dajikwanẹ.’ I la na kanẹreju ẹñwu ki defu ọtakada Ọla Ọjọ ñwu ma. Alu ku ma lewa ef’ewo Ẹmayọs, amakọchẹ lẹ ka ñwu kak i bu ma gwugwu. Alu ki f’adua che anẹ alu ku ma atene j’ibrẹdi, ma fu ma kaki Jisọs dẹ. Tak i takparanẹ bu ma eju tẹ.

Tak amakọchẹ meji lẹ ra dabi ti Jerusalẹm unyi ugbo k’amẹnukpuchẹ jeju jọ dama, ma la ka ñwu ma ẹñwu ki che. Alu ku ma d’ejefu ọmọ lẹ, Jisọs m’ọla-wñ du tejugede ñwu ma. Amẹnukpuchẹ lẹ jẹ kaki Jisọs i che ẹgba ejodudu n. Ubilẹ, Jisọs ka ñwu ma kakini: ‘Mẹ g’ọwọ mi, ku mẹ la d’ọwọ kado mi. Ma chẹ kọ tanẹ kaki Kraist adajikwanẹ.’