Ilẹta Ki Kwugbo Uchẹ Adejutukọlọ

Amọmaye Wa K’a Fẹdọ:

Todu k’a ch’abo ki arẹ Jihofa, a fẹdọ Ọla-wñ ki defu Baibul. A che ma kakini am’ọhiala ki defu-wñ ch’ochochi, ibe ki dọmọ la ch’ibe ọmẹmẹlẹ k’a neke lebọ efu ọlai-wa. Baibul ñọ du tejugede ñwu wa kaki Jihofa afẹdọ amonẹ chakaa, e-lẹ la ajẹñwu ẹdọ-wa bọ nyọnyọ. (Eli Ekọ D’Ọjọ 119:105; Luku 1:3; 1 Jọn 4:19) A atene k’a ch’atẹko amonẹ nyọnyọ ku ma wa kọchẹ ochochi ki defu Ọla Ọjọ. E-ki dẹ jẹñwu ẹdọ-wa chẹ bọ k’a d’ọtakada-i dufu ñw’amonẹ, “Kọchẹ Kwefu Ọhiala Amonẹ Ki Defu Baibul.” K’a kọla pẹẹ lugbo ọtakada-i.

Ochochi i che kaki abimọtọ a gbeju ch’ọtakada-i todu ma-i, amaa i ñọ neke ch’atẹko abogijo ku ma atene en’uma nyọgba lugbo amẹñwu ki defu Baibul. Alu k’a ma kaki Baibul ch’ọtakada ñw’abo duu, a che ma jali kaki ọchaka wa anya jile kwefu edeju g’amukọ ki defu-wñ ki neke ch’atẹko wa k’a nẹdẹbọ ochochi.

Dabalu ki dẹ efu Baibul, ọtakada-i akọla lugbo ọhiala amonẹ kw’ẹgba abakwanẹ. Ma ch’alu duu ku ma neke che ku ma jẹñwu am’ọhiala ki defu Baibul ki nẹreju, ki la lọla egba. Ma jẹñwu am’ọhiala-i ki rọn’ọla-ma alu ku ma che le chẹchẹchẹ.

Ọtakada-i muda ch’ọhiala ki defu Baibul ofofo i aka ñwu wa n. Amẹñwu ku ma kọ kp’amifoto ki defu-wñ dẹ ọna ki ajẹñwu ọhiala ki defu Baibul ki nẹreju jalii, ki la ajẹñwu wa m’ọna k’ẹñwu dẹ ọla abo ki kọla lugbo-ma.

Ọtakada ki dẹ-i ach’atẹko wa k’a li ọna ki Baibul ch’ọtakada ki kọla lugbo amonẹ, t’abo ki gb’omu Jihofa gbọ kpai abo ki ma gb’omu-wñ gbọ n. E-lẹ añọ jẹñwu wa k’a kọchẹ kwefu am’ujiwe-ma. (Abo Rom 15:4; 1 Abo Kọrint 10:6) Ọtakada-i chẹ kpẹru ukpẹ mẹgwẹlẹ [14]. Uchanẹ okoke am’ukpẹ duu che n’agwodama amẹñwu k’a neke kọchẹ.

Ichẹñwu k’ẹ ch’ata abẹk iye, ẹ neke gba ọhiala kwefu ukọchẹ ka kp’ọma wẹ, k’ẹ la k’anẹreju ifoto ki defu-wñ ñwu. Ubilẹ, amẹ mejeji neke gba Baibul ugbo ku ma d’ọhiala-i kwo dama. Ch’atẹko ọma wẹ ki neke li ọna k’ẹñwu ki gba kwefu Baibul kp’ẹñwu ki kọchẹ ef’ukọchẹ lẹ jẹ dama le. Ẹ neke ch’abalẹ gẹ ichẹñwu k’ẹ tene ch’atẹko ẹnẹ ki ch’ogijo ki neke m’ẹñwu ki Baibul akọla oji-wñ.

A che kẹdọno kak ọtakada-i ach’atẹko abo duu ki n’ẹdọ ọmẹmẹlẹ ku ma neke kọchẹ kwefu Baibul ku ma la du chekwu efu ọlai-ma, t’abimọtọ t’abogijo. E-lẹ ajẹñwu ma ku ma neke defu akwọra unyi lile ka ki arẹ Jihofa.