Ma Mu Daniẹl Du Tef Ura Amidu

Onu omunẹ ki j’ọfẹ ojanẹ Babilọn che Darius ki kw’ojanẹ Midia, i la li kaki Daniẹl ch’ẹnẹ kpakaa. Onu mi Daniẹl du ch’ẹnutọgba oji abokẹlẹ kpakaa ojanẹ Babilọn. Ọgbọ abokẹlẹ-i ach’ulaka Daniẹl, todulẹ ma che ku ma mu du kpa. Abokẹlẹ-i che ma kaki Daniẹl ach’adua ru Jihofa onu mẹta ọjọduu, todulẹ ma ka ñwu onu Darius kakini: ‘O onu, uwẹ ki m’ọda du tanẹ kak’ẹnẹ duu ki na ch’adua r’uwẹ gbogbo ọjọ ogwuẹgwa. Ẹnẹ duu ki ma la ch’adua r’uwẹ n, ku ma m’ẹnẹ lẹ du rikpolo tef ura amidu.’ Ẹñwu ku ma ka lẹ che ru Darius eju, todulẹ i m’ọwọ du t’ọtakada ọda lẹ.

Alu ki Daniẹl gb’ọda k’onu du tanẹ, i le t’unyi-wñ. Oñ i danyekwu ọgba iwido unyi-wñ, i la ch’adua ru Jihofa. Abokẹlẹ ku ma ach’ulaka Daniẹl f’ọla ma dọ jeju, ma le w’efu unyi-wñ taku ma f’u li alu ki ach’adua alu iwido-wñ. Taku ma le t’ugbo Darius, ma ka ñwu kakini: ‘Daniẹl kọ le b’ọda wẹ. I ach’adua r’Ọjọ-wñ onu mẹta ọjọ duu.’ Amaa, Darius afẹdọ Daniẹl nyọnyọ, i la tene ku ma du kpa n. Oñ i chanẹ ekpibe alu ki ale ki mu Daniẹl gbatanẹ. Amaa, dagba ki ch’owñ ch’onu, i neke rida ọtakada ọda ki d’ọwọ tọ n. Tak onu ka ñwu ma ku ma mu Daniẹl du rikpolo tef ura amidu.

Odu ọjọ lẹ, Darius na kpibe lugbo Daniẹl, i la neke l’olu n. Odudu ọjọ ñwa-wñ, onu hika ny’ugbo ura amidu lẹ, i la d’ọmu nyatẹ kwadọ Daniẹl kakini: ‘Ọjọ-wẹ k’ẹ rẹ ọkọkọlọ lẹ neke m’uwẹ gba kw’ọwọ amidu?’

Darius gb’omukọla Daniẹl kakini: ‘Jihofa f’onuchẹ-wñ kpẹ wa, i la f’alu amidu re, todulẹ ma che mi ẹñwu duu n.’ Tak ẹdọ Darius bọ nyọnyọ! Owñ onu ka ñwu ma ku ma mu Daniẹl du kwefu ura lẹ dufu, ma la li ẹñwu duu ki cho n. Tak onu ka ñwu abo-wñ kakini: ‘Mẹ m’abo ku ma gw’ajọ nyu Daniẹl ko rikpolo tef ura amidu.’ Taku ma wanẹ ef ura lẹ, amidu mu rọ b’uma ma, ma f’achikwu-ma gw’uchẹ yọgọ yọgọ, ma la m’uma ko jẹ.

Oñ Darius f’ọtakada kọ r’amonẹ duu kakini: ‘Amonẹ ki railo ọgba Ọjọ e-Daniel. Owñ gba Daniẹl tanẹ kwef’ọwọ amidu-i.’

Uwẹ ach’adua ru Jihofa ọjọ duu dabu Daniẹl?