Jihofa N’ẹdejẹ Kpai Jona

Abo ku ma d’efewo Asiria ojanẹ Ninẹfa chẹ biẹnẹ nyọnyọ. Jehofa ka ñwu akachẹ-wñ Jona ki lo t’ọmọ ki nya d’ufeti ñwu amonẹ lẹ todu ku ma ribeda. Amaa, Jona ra le t’ugbo omunẹ, i kpo t’ọkọ ki alo ti Tarshis.

Alu ki Jona defu ọkọ lẹ, afu lile chanẹ eju, abo ku ma agw’ọkọ ej’omi lẹ la chanẹ ech’okpo. Taku ma chanẹ ech’adua r’amọjọ ma, ma la na t’ene kakini: ‘Ẹñwu chi k’ẹñwu-i ache taa?’ Otitala-wñ, Jona ka ñwu ma kakini: ‘Omi ch’ẹtẹ ẹñwu ki ache-i. Era na ara b’ẹñwu ki Jihofa ka ñwu mi k’u che tẹ-i. Mẹ m’umi du rọ tef ohimini, ẹgbalẹ tak ohimini kpai afu lile-i abọ lii.’ Am’agwọkọ lẹ tene du Jona rọ tef ohimini n, amaa Jona jẹ n. Alu ku ma mu du rọ tef ohimini lẹ, ochochi ohimini kp’afu lile lẹ bọ lii.

Jona neju kak ekwu owñ anya kwu-i ke. Alu k’i na lo t’ọganẹ ohimini lẹ, i ch’adua ru Jihofa. Oñ Jihofa kpẹ ẹja lile ka ki mu Jona du mi. Amaa, ẹja lẹ du Jona kpa n. Alu ki Jona d’efu ẹja lẹ, i kakini: ‘U gbalu kaki na leb’ẹñwu duu k’ẹ ka iko duu.’ Jihofa dejutẹ Jona ef’ẹja lẹ ọjọ mẹta. Ubilẹ, Jihofa jẹñwu ẹja lẹ ki mu Jona du rẹ t’anẹ ẹgbẹ ọjọ ẹkẹta.

Amaa, todu ki Jihofa fi Jona jadu, e-lẹ che kak i dukpẹ ki Jona ki lo t’ojanẹ Ninẹfa gẹ ni? Ehee. Jihofa ñọ dabi ka ñwu Jona ki lo t’ọmọ. Ẹgba e-ki dẹ, Jona gb’omu Jihofa gbọ. I le t’ọmọ, i la ka ñwu abo ẹbiẹnẹ lẹ kakini: ‘I b’ọjọ ọgbọ meji [40] tete ku ma afi Ninẹfa gwulọ!’ Amaa, ẹñwu awuwu ka lewa che. Abo Ninẹfa netiru ẹnwu ki Jona aka, ma la m’ibe rida b’amẹñwu ẹbiẹnẹ ku ma ache tẹ. Onu abo Ninẹfa ka ñwu abo-wñ kakini: ‘Mẹ kwadọ Ọjọ k’ẹnẹ duu ki la rida b’ọna ẹbiẹnẹ-wñ tẹ. Ikani Ọjọ arida b’ukẹdọfulu-wñ tẹ, k’a we elenyọ.’ Alu ki Jihofa li kak abo Ninẹfa m’ibe rida b’ẹbiẹnẹ-ma tẹ, Jihofa kọ eko ma kpa.

Ẹdọ Jona kpabiẹ alu ki Jihofa ma k’amonẹ lẹ kpa n. Kpibe oji ọla-i ta: Jihofa n’ẹdejẹ ñwu Jona, i la ñọ ch’ejumomi ñwu, amaa Jona ch’ejumomi abo Ninẹfa n. Jona dufu kw’efewo lẹ, i f’ala ka che ñwu ọla-wñ, eñmi ka ki tiga kwanẹ la d’olubọ b’ala lẹ ma. Jona la kpo gwugwu olubọ lẹ. Ubilẹ eñmi emimi lẹ mu gbẹ, ẹdọ Jona la mu kpabiẹ nyọnyọ. Taki Jihofa ka ñwu kakini: ‘Ọla eñmi lẹ aw’ẹ t’ọla abo Ninẹfa le. U li ma ejumomi, e-lẹ la jẹñwu ma n’ujadu.’ Ẹñwu a kọchẹ kwefu ọla ki Jihofa ka-i? Abo Ninẹfa ch’ogbogaga t’eñmi duu le.